ފައިނޭންޝަލް ލިޓަރަސީ ނުވަތަ މާލީ ކަންކަން ދެނެގަތުމުގެ ހުނަރަކީ މިއަދުގެ ދުނިޔޭގައި ކޮންމެ މީހަކަށް ވެސް ކޮންމެހެން ބޭނުންވާ އެއް ހުނަރެވެ. ފައިސާ ހޯދާނެ ގޮތް ގިނަ މީހުންނަށް އެނގުނު ނަމަވެސް، ލިބޭ ފައިސާ ރަނގަޅަށް ބެލެހެއްޓުމާއި، ރައްކާކުރުމާއި، އިންވެސްޓް ކުރުމުގެ އިލްމު ލިބިފައި ހުންނަނީ ވަރަށް މަދު ބަޔަކަށެވެ.

ފައިނޭންޝަލް ލިޓަރަސީއަކީ ފައިސާއާ ގުޅޭ ކަންކަމުގައި ރަނގަޅު ނިންމުންތައް ނިންމުމަށް ބޭނުންވާ އިލްމާއި ހުނަރެވެ. މީގެ ތެރޭގައި ބަޖެޓް ހެދުމާއި، ދަރަނި މެނޭޖްކުރުމާއި، ފައިސާ ރައްކާކުރުމާއި، އިންވެސްޓް ކުރުމުގެ އަސާސީ ކަންކަން ހިމެނެއެވެ. ހަމައެކަނި ހިސާބު ޖެހުމެއް ނޫނެވެ. ދިރިއުޅުމުގައި ދިމާވާ މާލީ ހާލަތްތަކުގައި ބުއްދިވެރި ގޮތް ޚިޔާރުކުރަން އެނގުމެވެ.

ދިވެހިރާއްޖެ ފަދަ ކުޑަ އިގުތިސާދެއްގައި ދިރިއުޅޭ ބަޔަކަށް މާލީ ހޭލުންތެރިކަން ވަކިން މުހިންމެވެ. ގިނަ ޒުވާނުން ވަޒީފާއަށް ނުކުންނައިރު ކްރެޑިޓް ކާޑާއި ލޯނުތަކުގެ ދަންތުރައިގައި ޖެހި، ދަރަނީގެ ބުރައިން ސަލާމަތް ނުވެވޭ ހާލަތަށް ދެއެވެ. މުސާރައިގެ ބޮޑު ބައެއް ބޭނުން ނޫން ޚަރަދުތަކަށް ހޭދަވެ، މަސް ނިމޭއިރު އެއްވެސް އެއްޗެއް ރައްކާ ނުކުރެވޭ ގޮތް ދިމާވެއެވެ. މިކަމުގެ މައިގަނޑު ސަބަބަކީ ފައިސާ ބެލެހެއްޓުމުގެ ހުނަރު ނެތުމެވެ.

ފުރަތަމައީ، ކޮންމެ މަހަކު ލިބޭ އެއްޗަކާއި ޚަރަދުވާ އެއްޗެއް ލިޔެ ބެލެހެއްޓުމެވެ. ބަޖެޓެއް ހެދުމަކީ ފައިސާ ކޮންޓްރޯލް ކުރުމުގެ ފުރަތަމަ ފިޔަވަޅެވެ. ދެވަނައީ، ކިތަންމެ ކުޑަ އެއްޗެއް ނަމަވެސް ކޮންމެ މަހަކު ރައްކާކުރުމެވެ. މުސާރައިގެ %10 ނަމަވެސް އެއްފަރާތް ކުރުމަކީ ބޮޑު ތަފާތެއް ގެނެސްދޭނެ ކަމެކެވެ. ތިންވަނައީ، ބޭކާރު ދަރަނިން ދުރުހެލިވުމެވެ. ލޯނު ނެގުމުގެ ކުރީން އެ ދެއްކޭނެ ގޮތް ރަނގަޅަށް ވިސްނާލުން ބުއްދިވެރިއެވެ. ހަތަރުވަނައީ، ކުއްލި ހާލަތްތަކަށް ތައްޔާރުވެ، މަދުވެގެން ތިން މަހުގެ ޚަރަދަށް ވާވަރު ރައްކާކުރުމެވެ. ފަސްވަނައީ، އިންވެސްޓް ކުރުމާ ބެހޭ އަސާސީ މައުލޫމާތު ހޯދައި، ފައިސާ އިތުރުކުރެވޭނެ ގޮތްތައް ދެނެގަތުމެވެ.

ފައިނޭންޝަލް ލިޓަރަސީއަކީ ސްކޫލް ފޮތެއްގައި ލިޔެފައި އޮންނަ ފިލާވަޅެއް ނޫނެވެ. އެއީ ދިރިއުޅުމުގެ ކޮންމެ ދުވަހަކު ބޭނުންކުރާ ހުނަރެކެވެ. މިއަދު ފައިސާ މެނޭޖް ކުރަން ދަސްކުރާ މީހާއަކީ މާދަމާ މާލީ ހާސްކަމެއް ނެތި ހަމަޖެހިލައިގެން ދިރިއުޅެވޭނެ މީހެކެވެ. ބޭނުންވަނީ ފެށުމެކެވެ.