އާދިއްތަ ދުވަހު މަޖިލީހުގެ ޖަލްސާއެއް ބާއްވަނީ

އަންނަ އާދިއްތަ ދުވަހު ރައްޔިތުންގެ މަޖިލީހުގެ ޖަލްސާއެއް ބާއްވަން ނިންމައި އެވެ.

މަޖިލީހުގެ މިއަދުގެ ޖަލްސާ ނިންމަވާލައްވަމުން ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވަނީ އަންނަ އަހަރުގެ ބަޖެޓު ހުށަހެޅުމަށްޓަކައި އަންނަ އާދީއްތަ ދުވަހަށް ޖަލްސާއެއް ތާވަލުކުރެވިފައިވާކަން އިއުލާނު ކުރައްވައިފަ އެވެ.

މަޖިލީހުގެ ގަވައިދުގައިވާ ގޮތުގެ މަތިން، މަޖިލީހުގެ ޖަލްސާތައް އާންމުކޮށް އޮންނާނީ ކޮންމެ ހަފްތާއެއްގެ ހޯމަ، އަންގާރަ އަދި ބުދަ ދުވަހު އެވެ.

އަންނަ އަހަރަށް ލަފާކޮށް ސަރުކާޜުން ހުށަހަޅަން ނިންމާފައިވަނީ37 ބިލިއަން ރުފިޔާގެ ބަޖެޓެކެވެ.

އަންނަ އަހަރު ދައުލަތަށް ލިބޭނޭކަމަށް އަންދާޒާކޮށްފައިވަނީ 23.6 ބިލިއަން ރުފިޔާ އެވެ. އެއީ ޓެކްސްގެ ގޮތުގައި ލިބޭ 14.7 ބިލިއަން ރުފިޔާ އަދި ޓެކްސް ނޫން ގޮތުގައި ލިބޭ 5.3 ބިލިއަން ރުފިޔާ އެވެ.

ބަޖެޓުގެ ރިކަރެންޓް ޚަރަދުގެ ގޮތުގައި 21.2 ބިލިއަން ރުފިޔާ ވަނީ ކަނޑައަޅާފަ އެވެ. އަދި ކެޕިޓަލް ޚަރަދުގެ ގޮތުގައި ކަނޑައަޅާފައިވަނީ 10.5 ބިލިއަން ރުފިޔާ އެވެ.