N/A
އެމެރިކާ އާއި އީރާނާ ދެމެދު ހެދި ދެ ހަފުތާގެ ސީޒްފަޔާ ހަމަވާ ސުންގަޑި، އަންގާރަ ދުވަހުގެ ރެ އިން ބުދަ ދުވަހުގެ ރެ އަށް (ވޮޝިންޓަން ގަޑީން) ޓްރަމްޕް ފަސްކޮށްފައިވީ ނަމަވެސް، މަޝްވަރާގެ ދެވަނަ ބުރުގައި ބައިވެރިވާން އީރާނުން ރަސްމީކޮށް އެއްބަސްވެފައެއް ނުވެ އެވެ.
ރާއްޖޭ ގަޑީން ބަލާ ނަމަ، ސީޒްފަޔާ ހަމަވާނީ ގާތްގަނޑަކަށް ބުރާސްފަތި ދުވަހުގެ (އޭޕްރީލް 23) ފަތިހު އެވެ. ޓްރަމްޕް ބުނީ ޑީލެއް ނެހެދިއްޖެ ނަމަ ސީޒްފަޔާ އިތުރުކުރުމަކީ ވަރަށް ނާދިރު ކަމެއް ކަމަށާއި، "ޑީލެއް ނެތް ނަމަ ގިނަ ބޮންތަކެއް ގޮވަން ފަށާނެ" ކަމަށެވެ.
އީރާނުގެ ދައުލަތުގެ ޓީވީ އިން އަންގާރަ ދުވަހު ބުނީ "މިހާތަނަށް އީރާނުގެ އެއްވެސް ވަފުދެއް އިސްލާމްއާބާދަށް ފުރައިގެން ނުދާ" ކަމަށެވެ. ޕާލިމެންޓް ސްޕީކަރު މުޙައްމަދު ބާޤިރު ޣާލިބާފް ބުނީ ޓްރަމްޕް ބޭނުންވަނީ މަޝްވަރާ "އިސްތިސްލާމުގެ މޭޒަކަށް" ބަދަލުކުރަން ކަމަށެވެ. ޚާރިޖީ ވުޒާރާގެ ތަރުޖަމާނު އިސްމާޢީލް ބަޣާއީ ބުނީ "ބިރުދެއްކުމުގެ ހިޔަނީގައި" މަޝްވަރާ ނުކުރާނެ ކަމަށާއި، އެމެރިކާގެ ބްލޮކޭޑާއި ބޯޓު އަތުލުމަކީ ސީޒްފަޔާގެ ޚިލާފުވުންތައް ކަމަށެވެ. ނަމަވެސް އެކްސިއޯސް ރިޕޯޓުކުރި ގޮތުގައި ސުޕްރީމް ލީޑަރު މުޖްތަބާ ޚާމަނައީ ހޯމަ ދުވަހުގެ ރޭ ދެވަނަ ބުރުގެ މަޝްވަރާ އަށް ރުހުން ދީފައިވެ އެވެ.
އެމެރިކާގެ ވަފުދު މިއަދު (އަންގާރަ) އިސްލާމްއާބާދަށް ދަތުރުކުރާ ގޮތަށް ހަމަޖެހިފައިވެ އެވެ. ވައިސް ޕްރެޒިޑެންޓް ޖޭ.ޑީ ވޭންސް، ޚާއްޞަ މަންދޫބު ސްޓީވް ވިޓްކޮފް، އަދި ޖެރެޑް ކުޝްނާ ހިމެނޭ ގޮތަށް، ފުރަތަމަ ބުރުގެ ޓީމް ދެވަނަ ބުރުގައި ވެސް ލީޑުކުރާ ގޮތަށް ވަނީ ހަމަޖައްސައިފަ އެވެ. ފްލައިޓް ޓްރެކިން ޑޭޓާ ދައްކާ ގޮތުން ކޮމިއުނިކޭޝަންސް އާއި މޮޓޯކޭޑް އާލާތް ގެންދާ އެމެރިކާ ސަރުކާރުގެ ހަތަރު މަތިންދާ ބޯޓު އާދީއްތަ ދުވަހު ޕާކިސްތާނުގައި ޖައްސާފައިވެ އެވެ.
އޭޕްރީލް 11 އަދި 12 ގައި އިސްލާމްއާބާދުގައި ބޭއްވި ފުރަތަމަ ބުރުގެ މަޝްވަރާ 21 ގަޑިއިރަށް ދެމިގެން ދިޔަ ނަމަވެސް، ނިއުކްލިއާ ޕްރޮގްރާމާއި ހޮރްމުޒް ކަނޑުއޮޅީގެ މައްސަލައިގައި އެއްބަސްވުމަކާ ހަމައަށް ނުދެވެ އެވެ. އެ ފަހުން ޓްރަމްޕް ވަނީ އޭޕްރީލް 13 ގައި އީރާނުގެ ބަނދަރުތައް ބްލޮކޭޑުކޮށް، އާދީއްތަ ދުވަހު (އޭޕްރީލް 19) ގަލްފް އޮފް އޮމާނުން އީރާނުގެ މުދާ ބޯޓަކަށް ބަޑި ޖަހައި އަތުލައިފަ އެވެ. މި ފިޔަވަޅުތަކާ ގުޅިގެން ސީޒްފަޔާގެ ޙާލަތާ މެދު ދެ ފަރާތުގެ ދެމެދުގައި ވެސް ބޮޑެތި ޚިލާފުތައް އެބަ ހުއްޓެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް