ޓްރަމްޕަކަށް ކެތެއް ނުވި - އޮޕަރޭޝަން ފްރީޑަމްގެ ނަމުގައި ކަނޑުއޮޅީގައި އީރާނަށް ނުފޮރުއްޕާން ކުރަން ފަށައިފި

ހޮރްމުޒް ކަނޑުއޮޅީގައި ތާށިވެފައިވާ ވިޔަފާރި ބޯޓުފަހަރު ނެރުމުގެ ނަމުގައި "ޕްރޮޖެކްޓް ފްރީޑަމް"ގެ ނަމުގައި އެމެރިކާގެ ބޮޑު އަސްކަރީ އޮޕަރޭޝަނެއް މިއަދު ފަށައި، އީރާނާ ދެމެދު ކުރިމަތިލުން އިތުރަށް ބޮޑުވެއްޖެއެވެ.

ޓްރަމްޕް އިއްޔެ ޓްރޫތު ސޯޝަލް ގައި ޕޯސްޓެއް ކޮށް ބުނީ ހަނގުރާމައާ ގުޅުމެއް ނެތް ޤައުމުތަކުގެ ބޯޓުފަހަރު ސަލާމަތުން ކަނޑުއޮޅިން ނެރެދޭން އެމެރިކާ ތައްޔާރަށް އޮތް ކަމަށެވެ. މި އޮޕަރޭޝަނަށް ހުރަސް އެޅޭ ނަމަ "ބާރުގެ ބޭނުންކޮށް ޖަވާބުދޭނެ" ކަމަށް ވެސް ބުނެފައިވެއެވެ. ޔޫ.އެސް ސެންޓްރަލް ކޮމާންޑް (ސެންޓްކޮމް) ބުނީ މި އޮޕަރޭޝަނުގައި ގައިޑެޑް-މިސައިލް ޑެސްޓްރޯޔަރުތަކާއި 100 އަށް ވުރެ ގިނަ މަތިންދާބޯޓާއި 15,000 ސިފައިން ހަރަކާތްތެރިވާ ކަމަށެވެ. ގާތްގަނޑަކަށް 800 ބޯޓާއި 20,000 ފަޅުވެރިން ކަނޑުއޮޅީގައި ތާށިވެފައި ތިބި ކަމަށް ބެލެވެއެވެ. ދެ އެމެރިކާ ދިދައިގެ ވިޔަފާރި ބޯޓު މިއަދު ކަނޑުއޮޅި ހުރަސްކޮށްފައިވާ ކަމަށް ސެންޓްކޮމް އިން ކަށަވަރުކޮށްދީފައިވެއެވެ.

ނަމަވެސް އީރާނުން ވަނީ މި އޮޕަރޭޝަނާ ދެކޮޅަށް ވަރުގަދައަށް ދެކޮޅުހަދައި އަމަލީ މަސައްކަތް ފަށައިފައެވެ. އީރާނުގެ ޚަތަމުލް އަންބިޔާ މަރުކަޒީ އަސްކަރީ ކޮމާންޑުގެ ވެރިޔާ މޭޖާ ޖެނެރަލް ޢަލީ ޢަބްދުﷲހީ ބުނީ ބޭރުގެ ކަނޑުގެ ސިފައިން ކަނޑުއޮޅި ތެރެއަށް ވަދެފި ނަމަ ހަމަލާ ދޭނެ ކަމަށެވެ. އީރާނުގެ ކަނޑުގެ ސިފައިން ބުނީ އެމެރިކާ ޑެސްޓްރޯޔަރުތައް ކައިރީ އިންޒާރުގެ ބަޑީގެ ހަމަލާ ދީ، ކަނޑުއޮޅި ތެރެއަށް ވަނަ ނުދީ ހުއްޓުވި ކަމަށެވެ. ސެންޓްކޮމް އިން އެ ވާހަކަ ކަށަވަރެއް ނުކޮށްދެއެވެ.

ހޮރްމުޒް ކަނޑުއޮޅީގައި ދަތުރުކުރި އެމެރިކާ ބޯޓަކަށް ދެ މިސައިލް އަމާޒުވި ކަމަށް އީރާނުގެ ދައުލަތުގެ ފާރސް ނިއުސް އެޖެންސީ ބުނެފައިވެއެވެ. އެ ނޫހުން ބުނީ ޖަސްކު ބަނދަރު ކައިރިން ކަނޑުދަތުރުގެ ސަލާމަތީ ޤަވާޢިދުތަކާ ޚިލާފަށް ދަތުރުކުރި އެ ފްރިގޭޓަށް ހަމަލާ ދިނީ ކަނޑުގެ ސިފައިންގެ އިންޒާރަށް ބީރު ކަންފަތެއް ދިނުމުން ކަމަށެވެ. ނަމަވެސް ސެންޓްކޮމް އިން ބުނީ އެއްވެސް އެމެރިކާ އުޅަނދަކަށް ހަމަލާ އަމާޒު ނުވާ ކަމަށެވެ.

މީގެ އިތުރުން، ޔޫއޭއީގެ ސަރުކާރު ތެޔޮ ކުންފުނި އެޑްނޮކް ގެ ޓޭންކަރަކަށް ކަނޑުއޮޅި ހުރަސްކުރަނިކޮށް އީރާނުގެ ދެ ޑްރޯން އިން ހަމަލާ ދީފައިވެއެވެ. ޔޫއޭއީ ގެ ޚާރިޖީ ވުޒާރާ އިން އެ ހާދިސާ ސިފަކުރީ "އީރާނުގެ ޓެރަރިސްޓް ހަމަލާ"އެއް ކަމަށެވެ. އެއްވެސް ފަޅުވެރިއަކަށް އަނިޔާ ނުވާ ކަމަށް ބުނެފައިވެއެވެ. ހަމަލާ ބަދަލުކުރުން ހުއްޓައިލި ފަހުން ފުރަތަމަ ފަހަރަށް ޔޫއޭއީ ގައި މިސައިލް އެލާޓް ވެސް ވަނީ ނެރެފައެވެ. ދުބާއި، ޝާރިޖާ އަދި އަޖްމާން ހިމެނޭ ގޮތަށް ގިނަ އެމިރޭޓްތަކަށް ނެރުނު އެ އެލާޓް ކުޑައިރުކޮޅެއް ފަހުން ނެގީއެވެ.

އެމެރިކާ-އީރާނު ހަނގުރާމައިގައި 8 އެޕްރީލުގައި ހަމަލާ ބަދަލުކުރުން ހުއްޓައިލި ނަމަވެސް، ދެ ފަރާތުން ވެސް ޝަރުތުތައް ގަބޫލުނުކޮށް، ޕާކިސްތާނު މެދުވެރިކޮށް ހިންގާ ސުލްޙައިގެ މަޝްވަރާތައް ކުރިއަކަށް ނުދެއެވެ. މިއަދުގެ ހާދިސާތަކާ އެކު ކަނޑުއޮޅީގެ މަސްރަޙު އިތުރަށް ނާޒުކުވެ، ހަމަލާ ބަދަލުކުރުން ހުއްޓައިލުމުގެ އެއްބަސްވުން ރޫޅިދާނެ ކަމުގެ ބިރު ބޮޑުވެފައިވެއެވެ.