މަސްވެރިންގެ ހައްގުގައި އީޔޫއާ ގުޅުމުގެ މަޝްވަރާއަށް އައިސްލޭންޑު ރައްޔިތުން ނޫނެކޭ ބުނެފި

ޔޫރަޕިއަން ޔޫނިއަން (އީޔޫ) އާ ގުޅުމާ ބެހޭ ގޮތުން 13 އަހަރު ކުރިން ހުއްޓައިލި މަޝްވަރާތައް އަލުން ފެށުމާ ދެކޮޅަށް އައިސްލެންޑުގެ ރައްޔިތުންގެ ފެންނަ ނުފެންނަ ވޯޓެއްގައި ނޫނެކޭ ބުނެފިއެވެ.

އެ ޤައުމުގެ ޢާންމު ބްރޯޑްކާސްޓަރު އާރުޔޫވީ އިން ރިޕޯޓުކޮށްފައިވާ ގޮތުގައި ވޯޓުލީ 225,031 މީހުންގެ ތެރެއިން 52.8 އިންސައްތަ މީހުން ސަރުކާރުގެ ހުށަހެޅުމާ ދެކޮޅު ހެދި އިރު 47.2 އިންސައްތަ މީހުން ތާއީދުކޮށްފައިވެއެވެ. ދެ ފަރާތުގެ ފަރަގަކީ ގާތްގަނޑަކަށް 12,600 ވޯޓެވެ. ވޯޓުލުމުގެ ޙައްޤު ލިބިފައިވާ 270,000 އެއްހާ މީހުންގެ ތެރެއިން 82.5 އިންސައްތަ މީހުން ވޯޓުލާފައިވާ ކަމަށް އާރުޔޫވީ އިން ބުނެފައިވެއެވެ. މިއީ 2009 ވަނަ އަހަރަށްފަހު އައިސްލެންޑުގެ އެއްވެސް އިންތިޚާބެއްގައި ރެކޯޑުކުރެވުނު އެންމެ މަތީ ޓާންއައުޓެވެ.

ބޮޑުވަޒީރު ކްރިސްޓްރޫން ފްރޮސްޓަޑޯއްޓީރުގެ ސެންޓާ-ލެފްޓް ސަރުކާރުން 2027 ވަނަ އަހަރުގެ ކުރިން ރެފެރެންޑަމް ބާއްވަން ވަޢުދުވެފައި އޮތް ނަމަވެސް ބައިނަލްއަޤުވާމީ ނުތަނަވަސްކަމާ ގުޅިގެން އެ ތާރީޚު އަވަސްކުރީއެވެ. އެމެރިކާގެ ރައީސް ޑޮނަލްޑް ޓްރަމްޕް ގްރީންލެންޑާ ދޭތެރޭ ކޮށްފައިވާ ބިރުދެއްކުންތައް އެ ނުތަނަވަސްކަމުގެ ތެރޭގައި ހިމެނެއެވެ. ނަމަވެސް ގާތްގަނޑަކަށް 400,000 މީހުން ދިރިއުޅޭ މި ޖަޒީރާ ޤައުމުގައި ބަހުސް ބޮޑަށް މެރުކަޒުވީ ސަލާމަތީ ކަންބޮޑުވުންތަކަށް ވުރެ ބޮޑަށް މަސްވެރިކަމުގެ ސިނާޢަތާ ގުޅޭ މައްސަލަތަކާ މެދުގައެވެ.

މަސްވެރިކަމާއި ކަނޑުގެ ސިނާޢަތުން އައިސްލެންޑުގެ ބޭރަށް ވިއްކާ ތަކެތީގެ ގާތްގަނޑަކަށް 40 އިންސައްތަ ހިއްސާކުރާއިރު ނޫނެކޭ ބުނި ގިނަ ވޯޓަރުން ކަންބޮޑުވީ އީޔޫގެ ގުޅިފައިވާ މަސްވެރިކަމުގެ ސިޔާސަތުގެ ދަށުން ފައިދާ ބޮޑު މަސް ކަނޑުތަކުގެ ކޮންޓްރޯލުން ބައެއް ގެއްލިދާނެ ކަމާ މެދުގައެވެ.

ވޯޓުލެއްވުމަށް ފަހު ބޮޑުވަޒީރު ކްރިސްޓްރޫން ބުނީ "މިއީ ވަރަށް ރަނގަޅު ދުވަހެއް ވޯޓެއް ލެވޭނެ ކަމުގެ އިންތިޒާރުގައި އެތައް އަހަރެއް ހޭދަވެއްޖެ" ކަމަށެވެ. ނަތީޖާ ކޮންމެ ގޮތަކަށް އޮތް ނަމަވެސް ސަރުކާރުގެ މަސައްކަތް ކުރިއަށް ގެންދާނެ ކަމަށް ވެސް އޭނާ ބުންޏެވެ.

އައިސްލެންޑު މިހާރު ވެސް އީޔޫގެ ސިންގަލް މާކެޓާއި ޝެންގެން ބޯޑަރު-ފްރީ ޒޯނުގައި ބައިވެރިވާއިރު 2008 ވަނަ އަހަރުގެ މާލީ ކާރިސާ އާއި ބެންކިން ނިޒާމް ފުނޑުމާ ގުޅިގެން 2009 ވަނަ އަހަރު އީޔޫގައި ބައިވެރިވުމަށް ހުށަހެޅި ނަމަވެސް 2013 ވަނަ އަހަރު ވެރިކަމަށް އައި ޔޫރަސެޕްޓިކް ސަރުކާރުން ވާހަކަތައް ހުއްޓައިލީއެވެ.

އޭރު ވެސް އެންމެ ބޮޑު ހުރަހަކީ މަސްވެރިކަމުގެ ޙައްޤުތަކެވެ. މިފަހަރުގެ ނޫނެކޭ ވޯޓުން ކުރިމަގުގައި މަޝްވަރާ އަލުން ފެށުމުގެ ފުރުޞަތު މުޅިން ބަންދު ނުވާ ކަމަށް ރިޕޯޓުތައް ބުނެއެވެ. ނޭޓޯގެ ބާނީ މެންބަރެއް ކަމަށް ވިޔަސް އަމިއްލަ އަސްކަރިއްޔާއެއް ނެތް އައިސްލެންޑުން ދިފާޢީ ރައްކާތެރިކަމަށް ބަރޯސާވަނީ ބައިވެރިންގެ އެހީއަށެވެ.