އެޕްރީލް 4 ވަނަ ދުވަހު ބޭއްވި ލޯކަލް ކައުންސިލް އިންތިޚާބާއި ފެންނަ ނުފެންނަ ވޯޓުގައި ތާރީޚީ ކާމިޔާބީއެއް ހޯދައި، އެ ކާމިޔާބީ ފާހަގަކުރުމަށް އާޓިފިޝަލް ބީޗުގައި އެމްޑީޕީން ބޭއްވި ޖަލްސާ ވެގެން ދިޔައީ ޕާޓީގެ ބާނީ، ކުރީގެ ރައީސް މުޙައްމަދު ނަޝީދާއި ކުރީގެ ޗެއާޕާސަން ފައްޔާޒު އިސްމާޢީލަށް ވާހަކަ ދެއްކެވުމުގެ ފުރުޞަތު ނުދީ، ޕާޓީ ތެރޭ އާ ބައިބައިވުމެއްގެ ހުޅު ރޯވި ރެއަކަށެވެ.

ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިޔުޑީސީ) ގެ އިންތިޚާބާއި، ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހަކު ބާއްވަން ފެނޭތޯ ނެގި ފެންނަ ނުފެންނަ ވޯޓު — މި ތިން ވޯޓު އެއްފަހަރާ ނެގި މި އިންތިޚާބުގައި 294,876 މީހުންގެ ތެރެއިން %73 ވޯޓު ލިއެވެ. މިއީ ލޯކަލް ކައުންސިލް އިންތިޚާބެއްގައި ރެކޯޑު ޓާންއައުޓެކެވެ.

އެމްޑީޕީން ވަނީ ފަސް ސިޓީގެ ފަސް މޭޔަރު ގޮނޑިއާއި ފަސް ސިޓީގެ ޑަބްލިޔުޑީސީ ރައީސް ގޮނޑި ކާމިޔާބުކޮށްފައެވެ. މާލޭ މޭޔަރު އާދަމް ޢާޒިމް %45.1 ވޯޓާ އެކު ދެވަނަ ދައުރެއް ކަށަވަރުކުރެއްވި އިރު، ވެރިކަންކުރާ ޕީއެންސީގެ ކެންޑިޑޭޓު މޫސާ ޢަލީ ޖަލީލަށް ލިބިވަޑައިގަތީ %30.4 ވޯޓެވެ. ޖުމުލަ ކައުންސިލް ގޮނޑިތަކުގެ ވަގުތީ ނަތީޖާއަށް ބަލާ އިރު ޕީއެންސީއަށް 220 ގޮނޑި، އެމްޑީޕީއަށް 207 ގޮނޑި ލިބުނު ނަމަވެސް، ސިޓީތަކުގެ ކައުންސިލް މެޖޯރިޓީ ބޮޑު ތަނުން ނެގީ އެމްޑީޕީންނެވެ. ފެންނަ ނުފެންނަ ވޯޓުގައި ގާތްގަނޑަކަށް %70 ރައްޔިތުން ބުނީ ނުފެންނަ ކަމަށެވެ.

ކާމިޔާބީ ފާހަގަކުރުމަށް އާޓިފިޝަލް ބީޗުގައި ބޭއްވި ޖަލްސާ އިންތިޒާމުކުރުމުގައި އެމްޑީޕީގެ ވަގުތީ ޗެއާޕާސަން ޢަބްދުލްޣަފޫރު މޫސާ (ގަޕޯ) ފުރަތަމަ ކުރީގެ ޗެއާޕާސަން ފައްޔާޒު އިސްމާޢީލަށް ގުޅުއްވައި، ޖަލްސާގައި ވާހަކަ ދެއްކެވުމަށް ދައުވަތު ދެއްވިއެވެ. ފައްޔާޒު ސްޕީޗް ތައްޔާރުކުރައްވައި، ބޯ ކޮށާލައްވައި ތައްޔާރުވެ ހުންނެވީ ޖަލްސާއަށެވެ. ނަމަވެސް ދެން ލިބިވަޑައިގަތީ ހީފުޅު ނުކުރައްވާ ޚަބަރެކެވެ — ރައީސް ނަޝީދަށް ފުރުޞަތު ނުދޭން ނިންމި ވާހަކައެވެ.

ފައްޔާޒު، އެމްޑީޕީ ވެރިން ތިއްބަވާ ގްރޫޕަކަށް ފޮނުއްވި މެސެޖުގައި ވިދާޅުވީ، ޗެއާ ކައިރީ ކުރިން ދެންނެވިން "އަޅުގަނޑަށް ފުރުޞަތު ދިނީމާ މައްސަލަ ޖެހޭނެ ނޫންހޭ" ކަމަށާއި، ޗެއާ ވިދާޅުވީ "ތިއީ މަންނާގެ ނިންމުމޭ، އައި ވިލް ޑިސައިޑް" ކަމަށެވެ. ފައްޔާޒު ވިދާޅުވީ، އެމަނިކުފާނަށް ފުރުޞަތު ނުދެއްވި ނަމަވެސް، ޕާޓީގެ އެކުވެރިކަން ވަރުގަދަ ކުރުމަށް ރައީސް ނަޝީދަށް ފުރުޞަތު ދެއްވުން ކުރިމަގަށް މުހިންމު ކަމަށް ފެނިވަޑައިގަންނަވާ ކަމަށެވެ. ފައްޔާޒު ރޭގެ ޖަލްސާއިން ފެނިފައެއް ނުވެއެވެ.

ރައީސް ނަޝީދު ގެންގުޅުއްވާ ނުރަސްމީ އެކްސް އެކައުންޓުން ކުރެއްވި ޕޯސްޓުގައި ވިދާޅުވީ ކުރު އެއް ޖުމުލައެކެވެ: "މި އުފާވެރި ރޭ، ވަރަށް ހިތްދަތިވެއްޖެ." މި ލަފުޒުތައް ކިޔައިލީމާ ސާފުވާ އެއްޗަކީ، ޕާޓީ އުފެއްދެވި ބާނީ، ޕާޓީގެ ތާރީޚީ ކާމިޔާބީ ރޭ ހުންނެވީ ކާމިޔާބީގެ އުފާވެރިކަމުން ބާކީ ކުރެވިފައި ކަމެވެ.

އެމްޑީޕީއަށް މި ކާމިޔާބީ ލިބުނީ ކީއްވެގެންތޯ ބެލީމާ ދެ ނަޒަރިއްޔާއެއް ފާޅުވެއެވެ. އެއް ބަޔަކު ދެކޭ ގޮތުގައި މި ކާމިޔާބީ އައީ ސީދާ ޕާޓީގެ މަސައްކަތުންނެވެ — ވަކި ފަރުދެއް ނޫނެވެ. އަނެއް ބަޔަކު ދެކެނީ ރައީސް ނަޝީދު 2025 ވަނަ އަހަރު ޑިމޮކްރެޓްސް ޕާޓީ އުވައިލައްވައި އެ ޕާޓީގެ ހުރިހާ މެންބަރުންނާ އެކު އެމްޑީޕީއާ އަލުން ގުޅިވަޑައިގަތުމަކީ ރަށްރަށުގައި ޕާޓީގެ ހަރަކާތްތެރިކަން އިއާދަވި މައިގަނޑު ސަބަބު ކަމަށެވެ.

ސޯޝަލް މީޑިއާ އެކްޓިވިސްޓް ޝަމްޢޫން ޖަލީލް (ލޫކަސް ޖަލީލް) ފާހަގަކުރި ގޮތުގައި، ވޯޓުލާން ގިނަ ބަޔަކު ނުކުތީ ފެންނަ ނުފެންނަ ވޯޓު އޮތީމާ ސަރުކާރަށް ނޫނެކޭ ބުނާށެވެ. ނުފެންނަ ކަމަށް ވޯޓު ދިން %70 ގެ ތެރޭގައި ހިމެނެނީ ހަމައެކަނި އެމްޑީޕީ މީހުން ނޫން ކަމަށާއި، ރައީސް ޔާމީނަށް ތާއީދުކުރާ މީހުންނާއި އެއްވެސް ޕާޓީއަކަށް ތާއީދު ނުކުރާ މީހުން ވެސް ހިމެނޭ ކަމަށް ލޫކަސް ބުންޏެވެ. ނަމަވެސް ކައުންސިލް ގޮނޑިތައް ނެގުމުގެ އެއް އަސްލަކީ ރައީސް ނަޝީދު ޑިމޮކްރެޓްސް އެކްޓިވިސްޓުން އެމްޑީޕީއާ އެއްކުރެއްވުން ކަމަށާއި، "ބައިބައިވުމެއްގައި ދެންވެސް ހޯދޭނެ ކާމިޔާބެއް ނެތް" ކަމަށް ޝަމްޢޫން ބުނެފައިވެއެވެ. 

ރައީސް ނަޝީދާއި ފައްޔާޒަށް ފުރުޞަތު ނުދިން ޚަބަރާ އެކު، ޕާޓީގެ އެކި ފެންވަރުގެ ބޭފުޅުންނާއި އާންމު މެންބަރުން ސޯޝަލް މީޑިއާގައި ހިތްހަމަނުޖެހުން ފާޅުކުރެއްވިއެވެ.

ރައީސް ޞާލިޙުގެ ސަރުކާރުގެ ޑިފެންސް މިނިސްޓަރު މާރިޔާ ދީދީ، އެކްސްގައި ގޮވައިލެއްވީ ދެ ރައީސުން — ނަޝީދާއި ޞާލިޙް — ސްޓޭޖުގައި އެކުގައި ވާހަކަދެއްކެވުމަށާއި، މި ކާމިޔާބީ ޤައުމީ ފެންވަރެއްގައި ފާހަގަކުރެއްވުމަށެވެ. ވަގުތީ ޗެއާ ގަޕޯގެ ކިބައިން "ވަރަށް އާދަބުވެރިކަމާ އެކު" އެ ފުރުޞަތު ހޯދައިދެއްވުމަށް މާރިޔާ އެދިވަޑައިގެންނެވިއެވެ.

ރައީސް ޞާލިޙުގެ ސަރުކާރުގައި ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) ގެ މެނޭޖިން ޑިރެކްޓަރުކަން ކުރެއްވި މޫކޭ ވިދާޅުވީ، "އުފާކުރަންވީ ރޭ ތިޔަ ގެއްލުވައިލީ ޕާޓީގެ އެންމެ މަތީ މަސްލަޙަތު" ކަމަށާއި، ވަގުތީ ޗެއާ ވަގުތުން އިސްތިއުފާ ދެއްވަން ޖެހޭ ކަމަށެވެ.

ލާމު އަތޮޅު ރައީސް އިސްމާޢީލް ޢަލީގެ ރާގު ހުރީ އިންޒާރެއްގެ ގޮތުގައެވެ: "ގަސްދުގައި އަންނި ބާކީ ކޮށްފިއްޔާ އަހަރުމެން ތިބޭނީ ބެންޗުގައި" ކަމަށާއި، "ނަޝީދު ނުލައި ކުރިއަށް ދާން އުޅެފިއްޔާ އަނެއްކާ ވެސް ވެއްޓޭނީ ޗަކަވަޅުގަނޑަކަށް" ކަމަށް ވިދާޅުވިއެވެ.

ސޯޝަލް މީޑިއާ އެކްޓިވިސްޓް ޝާއިފު (ޗާލީ) ވެސް ބުނީ ފައްޔާޒާއި ނަޝީދު "ބާކީ ކޮށްފައި ވާނެ އެއްވެސް މޮޅެއް ނޯންނާނެ" ކަމަށެވެ.

އެމްޑީޕީގެ ތާރީޚަށް ބަލާ އިރު، ޕާޓީގެ ބައިބައިވުމަކީ އައު ކަމެއް ނޫނެވެ. 2023 ވަނަ އަހަރު ރައީސް ނަޝީދާއި ރައީސް ޞާލިޙާ ދެމެދު އުފެދުނު ކޯޅުމުގައި ނަޝީދު ޕާޓީ ދޫކޮށްލައްވައި ޑިމޮކްރެޓްސް އުފެއްދެވީ "އެމްޑީޕީ ރޫޅައިލާނެ" ކަމަށް ވިދާޅުވަމުންނެވެ. އެ ބައިބައިވުން ވެގެން ދިޔައީ 2023 ގެ ރިޔާސީ އިންތިޚާބުގައި އެމްޑީޕީ ބަލިވުމުގެ މައިގަނޑު އެއް ސަބަބަށެވެ.

ޖޫން 2025 ގައި ނަޝީދާއި ޑިމޮކްރެޓުން އެނބުރި އެމްޑީޕީއާ ގުޅިވަޑައިގަތީ "ވަރުގަދަ އިދިކޮޅެއް އޮތުމަކީ ލޯކަލް ކައުންސިލް އިންތިޚާބު ކާމިޔާބުކޮށް، ޤައުމުގެ ކުރިމަގު ރަނގަޅުކުރެވޭނެ ގޮތް" ކަމަށް ދެކެވަޑައިގެންނެވެ. ޑިސެމްބަރު 2025 ގައި ނަޝީދާއި ޞާލިޙް ބައްދަލުކުރައްވައި، ދެ ބޭފުޅުން ވެސް ވިދާޅުވީ ދެ ބޭފުޅުންގެ ދެމެދުގައި ޙައްލުނުވާ ވަރުގެ ހިސާބަކަށް ދުވަހަކު ވެސް ނުދާ ކަމަށެވެ.

ނަމަވެސް ރޭގެ ޖަލްސާގެ ނިންމުން ދައްކައިދެނީ، އެ ޞުލްޙައިގެ ފޮޓޯގެ ފަހަތުގައި ވެސް ޕާޓީ ތެރޭގައި ބާރުވެރިކަމުގެ ކޯޅުމެއް ދެމިއޮތް ކަމެވެ. ކޮންމެ ނިންމުމެއް ނިންމި ފަރާތަކުން ނިންމި ނަމަވެސް، ޕާޓީ ބިނާކުރި ލީޑަރަށް ކާމިޔާބީގެ ރޭ ފުރުޞަތު ނުދިނުމަކީ "ފެން ކައްކާ ބޮލީގެ ޢިއްޒަތް" ތޯ، ނޫނީ ޕާޓީގެ އެތެރޭގެ ސިޔާސީ ހިސާބު ކިތާބެއްގެ ނަތީޖާ ތޯ — އެ ސުވާލުގެ ޖަވާބު ކުރިއަށް އޮތް ދުވަސްތަކުގައި ސާފުވާނެއެވެ.

2028 ގެ ރިޔާސީ އިންތިޚާބު ކުރިމަތީގައި އޮތް އިރު، ރޭގެ ޖަލްސާގެ ނިންމުމަކީ ޕާޓީ ހަމަ މަގަށް އެޅުވުމުގެ ބަދަލުގައި، ދާދި ފަހުން ބޭސް އެޅި ފާރުގަނޑު އަލުން ހުޅުވައިލި ނިންމުމެއް ކަމަށް ޕާޓީގެ ގިނަ ބައެއްގެ ޝުޢޫރުތައް ހެކިދެއެވެ.