މާލެއަކީ ދުނިޔޭގެ ނިސްބަތުން އެންމެ ތޮއްޖެހިފައިވާ އެއް ރަށެވެ. ދެ ކޮޑި ކިލޯމީޓަރުގެ މި ކުޑަ ބިންކޮޅުގައި ދެ ލައްކައެއްހައި މީހުން ދިރިއުޅޭ އިރު، މަގުމަތީގެ ހާލަތަކީ ކޮންމެ ދުވަހަކު ކޮންމެ މީހަކުވެސް ތަޖުރިބާކުރާ ބޮޑު ތަކުލީފެކެވެ. ނަމަވެސް ހަގީގީ މައްސަލައަކީ ހަމައެކަނި ތޮއްޖެހުމެއް ނޫނެވެ — މައްސަލައަކީ އެކަކު އަނެކަކަށް ބަހައްޓާ ނޭއްގާނީ އުޅުމެވެ.

މަގެއް ބްލޮކްވާ ކޮންމެ ފަހަރަކު ފެންނަ މަންޒަރު ވަރަށް ދެރައެވެ. ބަލި މީހަކު އެމްބިއުލާންސަށް އަރުވާ ވަގުތެއް ކަމަށް ވިޔަސް، ފިހާރައަކަށް މުދާ ބާލާ ވަގުތެއް ކަމަށް ވިޔަސް، އެންމެ މިނެޓެއް ވެސް މަޑުކޮށްލާކަށް ގިނަ ބަޔަކު ތައްޔާރެއް ނޫނެވެ. ސައިކަލުގެ ބަރުގޮނުން އެ ނެރޭ އަޑު ހުއްޓައެއް ނުލައެވެ. ހީވާ ކަހަލައެވެ — ބަރުގޮނު އެޅީމައި ކުރިމަތީ ހުރި ހުރަސްތައް ވައިގެ ތެރެއަށް ގެއްލިދާނެއެވެ. ނޫނީ މަގު އިސާހިތަކު ފުޅާވެދާނެއެވެ. 

Advertisement

ޓްރެފިކް ލައިޓެއް ނެތް މި ފުރަމާލޭގެ މަގުމަތީގެ ނިޒާމު ހިނގަނީ "ތިމާ ފުރަތަމަ" މި އުސޫލުންނެވެ. ދެ ކޮޅަށް ދުއްވޭ މަގުތަކުގައި ވެސް ދާން ޖެހޭ ފަޅި ނޫން ފަޅިން ދުއްވުމަކީ އާންމު ކަމެކެވެ. ދެ ފަރާތުން ދެ ސައިކަލު ކުރިމަތިލާ އިރު، ފަހަތަށް ޖެހޭނެ މީހަކު ނުހުރެއެވެ. ދެ މީހުން ވެސް ގަބޫލުކުރާ ގޮތުގައި ޖެހޭނީ އަނެކާ ފަހަތަށް ޖެހޭށެވެ.

އެންމެ ހިތާމަ ހުރި ކަމަކީ މި ހުރިހާ ކަމެއް ވެފައި މިއޮންނަނީ "އާދައިގެ ކަމަކަށް" ވެފައި ކަމެވެ. ކުޑަ ދަރިން ގޮވައިގެން މަގު ހުރަސްކުރާ މައިންބަފައިންނާ ދިމާއަށް މަޑު ނުކޮށް ބާރު ސްޕީޑުގައި ދުއްވާފައި ދިއުމަކީ ހެއްވާ ކަމެއް ނޫނެވެ. އެމްބިއުލާންސެއް އައީމައި މަގު ދޫކޮށްލުމުގެ ބަދަލުގައި ބަރުގޮނު އެޅުމަކީ ލަދު ގަންނަން ޖެހޭ ކަމެކެވެ. ނަމަވެސް ލަދެއް ވެސް ނުގަނެއެވެ.

މިއީ ޓްރެފިކް ފުލުހުން އިތުރުކުރުމުން ނުވަތަ ޖޫރިމަނާ ބޮޑުކުރުމުން ހައްލުވާނެ ކަންކަމެއް ނޫނެވެ. މިއީ ހަމަ ސީދާ އަޚުލާޤީ މައްސަލައެކެވެ. އެކަކު އަނެކަކަށް ކެތްތެރިވެލުމެވެ. ކުޑަ ވަގުތުކޮޅެއް މަޑުކޮށްލެވުމެވެ. ދާން ޖެހޭ ފަޅިން ދުއްވުމެވެ. ފަހަރެއްގައި ޖެހިގެން އޮތް ފަހަރު ތިމާގެ ބައްޕަ ނުވަތަ މަންމަ އެ އެމްބިއުލާންސްގައި އޮވެދާނެ ކަމެވެ. އެ ވިސްނުން ކޮންމެ ދުވަހަކު ބަރުގޮނުގައި އަތް ޖައްސާލުމުގެ ކުރިން ހިތަށް ގެނެވިއްޖެ ނަމަ، މާލޭގެ މި ހަނި މަގުތައް ވެސް ތަންކޮޅެއް ހިތް ފަސޭހަ ވެދާނެއެވެ.