އިންޑިއާގެ ކަލްކައްތާގައި ފުޓްބޯޅަ ކުޅުންތެރިޔާ ލަޔޮނަލް މެސީ ދައްކާލަން ބޭއްވި ހަރަކާތެއްގައި މެސީ ދައްކާލީ ނަމަކަށްކަމުގައިބުނެ ސަޕޯޓަރުން ރުޅިގަދަވެ ސްޓޭޑިއަމް ސުންނާފަތިކޮށްލައިފިއެވެ.

މިކަން ހިނގީ އިއްޔެގެ ހަވީރުގެ ވަގުތެއްގައެވެ.

Advertisement

ކޮލްކައްތާގެ ސޯލްޓް ސްޓޭޑިއަމްގައި ރާއްޖޭ ގަޑިން ބަލަނީނަމަ އިއްޔެ ހަވީރު 05:00 ހާއިރު ފަށަން އޮތް އިވެންޓް ފެށުނީވެސް އިރު އޮއްސި 07:15 ހާއިރުގައެވެ. މެސީ އެ ސްޓޭޑއަމަށް ވަދެ ހައި ސެކިއުރިޓީއާއެކު ސަޕޯޓަރުންނަށް ހަނާ އަޅާލައި ސްޓޭޑިއަމްގެ އެތެރޭގައި ވަށާ 15 ވަރަކަށް މިނެޓު ހިނގާލިއެވެ.

ސަޕޯޓަރުން ރުޅިގަދަވީ މަތީ ބަރިތަކުގައި ތިބި ފަރާތްތަކަށް އެއްވެސް ވަރަކަށް މެސީ ނުފެނުމުންނާއި މެސީ ސަޕޯޓަރުންނާ ވާހަކަދައްކާލައި ބައްދަލުކޮށްނުލުމުންނެވެ. އެފަދަ އެއްވެސް ހަރަކާތެއް ނެތުމުންނެވެ.

3،800 އާއި 4،500 ރުޕީސް އާއި ދެމެދުގެ އަގެއްގައި ޓިކެޓު ވިއްކައިގެން އެތައް ހާސް ބަޔަކު އެ ސްޓޭޑިއަމަށް ވެއްދި އިރު ސަޕޯޓަރުން އައި ރުޅީގައި ސްޓޭޑިއަމްގެ ގޮނޑިތައް ނައްޓާލައި ސްޓޭޑިއަމަށް ބޮޑެތި ގެއްލުންތަކެއް ދީފައިވެއެވެ.

ފަހުން މައްސަލަ އިތުރަށް ބެލުމަށް އިންޑިއާގެ ފުލުހުން ވަނީ އިވެންޓު އޮގަނައިޒްކުރި ފަރާތް ފުލުހަށް ހާޒިރުކޮށް ސުވާލުކޮށްފައެވެ.