މިދިޔަ އަހަރު އަސާސީ މުދަލުގެ އަގުތައް އެންމެ ބޮޑަށް އުފުލިފައި ވަނީ އަތޮޅުތެރޭގައި ކަމަށާއި، މާލެ އާ އަޅާބަލާއިރު އެ ފަރަގު ގާތްގަނޑަކަށް ތިން ގުނައަށް ބޮޑުކަން މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) ގެ ތަފާސް ހިސާބުތަކުން ދައްކައިފިއެވެ.

އެމްބީއެސް އިން މި މަހުގެ 8 ވަނަ ދުވަހު ޝާއިޢުކުރި 2025 ވަނަ އަހަރުގެ އަސާސީ މުދަލުގެ އަގުތަކުގެ މިންގަނޑު (އީސީޕީއައި) ދައްކާ ގޮތުން، އަތޮޅުތެރޭގެ އިންފްލޭޝަން ރޭޓް ހުރީ 7.58 އިންސައްތައިގައެވެ. އެއީ މާލޭގެ 2.74 އިންސައްތައިގެ ރޭޓާ އަޅާބަލާއިރު ގާތްގަނޑަކަށް ފަސް ޕޮއިންޓް މައްޗެވެ. މުޅި ރާއްޖެއަށް ބަލާއިރު މި ރޭޓް ހުރީ 3.77 އިންސައްތައިގައެވެ.

Advertisement

ކެއިން ބުއިމުގެ ބައިންވެސް މި ފަރަގު ފެންނަން އެބައޮތެވެ. ކާތަކެތީގެ ބައިން އަތޮޅުތެރޭގައި 7.21 އިންސައްތައިގެ އުފުލުމެއް އައިސްފައިވާ އިރު، މާލޭގައި މި ޢަދަދު ހުރީ 3.05 އިންސައްތައިގައެވެ. ޚާއްޞަކޮށް މަހުގެ ބާވަތްތައް 13.79 އިންސައްތަ އަދި އެއްގަމު މަހުގެ ބާވަތްތައް 5.74 އިންސައްތަ މައްޗަށް ގޮސްފައިވެއެވެ. އެއްގަމު މަހުގެ ބައިން އެކަނި ބެލި ނަމަވެސް އަތޮޅުތެރޭގައި 11.61 އިންސައްތައިގެ ބޮޑު އުފުލުމެއް ފެންނަ އިރު، މާލޭގައި ހުރީ 3.40 އިންސައްތައިގައެވެ.

ނަމަވެސް ހެޔޮ ބަދަލުތަކެއްވެސް ފެނެއެވެ. ގޭހާއި ތެލުގެ އަގުތައް ޖެހިޖެހިގެން ދެ ވަނަ އަހަރު ދަށަށް ގޮސް، 2025 ވަނަ އަހަރު 1.35 އިންސައްތައިގެ ދަށްވުމެއް ރެކޯޑް ކުރެވިފައިވެއެވެ. ހަމައެއާ އެކު ތަރުކާރީގެ ބާވަތްތަކުން 4.50 އިންސައްތައިގެ ދަށްވުމެއް ފެނިފައިވެއެވެ.

2024 ވަނަ އަހަރާ އަޅާބަލާއިރު މުޅި ރާއްޖޭގެ ޖުމުލަ އިންފްލޭޝަން ރޭޓް 5.22 އިންސައްތައިން 3.77 އިންސައްތައަށް ދަށްވެފައި ވީ ނަމަވެސް، އަތޮޅުތެރެ އާއި މާލޭގެ ދެމެދުގައި އޮތް ފަރަގު އެ ގޮތުގައި ދެމިއޮތުމަކީ ރާއްޖޭގެ ސަޕްލައި ޗެއިނާއި ލޮޖިސްޓިކް ޚަރަދުގެ ގޮންޖެހުން ރަމްޒުކޮށްދޭ ކަމެކެވެ. އެމްބީއެސް އިން މި ތަފާސް ހިސާބުތައް ތައްޔާރުކޮށްފައި ވަނީ ނޮވެންބަރު 2022 ގެ ބޭސް ޕީރިއަޑާ އަޅާބަލައިގެންނެވެ.