ވޯލްޑް ކަޕްގެ ގްރޫޕް ބީގައި ރޭ ދަންވަރު ބޮޒްނިއާ އެންޑް ހެރްޒެގޮވީނާއާ ދެކޮޅަށް ކުޅުނު މެޗު 1-1 އިން އެއްވަރުކޮށް، މުބާރާތް ބާއްވާ ޤައުމުތަކުގެ ތެރޭގައި ހިމެނޭ ކެނެޑާއިން ފިރިހެނުންގެ ވޯލްޑް ކަޕެއްގައި އެ ޤައުމުގެ ތާރީޚުގައި ފުރަތަމަ ފަހަރަށް ޕޮއިންޓެއް ހޯދައިފިއެވެ.

ޓޮރޮންޓޯގެ ބީއެމްއޯ ފީލްޑްގައި ކުޅުނު މި މެޗަކީ ކެނެޑާގެ ފަސްގަނޑުގައި ކުޅުނު ފިރިހެނުންގެ ފުރަތަމަ ވޯލްޑް ކަޕް މެޗެވެ. މީގެ ކުރިން 1986 އާއި 2022 ގައި ކުޅުނު ހަ މެޗުން ވެސް ކެނެޑާ ވަނީ ބަލިވެފައެވެ.

Advertisement

ތާރީޚީ ދުވަހުގެ ފެށުން ކެނެޑާއަށް ރަނގަޅެއް ނޫނެވެ. މެޗުގެ ކުރީކޮޅު ބޮޒްނިއާއިން ވަނީ ކޯނަރަކުން ނެގި ބޯޅަ، ބޮލުން ކުރެވުނު ޕާސްތަކަކުން ގޯލާ ހަމައަށް ގެންގޮސް، ޔޮވޯ ލޫކިޗް ކާމިޔާބުކުރި ގޯލުން ކުރި ހޯދައިފައެވެ. އެ ނަތީޖާގައި އޮވެ، ހަތް ވަނަ ފަހަރަށް ވޯލްޑް ކަޕް މެޗަކުން ބަލިވުމާ ދިމާއަށް ކެނެޑާ ދަތުރުކުރަމުން ދަނިކޮށް، ނަތީޖާ ހަމަހަމަކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް ސައިލް ލާރިންއެވެ. ކުޅެން ނުކުތްތާ ކުޑައިރުކޮޅެއްގެ ތެރޭގައި، 78 ވަނަ މިނެޓުގައި އޭރިޔާ ތެރެއިން ލާރިން ފޮނުވާލި ހަމަލާ ގޯލަށް ވަނީ ބޮޒްނިއާގެ ޑިފެންޑަރެއްގެ ގައިގައި ޖެހިފައެވެ. ލާރިން އަކީ ފިރިހެނުންގެ ވޯލްޑް ކަޕެއްގައި ގޯލެއް ޖެހި ކެނެޑާގެ ދެވަނަ ކުޅުންތެރިޔާއެވެ.

މެޗުގެ ފަހު ވަގުތުކޮޅު ދިޔައީ ފޯރިގަދަކޮށެވެ. ބޮޒްނިއާގެ ކެޕްޓަން ސެއަޑް ކޮލަޝިނަޗް 84 ވަނަ މިނެޓުގައި އަނިޔާވެގެން ބާލަން ޖެހުނެވެ. އިތުރު ވަގުތުގައި ލާރިން ހުއްޓުވުމަށް ކުރި ފައުލަކާ ގުޅިގެން ނިކޮލާ ކަޓިޗަށް ރީނދޫ ކާޑެއް ދެއްކިއެވެ. އަދި އެންމެ ފަހު ވަގުތު ލާރިން މޮޅުވާ ގޯލެއް ޖަހަން ފޮނުވާލި ހަމަލާ، ގޯލު ކުރިމަތިން ތާރިކް މުހަރެމޮވިޗް ހުށިޔާރުކަމާ އެކު ބްލޮކްކުރުމުން ދެ ޓީމަށް ޖެހުނީ ޕޮއިންޓަކުން ފުއްދާލާށެވެ.

މި ނަތީޖާއާ އެކު ގްރޫޕް ބީގައި ކެނެޑާއާއި ބޮޒްނިއާއަށް ވެސް ލިބިފައިވަނީ އެއް ޕޮއިންޓެވެ. މި ގްރޫޕުގައި ދެން ހިމެނެނީ ސްވިޓްޒަލޭންޑާއި ގަތަރެވެ. ޕެނަލްޓީ ޖަހައިގެން އިޓަލީ ކަޓުވާލުމަށް ފަހު 12 އަހަރަށް ފަހު ވޯލްޑް ކަޕަށް އައި ބޮޒްނިއާއަށް ވެސް މިއީ މުހިންމު ޕޮއިންޓެކެވެ. ދެ ޓީމުގެ ކުރިއަށް އޮތް މެޗުތަކުން ލިބޭ ނަތީޖާއިން، ދެވަނަ ބުރުގެ ޖާގަތައް ކަށަވަރުވުމުގައި މި ޕޮއިންޓްގެ އަގު ފެނިގެންދާނެއެވެ.