1447 ވަނަ އަހަރުގެ ރަމަޟާން މަހާ ދިމާކޮށް، 7 އަހަރާއި 15 އަހަރާ ދެމެދުގެ ކުދިންނަށް ޚާއްޞަކޮށްގެން "ހުކުރު ޚުތުބާ ކުއިޒް" ގެ ނަމުގައި ޤައުމީ ފެންވަރުގެ ޑިޖިޓަލް މުބާރާތެއް މިނިސްޓްރީ އޮފް އިސްލާމިކް އެފެއާޒުން އިފްތިތާޙުކޮށްފިއެވެ.

އިސްލާމިކް މިނިސްޓްރީން ބުނީ މި މުބާރާތުގެ މައިގަނޑު މަޤްޞަދަކީ ކުޑަކުދިން ހުކުރު ޚުތުބާ ކިޔުމަށާއި އަޑުއެހުމަށް ޝައުޤުވެރިކުރުވައި، ޚުތުބާގައި ހިމެނޭ ދީނީ ފިލާވަޅުތައް ދަސްކޮށްދިނުން ކަމަށެވެ. އަދި އާއިލާތަކުގެ މެދުގައި ޚުތުބާގެ މަޢުލޫމާތުތަކާ މެދު މަޝްވަރާކުރުމުގެ ރޫޙު އާލާކުރުންވެސް މި ޕްރޮގްރާމުގެ ލަނޑުދަނޑިތަކުގެ ތެރޭގައި ހިމެނޭ ކަމަށް އެ މިނިސްޓްރީން ބުނެއެވެ.

Advertisement

މައިކްރޮސޮފްޓް ފޯމްސް މެދުވެރިކޮށް ކުރިއަށްގެންދާ މި ކުއިޒަކީ ދިވެހި ބަހުން ކުރިއަށްދާ "އޯޕަން ބުކް" ކުއިޒެއް ކަމަށް އިސްލާމިކް މިނިސްޓްރީން ބުނެއެވެ. އެގޮތުން ކުދިންނަށް ޖަވާބު ދިނުމަށް އެ މިނިސްޓްރީގެ ވެބްސައިޓުގައިވާ ޚުތުބާ ކިޔައި، ބެލެނިވެރިންގެ އެހީތެރިކަންވެސް ހޯދެވޭނެއެވެ. ކޮންމެ ހަފްތާއެއްގެ ބުދަ ދުވަހު ހެނދުނު 10:00 ގައި ކުއިޒް ހުޅުވައިލެވޭއިރު، ބުރާސްފަތި ދުވަހުގެ ރޭ 22:00 އާ ހަމައަށް ބައިވެރިވެވޭނެ ކަމަށް އެ މިނިސްޓްރީން ބުނެފައިވެއެވެ.

މުބާރާތް އިންސާފުވެރިކަމާ އެކު ކުރިއަށް ގެންދިއުމަށް ބައިވެރިން ތިން އުމުރުފުރައަކަށް ބަހައިލާފައިވާ ކަމަށް އިސްލާމިކް މިނިސްޓްރީން ބުނެއެވެ. އެއީ ގްރޫޕް އޭ (7-9 އަހަރު)، ގްރޫޕް ބީ (10-12 އަހަރު) އަދި ގްރޫޕް ސީ (13-15 އަހަރު) އެވެ. ވަނަވަނައަށް ހޮވޭނީ ހުރިހާ ބުރެއްގެ ޖުމްލަ ސްކޯގެ %90 އަށް ވުރެ މަތިން ހޯދާ ކުދިންގެ ތެރެއިން އެންމެ މަތީ މާކްސް ހޯދާ ކުދިންނެވެ. މާކްސް އެއްވަރު ވެއްޖެނަމަ ގުރުއަތުން ވަނަ ކަނޑައެޅޭނެ ކަމަށްވެސް އެ މިނިސްޓްރީން ބުނެއެވެ.

ކޮންމެ އުމުރުފުރައަކުންވެސް އެއްވަނައަށް ހޮވޭ ކުއްޖަކަށް ޢުމްރާ ދަތުރެއް ލިބޭއިރު، ދެވަނައަށް 1،000 ރުފިޔާ އަދި ތިންވަނައަށް 500 ރުފިޔާގެ ފައިސާގެ އިނާމު ދިނުމަށް ހަމަޖެހިފައިވާ ކަމަށް އިސްލާމިކް މިނިސްޓްރީން ބުނެއެވެ. ޖުމްލަ 3 ޢުމްރާ ދަތުރު ދެވޭނެއެވެ.

ކުއިޒުގައި ބައިވެރިވުމަށް އެ މިނިސްޓްރީން ޚާއްޞަ ވައިބާ ކޮމިއުނިޓީ ގްރޫޕެއް ހަދައިފައިވާއިރު، އެ ގްރޫޕް މެދުވެރިކޮށް ކޮންމެ ހުކުރު ޚުތުބާއެއްގެ ލިންކާއި ކުއިޒާ ބެހޭ އިތުރު މަޢުލޫމާތު ފޯރުކޮށްދެވޭނެ ކަމަށް އެ މިނިސްޓްރީން ބުނެއެވެ.