ރައީސް ޑރ. މުޙައްމަދު މުޢިއްޒު ކެބިނެޓް ރީސްޓްރަކްޗަރ ކުރެއްވުމާ ގުޅިގެން ވަޒީރުންނަށް ރުހުން ދިނުމުގެ ވޯޓުގައި، އެމްޑީޕީގެ އަށް މެންބަރުން ހޯމް މިނިސްޓަރު ޢަލީ އިޙްސާނަށް ރުހުން ދީފިއެވެ. މީގެ 14 މަސް ކުރިން ހަމަ މި ޕާޓީން އިޙްސާންގެ އިތުބާރު ނެތް ކަމުގެ މައްސަލަ ވެއްދީ ބޮޑެތި ތުހުމަތުތަކާ އެކުގައެވެ.

2025 ޖެނުއަރީ 17 ގައި އެމްޑީޕީގެ 12 މެންބަރުންގެ ސޮޔާ އެކު ޢަލީ އިޙްސާންގެ އިތުބާރު ނެތް ކަމުގެ މައްސަލަ މަޖިލީހަށް ހުށަހެޅީ ބޮޑެތި ތުހުމަތުތަކާ އެކުގައެވެ. ޑީއެންއާރުގެ ޑޭޓާބޭސް ނަހަމަ ގޮތުގައި ބޭނުންކޮށް ޕީއެންސީގެ ޖައްލު މެންބާޝިޕް ފޯމް ހެދި ކަމާއި، ފުލުހުންގެ ތަޙުޤީޤުތަކަށް ސިޔާސީ ނުފޫޒު ފޯރުވާ ކަމާއި، ސުލްޙަވެރި މުޒާހަރާތައް ރޫޅައިލުމާއި، ނޫސްވެރީންނާ ދެކޮޅަށް ތަޙުޤީޤު ހިންގުމާއި، ފުލުހުންގެ ބެލުމުގެ ދަށުގައި ތިބި މީހުން މަރުވުމާއި، ކުށުގެ ޝިކާރައަކަށް ވީ ފަރާތްތަކުގެ ޒާތީ މަޢުލޫމާތު ލީކުކުރުމާއި، 460 މިލިއަން ރުފިޔާގެ ބެސްޓިނެޓް ޑީލް ކޮރަޕްޝަނުގެ ތެރެއިން ކުރިއަށް ގެންދިޔަ ކަމުގެ ތުހުމަތެވެ. އެ ފަހަރު ޕީއެންސީގެ 63 މެންބަރުން ވިޕާ އެއްގޮތަށް އެ މައްސަލަ ބޭރުކޮށްލީ، އެމްޑީޕީގެ 11 މެންބަރުން ނޯ-ކޮންފިޑެންސަށް ވޯޓު ދީގެންނެވެ.

އެމްޑީޕީގެ ތެރެއިން އިޙްސާނަށް ރުހުން ދިނުމަށް ވޯޓު ދިނީ ޑރ. އަޙްމަދު ޝަމްހީދު، މުޙައްމަދު އިބްރާހީމް (ކުޑޫ)، ޢަބްދުﷲ ޣަފޫރު މޫސާ، މައުރޫފް ޒާކިރު، ޙުސައިން ސަމީރު، މުޙައްމަދު ނިޢުޝާދު، އަޙްމަދު ޝާކިރު، އަދި އަޙްމަދު ދީދީ އެވެ. މި ވޯޓާ ގުޅިގެން ސޯޝަލް މީޑިއާގައި ވަރުގަދަ ފާޑުކިޔުންތަކެއް ވަނީ އެ މެންބަރުންނަށް އަމާޒުވެފައެވެ.

ރައްޔިތުންގެ ސުވާލަކީ ސާދާ ސުވާލެކެވެ. އެމްޑީޕީން ބުނީ ޢަލީ އިޙްސާނަކީ ޤާނޫނާ ޚިލާފަށް ޢަމަލުކޮށް، ރައްޔިތުންގެ ޙައްޤުތަކަށް ނުރައްކާކުރާ، ޖިނާއީ ކުށުގެ ތުހުމަތުވާ ވަޒީރެކޭ އެވެ. ދެން 14 މަސް ފަހުން އެ ހުރިހާ ތުހުމަތެއް ދެމިއޮތް އިރު، ހަމަ އެ މީހާ ހަމަ އެ މަޤާމުގައި ބެހެއްޓުމަށް އޮޕޮޒިޝަން މެންބަރުން ރުހުން ދިނީ ކީއްވެ ހެއްޔެވެ.

ފުރަތަމައަށް، އެޕްރީލް ހަތަރެއްގެ ލޯކަލް ކައުންސިލް އިންތިޚާބުގައި ފަސް ސިޓީ މޭޔަރުކަމާއި ގިނަ ކައުންސިލް ގޮނޑިތައް ކާމިޔާބުކޮށް، ރެފެރެންޑަމް 69 އިންސައްތައިން ބަލިކުރީ އެމްޑީޕީ ކަމަށް ވާ އިރު، ވަޒީރުން ރިޖެކްޓް ކޮށްގެން "ޖެއްސުންކުރާ އޮޕޮޒިޝަން" ލޭބަލް ލިބެން ބޭނުންނުވީ ކަމަށް ވެދާނެއެވެ. 2028 ގެ ރިޔާސީ އިންތިޚާބަށް "ޒިންމާދާރު" އިމޭޖެއް ދެމެހެއްޓުމުގެ ސްޓްރެޓެޖީއެއް ކަމަށް ބެލިދާނެއެވެ. 

ދެވަނައަށް، ކެބިނެޓް ރީސްޓްރަކްޗަރ ގައި އިޙްސާންގެ ވުޒާރާއަށް ލޭބަރ ވެސް އިތުރުވީ ވީމާ، ވުޒާރާ ބޮޑުވީ ވަރަކަށް ފެއިލްވާނެ ފުރުޞަތު ބޮޑުވާނެ ކަމަށް ބަލައި "ފެން ދީފައި ކަތިލާ" ސްޓްރެޓެޖީ ކަމަށްވެސް ހަމަ ވެދާނެއެވެ. 

ތިންވަނައަށް، ޕީއެންސީ ތެރޭ ކެބިނެޓް ރީޝަފަލް އާ ގުޅިގެން ހިތްހަމަނުޖެހުން އުފެދިފައިވާ ދަނޑިވަޅެއްގައި، ބައެއް ވަޒީރުންނަށް ރުހުން ދީ ބައެއް ވަޒީރުން ރިޖެކްޓް ކޮށްގެން، ޕީއެންސީ ތެރޭ ބައިބައިވުން ފުންކުރުމުގެ ރޭވުމެއް ކަމުގައި ހަމަ ވެދާނެއެވެ. 

ޕީއެންސީގެ ސުޕަ މެޖޯރިޓީ 73 ގޮނޑީގެ ކުރިމަތީގައި އެމްޑީޕީގެ 12 ގޮނޑިން ކެބިނެޓް ބްލޮކް ކުރެވެން ނެތެވެ. ނަތީޖާ ބަދަލު ނުކުރެވޭ އިރު، ރިޖެކްޓް ކުރިޔަސް ސިޔާސީ ގޮތުން ލިބޭ ފައިދާއެއް ނެތް ކަމަށް ބައެއް މެންބަރުން ދެކުނީ ކަމަށް ބެލެވެއެވެ.

އެ ހުރިހާ ހިސާބެއް ޖެހިޔަސް، ރައްޔިތުންގެ ކުރިމަތީގައި ފެންނަ މަންޒަރު ސާފެވެ - އިއްޔެ "ނުރައްކާތެރި ވަޒީރު" ކަމަށް ތިމާ ބުނި މީހާއަށް މިއަދު ރުހުން ދީފިއެވެ. އެ ތަފާތު ރައްޔިތުންނަށް ކިޔައިދޭން ޖެހެނީ ހަމައެކަނި އެ އަށް މެންބަރުންނެވެ.