ބޭންކް އޮފް މޯލްޑިވްސް (ބީއެމްއެލް) އިން ބައިނަލްއަޤުވާމީ އިންވެސްޓަރުންނާ ބައްދަލުކޮށް "ނޮން-ޑީލް ރޯޑްޝޯ" އެއް ކާމިޔާބުކަމާ އެކު ނިންމައިލައިފިއެވެ.

އެޕްރީލް 29 އިން މެއި އަށެއްގެ ނިޔަލަށް ކުރިއަށް ގެންދިޔަ މި ސިލްސިލާ ބައްދަލުވުންތައް ބާއްވައިފައި ވަނީ ދުނިޔޭގެ މާލީ މަރުކަޒުތައް ކަމަށްވާ ސިންގަޕޫރާއި ހޮންކޮންގް އާއި ލަންޑަނުގައެވެ. ބީއެމްއެލް އިން ބުނީ މިއީ ބައިނަލްއަޤުވާމީ ޑެޓް މާކެޓްތަކުން ބޭންކަށް ބޭނުންވާ ފަންޑު ހޯދުމަށް ކުރަމުންދާ ސްޓްރެޓެޖިކް މަސައްކަތުގެ ބައެއް ކަމަށެވެ.

Advertisement

ހޯދާ ފައިސާ މައިގަނޑު ގޮތެއްގައި ބޭނުންކުރާނީ ބޭންކުގެ ޚިދުމަތްތައް ފުޅާކުރުމަށާއި، ރާއްޖޭގެ އިޤްތިޞާދުގެ މައިނާރު ކަމަށްވާ ފަތުރުވެރިކަމުގެ ދާއިރާ އަށް ދެމުންދާ އެހީތެރިކަން ވަރުގަދަ ކުރުމަށް ކަމަށް ބީއެމްއެލް އިން ބުނެއެވެ. މިދިޔަ އެޕްރީލް މަހުގެ ނިޔަލަށް ފަތުރުވެރިކަމުގެ ދާއިރާ އަށް ދޫކޮށްފައިވާ ލޯނުގެ ޖުމްލަ 594 މިލިއަން ޑޮލަރަށް އަރާ އިރު، މި އަހަރުގެ ފުރަތަމަ ހަތަރު މަހު އެކަނި ވެސް 35 މިލިއަން ޑޮލަރު އެ ދާއިރާ އަށް ދޫކޮށްފައިވެއެވެ.

މިކަމާ ގުޅޭ ގޮތުން ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރ މުޙައްމަދު ޝަރީފް ވިދާޅުވީ ދުނިޔޭގެ އިންވެސްޓަރުންނާ އެކު ބޭއްވުނު ބައްދަލުވުންތަކުން އުންމީދީ ނަތީޖާތަކެއް ފެނުނު ކަމަށާއި، ރާއްޖޭގެ އިޤްތިޞާދާއި ބޭންކުގެ ހިންގުމާ މެދު އިންވެސްޓަރުންގެ އިތުބާރު އޮތް ކަން ހާމަވެގެން ދިޔަ ކަމަށެވެ. ބައިނަލްއަޤުވާމީ މާލީ ބާޒާރުތަކަށް ވަނުމަކީ ފަތުރުވެރިކަން ފަދަ މުހިންމު ދާއިރާތަކަށް ދޭ އެހީތެރިކަން ފުޅާކުރުމަށް އެޅޭ މުހިންމު ފިޔަވަޅެއް ކަމަށް ވެސް ޝަރީފް ވިދާޅުވިއެވެ.

މި ރޯޑްޝޯ ބާއްވައިފައި ވަނީ ބީއެމްއެލްގެ 43 އަހަރުގެ ތާރީޚުގައި ވެސް އެންމެ ރަނގަޅު މާލީ ނަތީޖާ ހޯދި އަހަރަކަށް ފަހުގައެވެ. ބީއެމްއެލް އިން ބުނީ ބޭރުގެ އެއްވެސް ދަރަންޏެއް ނެތި ބޭންކުގެ ކެޕިޓަލް ރޭޝިއޯ ރެގިއުލޭޓަރީ މިންގަނޑަށް ވުރެ މަތީގައި ދެމެހެއްޓެމުންދާ ކަމަށެވެ.