ގއ. ނިލަންދޫ ސްކޫލަށް ޖަޕާނު ސަރުކާރުގެ ފަރާތުން 1.1 މިލިއަން ރުފިޔާގެ އެހީ ދޭން ނިންމައިފި އެވެ.
ރާއްޖޭގައި ހުންނަ ޖަޕާން އެމްބަސީން މިއަދު ވިދާޅުވީ، މި އެހީގެ ދަށުން ނިލަންދޫ ސްކޫލުގެ ގްރޭޑް އެކެއްގެ ދަރިވަރުންނަށް އެ ސްކޫލުގައި ކްލާސްރޫމަކާއި ލައިބްރަރީއެއް އިމާރާތް ކުރާނެ ކަމަށެވެ. އަދި ޤުދުރަތީ ކާރިސާތަކުގެ ހާލަތުގައި ރައްކާތެރިވުމަށް ބޭނުންކުރާނެ އިމާރާތެއްގެ ގޮތުގައި އެ އިމާރާތް ބޭނުންކުރެވޭނެ ކަމަށް ޖަޕާން އެމްބަސީން ވިދާޅުވިއެވެ. މި ޕްރޮޖެކްޓް ހިންގުމަށް ހަމަޖައްސާފައިވަނީ އެޑިއުކޭޝަން މިނިސްޓްރީގެ އެހީތެރިކަމާއެކު ނިލަންދޫ ސްކޫލުންނެވެ.
އެގޮތުން، މި އެހީ ދީފައި ވަނީ ޖަޕާން ސަރުކާރުގެ ގްރާންޓް އެސިސްޓެންސް ފޯ ގްރާސްރޫޓްސް ހިއުމަން ސެކިއުރިޓީ ޕްރޮޖެކްޓްސް (ޖީޖީޕީ) ސްކީމްގެ ދަށުންނެވެ.
ޖީޖީޕީ އަކީ ރާއްޖޭގައި މީހުން ބާރުވެރިކުރުމަށްޓަކައި ޖަޕާން ސަރުކާރާއި ދިވެހި ސަރުކާރު ގުޅިގެން ހިންގާ ޕްރޮގްރާމެކެވެ.
1996 އިން ފެށިގެން ރާއްޖޭގެ ތައުލީމީ ދާއިރާ ހިމެނޭހެން ތިމާވެށީގެ ދާއިރާއާއި ސިއްހީ ދާއިރާ އަދި ހަކަތައިގެ ދާއިރާގެ އިތުރުން ދަތުރުފަތުރު ކުރުމުގެ ދާއިރާއަށް ޖީޖީޕީން ވަނީ އެހީތެރިކަން ފޯރުކޮށްދީފައެވެ.
މި އެއްބަސްވުމުގައި ޖަޕާން ސަރުކާރުގެ ފަރާތުން ސޮއިކުރެއްވީ ޖަޕާނުން ރާއްޖެއަށް ކަނޑައަޅާފައި ހުންނަވާ ސަފީރު ޔަނައި ކެއިކޯއެވެ.
އަދި ނިލަންދޫ ސްކޫލުގެ ފަރާތުން ސޮއިކުރެއްވީ އެ ސްކޫލުގެ ޕްރިންސިޕަލް ހަދީޖާ އިބްރާހީމެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް