މޯލްޑިވް ގޭސްގެ ކުރީގެ މެނޭޖިން ޑިރެކްޓަރު އަބްދުﷲ މަޢުމޫނުގެ މައްޗަށް 12 އަހަރާއި ނުވަ މަހާއި 18 ދުވަހުގެ ޖަލު ހުކުމެއް މިއަދު ކްރިމިނަލް ކޯޓުން އިއްވައިފިއެވެ.

އަބްދުﷲ މައުމޫން (މަޝްހޫރު ނަމުން ނަމަ ގޭސް މާނު)ގެ މައްޗަށް މި ހުކުމް މިރޭ އިއްވާފައިވަނީ އެމްޑީ ކަމުގައި ހުރި އިރު 2016 ވަނަ އަހަރު ރިޝްވަތުގެ ގޮތުގައި ފައިސާ ނެގި ކަމަށް ބުނާ މައްސަލަތަކާއި ގުޅިގެން އުފުލާފައިވާ ދައުވާތަކުގެ ތެރެއިން ދެ ދައުވާއެއްގައެވެ.

Advertisement

ކޮންމެ ދައުވާއަކަށް ހަ އަހަރާއި ހަތަރު މަހާއި 24 ދުވަހުގެ ޖަލު ހުކުމެއް މިއަދު އިއްވާފައިވާއިރު އިތުރު ފަސް ދައުވާއެއް އަދި ބާކީ އެބަ އޮތެވެ.

ރައީސް އަބްދުﷲ ޔާމީންގެ ވެރިކަމުގައި ގޭސް ކުންފުނީގެ އެމްޑީގެ ގޮތުގައި ހުންނެވި މާނުގެ ކޮރަޕްޝަންގެ މައްސަލަތައް އޭސީސީއިން ބަލަން ފެށުމުން އޭނާ އޭރު ރާއްޖެ ދޫކޮށް ދިޔައެވެ. ނަމަވެސް ފަހުން އެނބުރި އައުމުން ފުރުން މަނާކޮށް ޕާސްޕޯޓު ހިފެހެއްޓިއެވެ.

މާނުގެ މައްޗަށް 12 އަހަރުގެ ޖަލު ހުކުމެއް މިރޭ އިއްވާފައިވާއިރު ފެނަކައިގެ ކުރީގެ އެމްޑީގެ މައްޗަށް ހަތަރު އަހަރުގެ ޖަލު ހުކުމެއް އިއްޔެ އިއްވާފައިވެއެވެ.