ރޯދަ މަހުގެ ދުވާލު، މީހުން ދިރިއުޅޭ ރަށްތަކުގައި ހާމަކަން ބޮޑު ގޮތުގައި އާންމުންގެ ކުރިމަތީގައި ކެއިންބުއިމުގެ ޚިދުމަތް ދިނުމަކީ ދީނީ ގޮތުން ހުއްދަވާނެ ކަމެއް ނޫން ކަމަށް މިއަދުގެ ހުކުރު ޚުޠުބާގައި ބުނެފިއެވެ.

"ނަޞްރާއި ކާމިޔާބުގެ މައްސަރު" މި މައުޟޫޢަށް ޚާއްޞަކޮށްފައިވާ ޚުޠުބާގައި ބުނީ، ރަމަޟާންމަހަކީ ހަމައެކަނި ކެއުމާއި ބުއިމުން ދުރުހެލިވުމުގެ މަހެއް ނޫން ކަމަށާއި، އެއީ ހަވާނަފުސާ ދެކޮޅަށް ޖިހާދުކޮށް ނަފުސު ތަހުޒީބުކުރުމުގެ މައްސަރެއް ކަމަށެވެ. އަދި ރޯދައިގެ ސަބަބުން ކެތްތެރިކަން އިތުރުވެ، ޝައިޠާނީ ގޮވުންތަކާއި ހަވާނަފުސުގެ މައްޗަށް ގަދަވެގަތުމުގެ ބާރު ލިބޭ ކަމަށް ޚުޠުބާގައި ބުނެފައިވެއެވެ.

Advertisement

ޚުޠުބާގައި ފާހަގަކުރި ގޮތުގައި، ރަމަޟާންމަހަކީ އިސްލާމީ ތާރީޚުގައި މުސްލިމުން އެންމެ ބޮޑެތި ނަޞްރާއި ކާމިޔާބީތައް ޙާޞިލުކުރި މައްސަރެވެ. އެ ގޮތުން ހިޖުރައިން ދެވަނަ އަހަރު ރަމަޟާންމަހު 17 ވަނަ ދުވަހު ހިނގި ބަދުރު ހަނގުރާމައާއި، ހިޖުރައިން އަށްވަނަ އަހަރުގެ ރަމަޟާންމަހުގެ 20 ވަނަ ދުވަހު މައްކާ ފަތަޙަކުރެވުނު ގޮތާއި، ހިޖުރައިން 92 ވަނަ އަހަރު އަންދަލުސް ފަތަޙަވުމާއި، ހިޖުރައިން 658 ވަނަ އަހަރު ތަތާރުންގެ މައްޗަށް މުސްލިމުން ހޯދި ކާމިޔާބީ ޚުޠުބާގައި ފާހަގަކޮށްފައިވެއެވެ.

ލޯކަލް ޓޫރިޒަމާ ގުޅޭ ގޮތުން ޚުޠުބާގައި ބުނީ، ފަތުރުވެރީންނަށް ކެއިންބުއިމުގެ އިންތިޒާމް ހަމަޖައްސަން ޖެހޭ ކަމަށާއި، ނަމަވެސް މީހުން ދިރިއުޅޭ ރަށްރަށުގައި އެ ކަމަށް ޚާއްޞަ އިންތިޒާމުތަކެއް ހަމަޖައްސަން ޖެހޭނެ ކަމަށެވެ. އަދި ފަތުރުވެރީން އާންމުންގެ ތެރެއަށް ނުކުމެ އުޅޭ އިރު އިޖުތިމާޢީ މިންގަނޑަށް ފެތޭ ގޮތަށް އުޅުމަށް އެ މީހުންނަށް އިރުޝާދު ދިނުމަށް، ފަތުރުވެރިކަމުގެ ޚިދުމަތްދޭ ފަރާތްތަކާއި ކައުންސިލުތަކަށް ޚުޠުބާގައި އިލްތިމާސްކޮށްފައިވެއެވެ. ބަރަހަނާ މަންޒަރުތަކާއި ނިވައިކަން ކުޑަ މަންޒަރުތަކުން ކުޑަކުދިންނާއި ޢާއިލާތަކަށް ކުރާ ނޭދެވޭ އަސަރުން ސަލާމަތްވާން މަސައްކަތްކުރަން ޖެހޭ ކަމަށް ވެސް ޚުޠުބާގައި ބުނެފައިވެއެވެ.

މީގެ އިތުރުން ޚުޠުބާގައި ވަނީ ރަމަޟާންމަހުގެ ފަހު ދިހައިގައި އަޅުކަމުގައި ހީވާގިވުމަށާއި ލައިލަތުލްޤަދުރި ހޯދުމަށް ގަދައަޅައި މަސައްކަތްކުރުމަށް ގޮވައިލައިފައެވެ. އަދި ޢީދު ނަމާދުގެ ކުރީން ފިޠުރު ޒަކާތް ނެރުމަށް އަވަސްވެގަތުމަށް ވެސް ޚުޠުބާގައި ހަނދާންކޮށްދީ، ފިޠުރު ޒަކާތުގެ މިންވަރަކީ ޢާންމުކޮށް ކައި އުޅޭ ގޮވާމުގެ ބާވަތުން ޞާޢެއް ކަމަށްވާ ގާތްގަނޑަކަށް ދެ ކިލޯ ހަތަރު ސަތޭކަ ގުރާމް ނުވަތަ އޭގެ އަގު ކަމަށް ބުނެފައިވެއެވެ.