މި އަހަރުގެ ޙައްޖު މޫސުމުގައި ވެސް ދިވެހި ޙައްޖުވެރިން ފުރާނީ މައްކާރޫޓް އިނީޝިއޭޓިވްގެ އިންތިޒާމުތަކުގެ ތެރެއިން ކަމަށް އިސްލާމީ ވުޒާރާއިން ބުނެފިއެވެ.

އެ ވުޒާރާއިން އިއްޔެ މީޑިއާތަކާ ހިއްސާކުރި މެސެޖެއްގައި ބުނީ، މާތް ﷲ ގެ ހެޔޮ ރަޙުމަތްފުޅުން މި އަހަރު ވެސް ރާއްޖޭގެ ޙައްޖުވެރިން ފުރާނީ މައްކާރޫޓްގެ އިންތިޒާމުތަކުގެ ތެރެއިން ކަމަށެވެ. އަދި މިކަމުގެ ތައްޔާރީތަކަށް ސައުދީ އަރަބިއްޔާއިން ވަޑައިގަންނަވާ އެޑްވާންސް ޓީމް އަންނަ ހަފްތާގައި ރާއްޖެ އަންނާނެ ކަމަށް ވެސް ވުޒާރާއިން ބުނެއެވެ.

Advertisement

މައްކާރޫޓް އިނީޝިއޭޓިވްއަކީ ސައުދީ ވިޝަން 2030 ގެ ޕިލްގްރިމް އެކްސްޕީރިއެންސް ޕްރޮގްރާމުގެ ދަށުން ހިންގާ މަޝްރޫޢެކެވެ. މި މަޝްރޫޢުގެ ދަށުން ޙައްޖުވެރިންގެ ވީޒާ ޕްރޮސެސިން، އިމިގްރޭޝަން، ކަސްޓަމްސް އަދި ޞިއްޙީ ޕްރޮސީޖާތައް ވެލާނާ އިންޓަނޭޝަނަލް އެއާޕޯޓުގައި ފުރުމުގެ ކުރިން ނިންމައިލެވެއެވެ. އެހެންކަމުން ސައުދީ އަރަބިއްޔާއަށް ފައިބާ ގޮތަށް ޙައްޖުވެރިންނަށް ސީދާ ހޮޓަލަށް ދެވެއެވެ. އަދި ފޮށިތައް ވެސް ހޮޓަލަށް ގެންގޮސްދެއެވެ.

ރާއްޖެއަށް މައްކާރޫޓް ރަސްމީކޮށް ތަޢާރަފުކުރީ މިދިޔަ އަހަރުގެ ޙައްޖު މޫސުމުގައި، 2025 ވަނަ އަހަރުގެ މެއި 26 ގައެވެ. ރައީސް ޑރ. މުޙައްމަދު މުޢިއްޒު ވެލާނާ އިންޓަނޭޝަނަލް އެއާޕޯޓުގައި ބޭއްވި ރަސްމިއްޔާތެއްގައި އެ އިނީޝިއޭޓިވް އިފްތިތާޙުކޮށްދެއްވައި، ފުރަތަމަ ޙައްޖުވެރިޔާއަށް ޕާސްޕޯޓު ހަވާލުކުރެއްވިއެވެ. ރާއްޖެއަކީ މި އިނީޝިއޭޓިވް ލިބުނު އަށް ވަނަ ޤައުމެވެ. ރާއްޖޭގެ ކުރިން މި ފުރުޞަތު ލިބިފައި ވަނީ އިންޑޮނީޝިއާ، މެލޭޝިއާ، ޕާކިސްތާން، ބަންގްލަދޭޝް، ތުރުކީ، މޮރޮކޯ އަދި އައިވޮރީ ކޯސްޓަށެވެ.

މިދިޔަ އަހަރު މައްކާރޫޓުގެ ދަށުން ރާއްޖެއިން 1،000 ޙައްޖުވެރިން ފުރިއެވެ. އެ ފަހަރު ސައުދީ ސަރުކާރުން ވަނީ ރާއްޖެއަށް ޚާއްޞަ އިސްތިސްނާއެއް ދީ، ޢާންމު ޝަރުތުތައް ފުރިހަމަ ނުވި ނަމަވެސް އެ އިނީޝިއޭޓިވްގައި ބައިވެރިވުމުގެ ފުރުޞަތު ދީފައެވެ. އެ ފަހަރު ޙައްޖުވެރިންނަށް މައްކާއާއި މަދީނާއާ ދެމެދު ބަހުގެ ބަދަލުގައި ހައި ސްޕީޑް ރޭލުގައި ދަތުރުކުރެވޭ ގޮތް ހަމަޖެހުމުގެ އިތުރުން، ސައުދީ އަރަބިއްޔާގައި ދިވެހި ޙައްޖުވެރިންނަށް ޚާއްޞަ ޙައްޖު ކްލިނިކެއް ވެސް ޤާއިމުކުރެވުނެވެ.

މި އަހަރުގެ ޙައްޖު ފެށޭނެ ކަމަށް ލަފާކުރެވެނީ މެއި 25 ވަނަ ދުވަހު ކަމަށްވާއިރު، ޢަރަފާތު ދުވަހަކީ މެއި 26 ކަމަށް ބެލެވެއެވެ.