ފީފާ ވޯލްޑް ކަޕް 2026ގައި އީރާން ބައިވެރިވާނެކަމުގެ ޔަޤީންކަން، ކުރީން ނިންމާފައި އޮތް ގޮތަށް ތިން ގްރޫޕް ސްޓޭޖު މެޗު ވެސް އެމެރިކާގައި ކުޅޭނެ ކަމަށް، ފީފާގެ ރައީސް ޖިއާނީ އިންފެންޓީނޯ ދެއްވައިފިއެވެ.

ކެނެޑާގެ ވެންކޫވަރުގައި ރޭގައި ބޭއްވި 76 ވަނަ ފީފާ ކޮންގްރެސްގައި ވާހަކަ ދައްކަވަމުން އިންފެންޓީނޯ ވިދާޅުވީ އީރާނުން ވޯލްޑްކަޕްގައި ބައިވެރިވާނެ ކަމަށާއި އީރާނުގެ މެޗްތައް ކުޅޭނީވެސް އެމެރިކާގައި ކަމަށެވެ.  އޭނާ އިތުރަށް ވިދާޅުވީ، މި ނިންމުމުގެ ފަހަތުގައި ވަނީ ދުނިޔެ އެކަތިގަނޑަކަށް ހެދުމުގެ ވިސްނުން ކަމަށެވެ.

މިއީ، އެމެރިކާ އާއި އިޒްރޭލުން މި އަހަރުގެ ފެބުރުވަރީ މަހު އީރާނަށް ދިން ހަމަލާތަކަށް ފަހު، އެ ޤައުމުގެ ޓީމު ވޯލްޑް ކަޕުގައި ކުޅޭނެތޯ ޝައްކު އުފެދިފައި ވަނިކޮށް، ފީފާގެ ފަރާތުން ދިން ޔަޤީންކަމެވެ.

ފައިނޭންޝަލް ޓައިމްސްއިން ރިޕޯޓުކޮށްފައިވާ ގޮތުގައި، އެމެރިކާގެ ރައީސް ޑޮނަލްޑް ޓްރަމްޕު ފީފާއަށް ހުށަހެޅީ، އީރާންގެ ބަދަލުގައި ވޯލްޑް ކަޕުގައި އިޓަލީ ހިމެނުމަށެވެ. އެކަމަކު މި ވޯލްޑް ކަޕުގެ ޔޫރޯ ޕްލޭއޮފް ފައިނަލުގައި އިޓަލީ، ބޮސްނިއާ އަތުން ބަލިވެ، ވޯލްޑް ކަޕުގެ ފުރުޞަތު ވަނީ ގެއްލިފައެވެ.

މި ހުށަހެޅުން ހުށަހެޅީ، ޓްރަމްޕާއި އިޓަލީގެ ބޮޑުވަޒީރު ޖޯޖިއާ މެލޯނީއާ ދެމެދު އޮތް ގުޅުން ވަރުގަދަ ކުރުމުގެ ބޭނުމުގައި ކަމަށް ފައިނޭންޝަލް ޓައިމްސްއަށް އެމެރިކާގެ ޚާއްޞަ މަންދޫބު ޕައޯލޯ ޒަމްޕޮއްލީ ކަށަވަރުކޮށްދިނެވެ.

ނަމަވެސް އެމެރިކާގެ ސެކްރެޓަރީ އޮފް ސްޓޭޓު މާކޯ ރޫބިއޯ ފަހުން ބުނީ، އީރާންގެ ކުޅުންތެރީންނަށް އެމެރިކާއަށް ވަދެވޭނެ ކަމަށެވެ. ނަމަވެސް އީރާންގެ ރެވޮލިއުޝަނަރީ ގާޑު (އައިއާރުޖީސީ) އާ ގުޅުން ހުރި ފަރާތެއް އެމެރިކާއަށް ވަނުމުގެ ހުއްދައެއް ނުދޭނެ ކަމަށް އޭނާ އިތުރަށް ބުންޏެވެ.

ފީފާ ކޮންގްރެސްގައި ބައިވެރިވުމަށް އީރާންގެ ފުޓުބޯޅަ ފެޑަރޭޝަންގެ ވަފުދު، ފެޑަރޭޝަންގެ ރައީސް މަހްދީ ތާޖު، ސެކްރެޓަރީ ޖެނެރަލް ހިދާޔަތު މޯމްބޭނީ، އަދި ޑެޕިއުޓީ ސެކްރެޓަރީ ޖެނެރަލް ހާމިދު މޯމޭނީ ރަސްމީ ވިސާއާ އެކު ޓޮރޮންޓޯއަށް ދިޔަ ނަމަވެސް، ކެނެޑާގެ އިމިގްރޭޝަން އޮފިޝަލުން ވެއްދުމުގެ ހުއްދައެއް ނުދިނެވެ. 

ތާޖަކީ ކުރީގެ ރެވޮލިއުޝަނަރީ ގާޑުގެ މެމްބަރެކެވެ. ކެނެޑާއިން 2024 ވަނަ އަހަރު ރެވޮލިއުޝަނަރީ ގާޑު ޓެރަރިސްޓު ޖަމާޢަތެއްގެ ގޮތުގައި ކަނޑައަޅާފައިވާތީ، އެ ޖަމާޢަތާ ގުޅުން ހުރި ފަރާތްތަކަށް ކެނެޑާއަށް ވަދެވުމުގެ ހުއްދައެއް ނުލިބޭ ކަމަށް ކެނެޑާ ސަރުކާރުން ބުނެފައިވެއެވެ.

ތަސްނީމް ނިއުސް އެޖެންސީގައި އީރާންގެ ފުޓުބޯޅަ ފެޑަރޭޝަންގެ ބަޔާނުގައި ބުނީ: "ފެޑަރޭޝަންގެ ރައީސް، ސެކްރެޓަރީ ޖެނެރަލް އަދި ޑެޕިއުޓީ ސެކްރެޓަރީ ޖެނެރަލް ފީފާ ކޮންގްރެސްގައި ބައިވެރިވުމަށް ރަސްމީ ވިސާއާ އެކު ޓޮރޮންޓޯއަށް ދިޔަ ނަމަވެސް، އެއާޕޯޓުގެ އިމިގްރޭޝަން އޮފިޝަލުންގެ އަމަލުތަކުގެ ސަބަބުން، އީރާނުގެ ޢަސްކަރީ އެންމެ ޝަރަފުވެރި އެއް ބާރަށް ފުރައްސާރަ ކުރުމުގެ ސަބަބުން، ތުރުކީއަށް އެނބުރި ދިޔައެވެ."

މި ޓެންޝަންތަކުގެ ތެރޭގައި ވެސް އީރާންގެ ފެޑަރޭޝަން ވަނީ ޓީމު ވޯލްޑް ކަޕަށް ތައްޔާރުވަމުންދާ ކަން ހާމަކޮށްފައެވެ. އޭޕްރީލް 22 ވަނަ ދުވަހު ދައުލަތުގެ ބްރޯޑްކާސްޓަރ "އީރާން ބްރޯޑްކާސްޓިން" އާ ވާހަކަ ދައްކަމުން، ސަރުކާރުގެ ތަރުޖަމާން ފާޠިމާ މުހާޖެރާނީ ބުނީ، ޓީމުގެ ބައިވެރިވުމަށް ބޭނުންވާ ހުރިހާ އިންތިޒާމެއް ޒުވާނުންނާއި ކުޅިވަރާ ބެހޭ ވުޒާރާއިން ހަމަޖައްސާފައިވާ ކަމަށެވެ.

ނަމަވެސް އިއްޔެ އިންފެންޓީނޯ ދެއްވި ޔަޤީންކަމާ ބެހޭ ގޮތުން، އީރާންގެ ރަސްމީ ބަޔާނެއް މި ޚަބަރު ނެރުމާ ހަމައަށް ނުފެނެއެވެ.

އީރާން ހިމެނެނީ ގްރޫޕް G ގައި، ބެލްޖިއަމް، މިސްރު، އަދި ނިއުޒީލެންޑާ އެކުގައެވެ. އީރާންގެ ކޯޗަކީ އަމީރު ޤަލެނޮޢީއެވެ. ފީފާ ރޭންކިންގެ 21 ވަނައިގައި އޮތް އީރާން، ވޯލްޑް ކަޕުގައި ބައިވެރިވާނީ ހަތްވަނަ ފަހަރަށެވެ.

އީރާންގެ ތިން މެޗު ވެސް ކުޅޭނީ އެމެރިކާގައެވެ. ޕެސިފިކް އައްސޭރީގެ ވަގުތުން ދުވާލު ވަގުތުގައި ކުޅޭ މި މެޗުތައް، ދިވެހި ގަޑިއަށް ބަލާއިރު ވާނީ ޖެހިގެން އަންނަ ދުވަހުގެ ހެނދުނާއި ދަންވަރުގެ ވަގުތުތަކުގައެވެ.

ޖޫން 16 (އަންގާރަ): އީރާން vs ނިއުޒީލެންޑު — ހެނދުނު 6:00 — ސޯފައި ސްޓޭޑިއަމް، އިންގްލްވުޑް، ކެލިފޯނިއާ

ޖޫން 22 (ހޯމަ): ބެލްޖިއަމް vs އީރާން — ދަންވަރު 12:00 — ސޯފައި ސްޓޭޑިއަމް، އިންގްލްވުޑް، ކެލިފޯނިއާ

ޖޫން 27 (ހޮނިހިރު): މިސްރު vs އީރާން — ހެނދުނު 8:00 — ލޫމަން ފީލްޑު، ސިއެޓްލް

އީރާން ކުރީން ފީފާގައި އެދިފައި ވަނީ، ގްރޫޕް ސްޓޭޖު މެޗުތައް ކެނެޑާ ނުވަތަ މެކްސިކޯއަށް ބަދަލުކޮށްދިނުމަށެވެ. ނަމަވެސް ފީފާއިން މި ހުށަހެޅުން ޤަބޫލެއް ނުކުރެއެވެ.

ފީފާ ކޮންގްރެސްގެ ކުރީން ޓޮރޮންޓޯ ހާދިސާ ހިނގި ކަމަށްޓަކައި ފީފާއިން ހިތާމަ ފާޅުކޮށް، އިންފެންޓީނޯ އީރާންގެ ވަފުދާ ބައްދަލުވުމެއް ފީފާގެ ހެޑްކުއާޓަރުގައި ހަމަޖައްސާނެ ކަމަށް އީރާންގެ ތަސްނީމް ނިއުސް ރިޕޯޓުކުރެއެވެ.

ވޯލްޑް ކަޕް 2026 ފެށޭނީ ޖޫން 11 ވަނަ ދުވަހު، މެކްސިކޯ ސިޓީގައި ހުންނަ އެސްޓާޑިއޯ އަޒްޓެކާގައެވެ. 48 ޓީމާ އެކު ކުޅޭ މި މުބާރާތަކީ ތާރީޚުގައި ވެސް މިހާތަނަށް ބޭއްވޭ އެންމެ ބޮޑު ވޯލްޑް ކަޕެވެ.