ދިވެހިރާއްޖޭގައި ޕޭޕަލްގެ ޚިދުމަތް ރަސްމީކޮށް ދޭން ފަށައިފިއެވެ. މި ޚިދުމަތް ދޭން ފެށީ ޕޭޕަލް އާއި އުރީދޫއާ ދެމެދު ޤާއިމުކުރެވުނު އިންޓަގްރޭޝަނެއްގެ ތެރެއިން، އުރީދޫ އެމް-ފައިސާ މެދުވެރިކޮށެވެ.

މި ޚިދުމަތް އިފުތިތާޙުކުރުމަށް މިއަދު ހެނދުނު ބާސެލޯގައި ބޭއްވި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. މި ރަސްމިއްޔާތުގައި އިޤުތިޞާދީ ތަރައްޤީއާއި ވިޔަފާރިއާ ދަތުރުފަތުރާ ބެހޭ ވުޒާރާގެ ވަޒީރު މުޙައްމަދު ސަޢީދާއި، ޕޭޕަލްގެ އޭޝިއާ-ޕެސިފިކް ޑިވިޜަންގެ ވައިސް ޕްރެޒިޑެންޓް އާމިރު ވަލިއާނީ އާއި، އުރީދޫ މޯލްޑިވްސްގެ އެމްޑީ އަދި ސީއީއޯ ޝާދީ ޤަވާޞްމީ ބައިވެރިވެވަޑައިގެންނެވިއެވެ.

Advertisement

ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ޕޭޕަލް ރާއްޖޭގައި އިންޓަގްރޭޓް ކުރެވުމަކީ ދިވެހި ރައްޔިތުންނަށް ވެވަޑައިގެންނެވި މުހިންމު ވަޢުދެއް ފުދިގެން ދިއުން ކަމަށެވެ. އަދި މިއީ ސަރުކާރުގެ ޑިޖިޓަލް ތަޞައްވުރު "މޯލްޑިވްސް 2.0" އާއި ވިޝަން 2040 ގެ މުހިންމު ފިޔަވަޅެއް ކަމަށް ވިދާޅުވިއެވެ.

ވަޒީރު ސަޢީދު ވިދާޅުވީ، ދުނިޔޭގެ ޑިޖިޓަލް އިޤުތިޞާދުގައި ދިވެހިންގެ ބައިވެރިވުން ފުޅާކުރުމަށް އޮތް ބޮޑު ހުރަހެއް ނައްތާލެވުނީ ރައީސް ވެރިކަމާ ޙަވާލުވެވަޑައިގެންނެވި ފަހުން ކުރެވުނު ގިނަގުނަ މަސައްކަތްތަކުގެ ނަތީޖާއެއްގެ ގޮތުން ކަމަށެވެ. ރާއްޖޭގެ މާކެޓް ކުޑަވެގެން ފަހަތަށް ޖެހެން ޖެހޭ ސަބަބެއް ނެތްކަން މި ނަތީޖާއިން ދޭހަވާ ކަމަށް ވެސް ވިދާޅުވިއެވެ.

ޕޭޕަލްގެ ޚިދުމަތާ އެކު ދިވެހި ވިޔަފާރިވެރިންނާއި ފްރީލާންސަރުންނާއި އުފެއްދުންތެރިންނަށް ބައިނަލްއަޤުވާމީ ބާޒާރުތަކާ ސީދާ ގުޅުވާލެވޭނެއެވެ. އީ-ކޮމާސް ސިނާޢަތަށް އިންޤިލާބީ ކުރިއެރުމެއް ލިބި، ރާއްޖެއަށް ބޭރު ފައިސާގެ އާމްދަނީ އިތުރުވެގެންދާނެ ކަމަށް ވުޒާރާއިން ބުނެއެވެ.