ފީފާ ކޮންގްރެސްގައި ފަލަޞްޠީނާއި އިޒްރޭލުގެ ފުޓުބޯޅަ ފެޑަރޭޝަންތަކުގެ ވެރިން ސަލާން ކުރުވައި، އެކުގައި ފޮޓޯއަކަށް ހުއްޓުވުމަށް ފީފާގެ ރައީސް ޖިއާނީ އިންފެންޓީނޯ ކުރި މަސައްކަތް ނާކާމިޔާބުވެ، ބޮޑު ލަދެއްގައި ބެދިއްޖެއެވެ.

ވެންކޫވަރ ކޮންވެންޝަން ސެންޓަރުގައި ބުރާސްފަތި ދުވަހު ބޭއްވި 76ވަނަ ފީފާ ކޮންގްރެސްގެ ނިމުމުގެ ކުރީން، ފަލަޞްޠީނުގެ ފުޓުބޯޅަ ފެޑަރޭޝަންގެ ރައީސް ޖިބްރީލް ރަޖޫބް، އިޒްރޭލުގެ ފުޓުބޯޅަ ޖަމްޢިއްޔާގެ ނައިބު ރައީސް ބާސިމް ޝޭޚު ސުލައިމާންއާ ސަލާން ކުރަން ދެކޮޅު ހެދިއެވެ.

ދެ ބޭފުޅުންވެސް ކޮންގްރެސްގައި ޚިޠާބު ދެއްވުމަށް ފަހު، ދެ ބޭފުޅުން އެކުގައި ސްޓޭޖަށް ގޮވާލީ އިންފެންޓީނޯއެވެ. ނަމަވެސް ރަޖޫބް ހުރީ ސުލައިމާންއާ ދުރުގައެވެ. އިންފެންޓީނޯ، ރަޖޫބުގެ އަތުގައި ހިފައި ކައިރިއަށް ގެންނަން މަސައްކަތް ކުރި ނަމަވެސް، ރަޖޫބް އެ ކަން ޤަބޫލެއް ނުކުރިއެވެ. މައިކުތަކުން ދުރުގައި ރަޖޫބް އަޑުގަދަކޮށް އިޙްތިޖާޖުކޮށް، ފަހުން ސްޓޭޖުން ފޭބިއެވެ.

ދެ ބޭފުޅުން ސްޓޭޖުން ފޭބުމަށްފަހު، އިންފެންޓީނޯ ބުނީ: "ރައީސް ރަޖޫބް، ނައިބު ރައީސް ސުލައިމާން، ހިނގާ އެކުގައި މަސައްކަތް ކުރަން. ކުދިންނަށް އުންމީދު ދޭން ހިނގާ އެކުގައި މަސައްކަތް ކުރަން." އިންފެންޓީނޯ އެ ދެއްކީ 17 އަހަރުން ދަށުގެ ކުދީންގެ ވޯލްޑްކަޕްގެ ވާހަކައެވެ.

ކޮންގްރެސް ނިމުމަށްފަހު ނޫސްވެރީންނާ ވާހަކަ ދައްކަމުން ރަޖޫބް ބުނީ: "ޒުލްމުވެރި، ހައްދުފަހަނައަޅާފައިވާ، ނަސްލީ ތަފާތު ކުރާ ސަރުކާރެއް ތަމްސީލު ކުރާ، އެ ސަރުކާރުގެ ވެރިން ވެސް ދިފާޢު ކުރާ މީހަކާ އަޅުގަނޑު ސަލާން ކުރަންޖެހެނީތޯ؟ އަޅުގަނޑަކަށް ހީއެއް ނުވޭ. އިޒްރޭލު ތަމްސީލު ކުރުމަށް ވާހަކަ ދެއްކެވި ބޭފުޅަކީ ފީފާގެ ޕާޓްނަރެއްގެ ގޮތުގައި ޕަބްލިކަށް ކުރިމަތިލާން ޤާބިލު ބޭފުޅެއް ނޫން ކަމަށް އަޅުގަނޑަށް ޤަބޫލުކުރެވޭ."

ރަޖޫބް އިތުރަށް ބުނީ: "އިޒްރޭލަށް ފީފާގެ ބައިވެރިއަކަށް ވުމުގެ ޙައްޤު އެބަ އޮތްތޯ ވެސް ހަޤީޤަތުގައި އެއީ ސުވާލެއް." ކަމަށާއި ފީފާގެ ޤަވާޢިދުތަކާ ޚިލާފުވެ، އިންސާނީ ޙައްޤުތަކަށް އަރައިގަތުމުގެ ސަބަބުން އިޒްރޭލަށް ފިޔަވަޅު އެޅުމުގެ ވަގުތު ޖެހިއްޖެ ކަމަށް އޭނާ ބުންޏެވެ.

ފަލަޞްޠީނުގެ ފުޓުބޯޅަ ފެޑަރޭޝަނުން ފާއިތުވި 15 އަހަރު ވަންދެން ވަކާލާތު ކުރަމުން އައީ، ހިފައިފައިވާ ހުޅަނގު އައްސޭރީގެ ޔަހޫދީ އާބާދީ (ސެޓްލްމެންޓު) ތަކުގައި ޤާއިމު ކޮށްފައިވާ ކްލަބު ތައް އިޒްރޭލުގެ ނެޝަނަލް ލީގުގައި ކުޅެން ހުއްދަ ދޭތީ، އެއީ ފީފާގެ ޤަވާޢިދުތަކާ ޚިލާފު ކަމެއް ކަމަށް ބުނެއެވެ.

މި ވޭތުވެދިޔަ މާރިޗު މަހު، މި މައްސަލާގައި އިޒްރޭލަށް ފިޔަވަޅު ނޭޅުމަށް ފީފާއިން ނިންމީ، ހުޅަނގު އައްސޭރީގެ ޤާނޫނީ ޙާލަތު ނާޒުކު ކަމުން ކަމަށް ބުނެއެވެ. ފީފާގެ މި ނިންމުމާ ދެކޮޅަށް މި ވޭތުވެދިޔަ ހަފުތާގައި، ފަލަޞްޠީނުގެ ފެޑަރޭޝަނުން ވަނީ ކޯޓު އޮފް އާބިޓްރޭޝަން ފޯ ސްޕޯޓު (CAS) އަށް މައްސަލަ ހުށަހަޅައިފައެވެ.

އިޒްރޭލުގެ ފުޓުބޯޅަ ޖަމްޢިއްޔާގެ އެކްޓިން ސެކްރެޓަރީ ޖެނެރަލް ޔާރިވް ޓެޕާ ބުނީ، ރަޖޫބުގެ ތުހުމަތުތަކާ ބެހޭ ގޮތުން ވަކި އެއްޗެއް ބުނަން ބޭނުން ނުވާ ކަމަށާއި، ނަމަވެސް ފަލަޞްޠީނުގެ ފެޑަރޭޝަނާ އެކު މަސައްކަތް ކުރަން އިޒްރޭލު ތައްޔާރު ކަމަށެވެ.

76ވަނަ ފީފާ ކޮންގްރެސްގައި ފީފާގެ 211 މެމްބަރު ޤައުމުގެ ނަން އިޢުލާން ކުރި އިރު، ހާޒިރު ނުވާ ޤައުމެއްގެ ގޮތުގައި އިޢުލާން ކުރީ ހަމައެކަނި އީރާނެވެ. އީރާން ފުޓުބޯޅަ ފެޑަރޭޝަންގެ ރައީސް މަހްދީ ތާޖު ހިމެނޭ ވަފުދެއް، ކޮންގްރެސްގައި ބައިވެރިވުމަށް ޓޮރޮންޓޯއަށް ދިޔަ ނަމަވެސް، ކެނެޑާ އިމިގްރޭޝަނުން ވަނީ ވެއްދުމުގެ ހުއްދަ ނުދީފައެވެ.

ކޮންގްރެސް ނިންމާލުމުގެ ކުރީން އިންފެންޓީނޯ ވަނީ، 2027 ވަނަ އަހަރު އޮންނަ އިންތިޚާބުގައި ވެސް ފީފާގެ ރައީސްކަމަށް އަލުން ކުރިމަތިލާން ޤަޞްދު ކުރައްވާ ކަން އިޢުލާން ކޮށްފައެވެ.