ކުރިއަށް އޮތް 20 އަހަރު ދުވަހުގެ ޤައުމީ ތަރައްޤީގެ ޕްލޭން އެކުލަވައިލުމުގެ ޢަމަލީ މަސައްކަތްކުރާ ޓީމު ރައްޔިތުންގެ ޚިޔާލު ހޯދުމަށް މީހުން ދިރިއުޅޭ ރަށްރަށަށް ކުރާ ދަތުރުތައް މާދަމާ ފަށާނެއެވެ.

މި ޓީމު އެންމެ ފުރަތަމަ ދިއުމަށް ކަނޑައަޅާފައި ވަނީ މާލެ އަތޮޅު ގުރައިދޫއަށެވެ. އެގޮތުން، "ވިލުންތެރި ރާއްޖެ"ގެ ޓީމު މާދަމާ ގުރައިދޫއަށް ޒިޔާރަތްކޮށް ގުރައިދޫގެ ކައުންސިލާއި ރައްޔިތުންނާ ބައްދަލުކުރުމަށް ވަނީ ތާވަލުކޮށްފައެވެ. އަދި ދިވެހިރާއްޖޭގެ ކުރިމަގާއި, ދިވެހިރާއްޖޭގެ އިޖުތިމާޢީ އަދި އިޤްތިޞާދީ ތަރައްޤީއާއި ތަސައްވުރާ ބެހޭ ގޮތުން ރައްޔިތުންގެ ޚިޔާލު ހުރި ގޮތް މި ޓީމުން ހޯދާނެއެވެ.

Advertisement

ރާޢްޖޭގެ ތަރައްޤީގެ ޕްލޭންގައި ހިމެނުމަށް ބޭނުންވާ ރައްޔިތުންގެ ޚިޔާލު ހޯދުމަށް ކުރަން ފަށާ މި ދަތުރުތަކުގައި ރާއްޖޭގެ މީހުން ދިރިއުޅޭ ހުރިހާ ރަށަކަށް ވިލުންތެރި ރާއްޖެ ޓީމުތަކުން ދަތުރުކުރާނެއެވެ. މި ދަތުރުތަކުގައި "ވިލުންތެރިރާޢްޖެ ޓީމު"ން ބާޢްވާ ބައްދަލުކުރުންތަކުގައި ބައިވެރިވެ މަޝްވަރާތަކުގައި ބައިވެރިވުމަށް ރަށު ކައުންސިލްތަކަށާއި، އަތޮޅު ކައުންސިލްތަކަށާއި, ރަށުގައި ޤާއިމްކޮށްފައި ހުންނަ ސަރުކާރުގެ ހުރިހައި މުއައްސަސާތަކަށާއި، އާންމު ޖަމްޢިއްޔާ ޖަމާޢަތްތަކާއި ވިޔަފާރިތަކަށާއި އަމިއްލަ ފަރުދުންނަށް ވެސް ފުރުޞަތު އޮންނާނެއެވެ.

"ވިލުންތެރި ރާއްޖެ 2045" ގެ ނަމުގައި 2025 އިން 2045 އަށް އަމަލު ކުރަން ރާވާ 20 އަހަރު ދުވަހުގެ ގައުމީ ތަރައްގީގެ މި ޕްލޭނަކީ އެކުލަވާލުމުގައި ރާއްޖޭގެ ވީހާ ގިނަ ފަރާތްތަކެއްގެ ޚިޔާލާއި ބައިވެރިވުން ހޯދުމަށް ކުރަމުންގެންދާ މަސައްކަތްތަކުގެ ތެރެއިން އެއް މަސައްކަތެވެ. މި ޕްލޭނަކީ 2040 ވަނަ އަހަރު އަންނަ އިރު, ދިވެހިރާއްޖެއަކީ ތަރައްގީވެފައިވާ ޤައުމަކަށް ހެދުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކުރައްވަމުންގެންދަވާ މުހިންމު މަސައްކަތްޕުޅެކެވެ.

20 އަހަރު ދުވަހުގެ ޤައުމީ ތަރައްގީގެ ޕްލޭނެއް އެކުލަވާލުމުގެ ބޭނުމަކީ  ޤައުމުގައި ކުރެވޭ އެންމެހައި ކަންކަމަކީ ދުރު ރާސްތާއަށް ވިސްނައިގެން، ލިބެންހުރި ވަސީލަތްތަކުގެ ބޭނުން, ދެމެހެއްޓެނިވި ގޮތެއްގައި ހިފައިގެން، ޤައުމަށާއި ރައްޔިތުންނަށް އެންމެ ފައިދާކުރަނިވި ގޮތެއްގައި ކަންކަން ކުރަން މަގުފަހިކުރުމެވެ. އަދި ދުނިޔޭގެ އިޤްތިޞާދަށާއި ޓެކްނޮލޮޖީއަށް އަންނަ ބަދަލުތަކާއި އަދި ވަކިން ޚާއްސަކޮށް މޫސުމަށް އަންނަ ބަދަލުތަކާ ކުރިމަތިލުމާއި އެކަންކަމުން އަރައިގަނެވޭނެ ޤާބިލުކަން ހުރި ވިލުންތެރި ރާއްޖެ އެއް ބިނާކުރުމެވެ.               

މީގެއިތުރުން  ދުނިޔޭގެ އިޤުތިޞާދީ އަދި ސިޔާސީ ވާދަވެރިކަމުގެ ތެރޭގައި ދިވެހިން ސާބިތުކަންމަތީ ދެމިތިބެ ޤައުމުދެކެ ލޯބިވާ ޤައުމީވަންތަ އުފާފާގަތި ރާއްޖެއެއް ބިނާކުރުމެވެ. އަދި ވޭތުވެދިޔަ ތާންގައި ތަރައްޤީއަށްޓަކައި ރާއްޖޭން ކޮށްފައިވާ މަސައްކަތްތަކުން ލިބެން ހުރި މަޢުލޫމާތުގެ އަލީގައި ދިވެހިރާއްޖޭގެ ކުރިމަގު ބިނާކުރުމެވެ.