ފާއިތުވި ޖުލައި މަހު ރާއްޖެއިން މުދާ އެކްސްޕޯޓްކުރި މިންވަރު 222 އިންސައްތަ އިތުރުވެފައިވާކަމުގައި ކަސްޓަމްސްއިން ބުނެފިއެވެ.

މިގޮތުން، 2024 ވަނަ އަހަރުގެ ޖުލައި މަހު ދިވެހިރާއްޖެއިން 65 މިލިއަން ރުފިޔާގެ މުދާ އެކްސްޕޯޓް ކޮށްފައިވާއިރު، މި އަހަރުގެ ޖުލައި މަހު މި ޢަދަދުވަނީ 210 މިލިއަން ރުފިޔާ އަށް އިތުރުވެފައިވާކަން ކަސްޓަމްސްއިން ފާހަގަކޮށްފައިވެއެވެ.

Advertisement

މީގެ އިތުރުން މިއަހަރުގެ ފުރަތަމަ ހަތް މަސްދުވަހުގެ ތެރޭގައި ރާއްޖެއިން އެކްސްޕޯޓް ކުރެވުނު މުދާ ފާއިތުވި އަހަރުގެ ފުރަތަމަ ހަތް މަސްދުވަހާ އަޅާބަލާއިރު ވަނީ 52 އިންސައްތަ އިތުރުވެފައިވާކަމާއި މިގޮތުން، 2024 ވަނަ އަހަރުގެ ފުރަތަމަ ހަތް މަސްދުވަހު ދިވެހިރާއްޖެއިން 945 މިލިއަން ރުފިޔާގެ މުދާ އެކްސްޕޯޓް ކޮށްފައިވާއިރު، މި އަހަރުގެ ފުރަތަމަ ހަތް މަސްދުވަހު މި ޢަދަދު 1.4 ބިލިއަން ރުފިޔާ އަށް އިތުރުވެފައިވާކަމަށް ބުނެފައިވެއެވެ.

ކަސްޓަމްސްއިން ފާހަގަކޮށްފައިވާގޮތުގައި ދިވެހިރާއްޖޭގެ އެކްސްޕޯޓް މައިގަނޑު ގޮތެއްގައި ބިނާވެފައިވަނީ މަހުގެ  ބާވަތްތަކުގެ މައްޗަށްކަމަށްވާއިރު، ވޭތުވެދިޔަ ހަތް މަސްދުވަހުގެތެރޭގައިވެސް ރާއްޖެއިން އެންމެ ގިނައިން އެކްސްޕޯޓްކޮށްފައިވަނީ ގަނޑުކުރި / ފިނިކުރި ކަނޑުމަހާއި، މަހުން އުފައްދާފައިވާ ތަފާތު ބާވަތްތަކެވެ. އަދި މިތަކެތި އެންމެ ގިނައިން އެކްސްޕޯޓްކޮށްފައިވާ ޤައުމުތަކަކީ ތައިލެންޑް އަދި އިނގިރޭސިވިލާތް ކަންވެސް ފާހަގަކޮށްފައިވެއެވެ. އެގޮތުން ތައިލޭންޑް 809.44 މިލިޔަން ރުފިޔާގެ މަހުގެ އުފެއްދުންތައް އަދި އިނގިރޭސިވިލާތަށް 252.46 މިލިޔަން ރުފިޔާގެ މަހުގެ އުފެއްދުން އެކްސްޕޯޓްކޮށްފައިވާކަން ފާހަގަކޮށްފައިވެއެވެ.