ސާނަވީ ތަޢުލީމު ނިންމައި ވަޒީފާގެ ބާޒާރަށް ނުކުންނަ ޒުވާނުންނަށް ކެރިއާ އާއި މުސްތަޤްބަލް ބައްޓަން ކުރުމާ ގުޅޭ މުހިންމު މަޢުލޫމާތު ފޯރުކޮށްދިނުމުގެ މަޤްޞަދުގައި ކްލިކް ކޮލެޖުން އިންތިޒާމު ކޮށްގެން ބާއްވާ "ނެކްސްޓް ސްޓެޕް ފޮރ ޔޫތު ޑިވެލޮޕްމެންޓް" ހަރަކާތް މީރުމާ ހޯލުގައި ފަށައިފިއެވެ.

ދެ ދުވަހުގެ މުއްދަތަށް ކުރިއަށް ގެންދާ މި ހަރަކާތް ރަސްމީކޮށް އިފްތިތާޙު ކޮށްދެއްވީ މާލެ ސިޓީގެ މޭޔަރު އާދަމް އާޒިމެވެ. 

ހަރަކާތް އިފްތިތާޙު ކުރުމުގެ ރަސްމިއްޔާތުގައި ވާހަކަ ދައްކަވަމުން ކްލިކް ކޮލެޖުގެ ރައީސް ޑރ. ނައުޝާދު މުޙައްމަދު ވަނީ، ތަޢުލީމީ ދާއިރާ އާއި ކެރިއާ ބާޒާރަށް އަންނަމުންދާ ބަދަލުތަކަށް އަލިއަޅުއްވައި، ދަރިވަރުން އެ ބަދަލުތަކަށް ލޯ ހުޅުވައި ތައްޔާރުވުމުގެ މުހިންމުކަން ފާހަގަ ކުރައްވައިފައެވެ. ތަޖުރިބާކާރުންގެ އިރުޝާދު ހޯދައި، ލިބޭ ފުރުޞަތުތައް ހެޔޮ ގޮތުގައި ބޭނުން ހިފުމަކީ އިޖުތިމާޢީ އަދި އިޤްތިޞާދީ ކުރިއެރުމަށް ޓަކައި ކޮންމެހެން ކުރަން ޖެހޭ ކަމެއް ކަމަށް ވެސް ވިދާޅުވިއެވެ.

މޭޔަރު އާދަމް އާޒިމް ދެއްކެވި ވާހަކަފުޅުގައި، ޒުވާނުންގެ ކުރިއެރުމަށް ފުރުޞަތުތައް ފަހިކޮށްދިނުމަށް ކްލިކް ކޮލެޖުން ކުރަމުންދާ މަސައްކަތަށް ތައުރީފު ކުރެއްވިއެވެ. އަމިއްލަ ދިރިއުޅުމުގެ ތަޖުރިބާ ހިއްސާ ކުރައްވަމުން މޭޔަރު ވިދާޅުވީ، ތަޢުލީމީ މަގުގައި ކުރިމަތިވި ހުރަސްތަކާ ގުޅިގެން ނާކާމިޔާބީތަކާ ކުރިމަތިލެއްވި ކަމަށާއި، ނަމަވެސް ހިތްވަރާ އެކު ކުރިއަށް ވަޑައިގެން ކާމިޔާބީ އަށް ވާޞިލް ވެވުނު ކަމަށެވެ. "ނާކާމިޔާބީ އަކީ ކާމިޔާބީ ނުލިބޭނެ ކަމުގެ ނިޝާނެއް ނޫން. އިތުރު ފުރުޞަތެއް ލިބެންދެން ޔޫސް ނުވެ ގަދައަޅައި މަސައްކަތް ކުރޭ" ކަމަށް މޭޔަރު އިލްތިމާސް ކުރެއްވިއެވެ.

ރަސްމިއްޔާތަށް ފަހު މޭޔަރު ވަނީ އެކި މުއައްސަސާތަކުން ތައްޔާރު ކޮށްފައި ވާ ސްޓޯލްތަކަށް ޒިޔާރަތް ކުރައްވައި، ދަރިވަރުންނާއި ބައިވެރިންނާ ބައްދަލު ކުރައްވައިފައެވެ.

މި ހަރަކާތުގެ ތެރޭގައި ޕެނަލް ޑިސްކަޝަން، ވަޒީފާ ބޫތް، ތަޢުލީމީ ފުރުޞަތުތައް، ނަފްސާނީ ދުޅަހެޔޮކަން، އައިޓީ، އެކައުންޓިން، ވިޔަފާރި، ޞިއްޙީ ދާއިރާ، އަދި ބިޒްނަސް މާކެޓް ފަދަ ދާއިރާތަކާ ގުޅޭ ޚާއްޞަ ސެޝަންތައް ވެސް ކުރިއަށް ގެންގޮސްފައި ވެއެވެ. ޞިއްޙީ އިދާރާތަކާއި، އެންއެސްޕީއޭ (ނެޝަނަލް ސޯޝަލް ޕްރޮޓެކްޝަން އެޖެންސީ) އާއި، ރެނެސާންސް ފަދަ ކުންފުނިތަކުން ވެސް ވަޒީފާ ފުރުޞަތާއި ކެރިއާ އިރުޝާދު ފޯރުކޮށްދެމުން ގެންގޮސްފައި ވެއެވެ.

މި ހަރަކާތުގެ ތެރޭގައި "ފައިޓިންގ ގޭމް ކޮމިއުނިޓީ މޯލްޑިވްސް" (އެފްޖީސީ އެމްވީ) ގުޅިގެން ގޭމިން މުބާރާތެއް ވެސް ކުރިއަށް ގެންގޮސްފައި ވެއެވެ. ކޮންމެ މީހަކަށް ވެސް ބައިވެރިވެވޭ ގޮތަށް އޮތް މި މުބާރާތުގެ ފައިނަލް މާދަމާ ކުރިއަށް ދާނެއެވެ. ކްލިކް ކޮލެޖާއި އެފްޖީސީ އެމްވީ ވަނީ މިހާރު ވެސް ރަސްމީކޮށް ގުޅިފައެވެ.

މި އިވެންޓް މާދަމާ ވެސް މީރުމާ ހޯލުގައި މެންދުރު 12:00 އިން ރޭގަނޑު 10:00 އަށް ކުރިއަށް ދާނެއެވެ. މާދަމާ ކުރިއަށް ދާ ޕެނަލްތައް:

14:00–14:45: ސްޕެޝަލް ސްޓަޑީސް — ކްރިމިނޮލޮޖީ، ސްޕޯޓްސް، އޭވިއޭޝަން، އިންޖިނިއަރިން

17:00–18:00: ސްޕެޝަލް ސްޓަޑީސް — މެޑިސިން، ސައިން ލޭންގުއެޖް

20:00–21:00: ޓެކްނޮލޮޖީ އެންޑް ސްޕޭސް ރީސާޗް

މީގެ އިތުރުން ނެޝަނަލް މެންޓަލް ހެލްތް ޑިޕާޓްމެންޓުގެ ހެލްޕް ލައިނާ ގުޅޭ ޚާއްޞަ ސެޝަނެއް ވެސް ކުރިއަށް ދާނެއެވެ.

ސެޝަންތަކުގައި ބައިވެރިވާން ބޭނުންވާ ފަރާތްތަކަށް https://forms.gle/ubtXWEiDy4tVb6Wi9 ލިންކު މެދުވެރިކޮށް ރަޖިސްޓްރީ ކުރެވޭނެއެވެ. ސެޝަންތައް ސޯޝަލް މީޑިއާ މެދުވެރިކޮށް ލައިވް ވެސް ކުރާނެއެވެ.