މަސްތުވާތަކެތީގެ ބޮޑެއް ކަމަށް ފުލުހުން ތުހުމަތުކުރާ ގއ. ވިލިނގިލީ، ވައިޓްހައުސް، އުމުރުން 47 އަހަރުގެ ޝަހީބް އިބްރާހީމް އަމިއްލައަށް ފުލުހަށް ހާޒިރުވުމުން ހައްޔަރުކޮށްފިއެވެ.

މީޑިއާތަކަށް މަޢުލޫމާތުދެމުން ރޭގައި ފުލުހުން ބުނެފައިވަނީ ބަންދުގައި ބަހައްޓައިގެން ކޯޓަށް ހާޒިރުކުރުމަށް ހޯދަމުންދިޔަ ޝަހީބް ރޭގައި އަމިއްލައަށް ފުލުހުންގެ މައި މަރުކަޒަށް ހާޒިރުވުމުން ހައްޔަރުކޮށްފައިވާކަމަށެވެ.

Advertisement

ޝަހީބު އަމިއްލައަށް ފުލުސް އޮފީހަށް ހާޒިރުވެފައިވާއިރު ކޯޓު އަމުރެއްގެ ދަށުން އޭނާގެ އަންހެނުން، މ. ކަރާދުބުރިގެ، އާއިޝަތު ވަހީދާ ހައްޔަރުކުރިއެވެ. ޝަހީބުގެ އަންހެނުން ހައްޔަރުކުރި ކޯޓު އަމުރުގައި ބުނެފައިވަނީ އޮގަސްޓް 12، 2020 ގައި އިތުރު ބަޔަކާ ގުޅިގެން ކަނޑުމަގުން ރާއްޖެއަށް މަސްތުވާތަކެތި އެތެރެކޮށް އެތަކެތި ޓްރެފިކް ކުރުމުގެ މައްސަލައިގާ ބަންދުގައި ބަހައްޓައިގެން ކޯޓަށް ހާޒިރު ކުރުމަށް ފުލުހުން ހޯދަމުންދާ ޝަހީބު، ފުލުހުންނަށް ފިލައިގެން އުޅޭ ކަމަށާއި އޭނާ ފިލައިގެން އުޅެން އޭނާގެ އަންހެނުން އެހީތެރިވާކަމަށް ތުހުމަތު ކުރެވޭ ކަމަށެވެ.

ޝަރީއަތް ނިމެންދެން ބަންދުގައި ހުރި ޝަހީބު 2023 ވަނަ އަހަރުގެ ޖުލައި މަހުގެ ތެރޭގައި ދޫކޮށްލި ނަމަވެސް ރާއްޖެއިން ބޭރަށް ދިއުން އޮތީ މަނާކޮށްފައެވެ.