N/A
ރާއްޖޭގައި މަރުގެ އަދަބު ތަންފީޒުކުރުން މެދުކަނޑާލާފައި އޮތް އޮތުން ނިމުމަކަށް ގެނައުމަށް ހުށަހެޅި ބިލް އަނބުރާ ގެންދިއުމަށް ދިވެހި އަދި ބައިނަލްއަޤުވާމީ 10 ޖަމާޢަތެއް ގުޅިގެން ސަރުކާރަށް ގޮވާލައިފިއެވެ.
އެ ޖަމާޢަތްތަކުން ވަނީ މަސްތުވާތަކެއްޗާ ގުޅޭ ކުށްތަކަށް މަރުގެ އަދަބު ދެވޭ ގޮތަށް މަސްތުވާތަކެތީގެ ޤާނޫނަށް ގެނައި އިޞްލާޙުތައް އުވާލުމަށް ވެސް ގޮވާލައިފައެވެ. އެ ޖަމާޢަތްތަކުން ބާރު އަޅަނީ މަރުގެ އަދަބު މުޅިން އުވާލައި، މިހާރު މަރުގެ ޙުކުމް އިއްވާފައިވާ ފަރާތްތަކުގެ އަދަބު ލުއިކުރުމަށެވެ.
ރައީސް މުޙައްމަދު މުޢިއްޒު އިޢުލާނުކުރެއްވި މި ބިލް ފާސްވެއްޖެ ނަމަ، އިސްތިއުނާފުގެ ހުރިހާ މަރުޙަލާއެއް ފުރިހަމަކޮށްފައިވާ ފަރާތްތަކަށް ލަސްކުރުމެއް ނެތި މަރުގެ އަދަބު ތަންފީޒުކުރެވޭނެ ކަމަށް ވެއެވެ. ޙައްޤުތަކާ ބެހޭ ޖަމާޢަތްތަކުން ބުނާ ގޮތުގައި މިކަމަކީ މަދަނީ އަދި ސިޔާސީ ޙައްޤުތަކާ ބެހޭ ބައިނަލްއަޤުވާމީ މުޢާހަދާގެ ދަށުން ރާއްޖެއަށް އޮތް އިލްތިޒާމުތަކާ ޚިލާފު ކަމެކެވެ. ބައިނަލްއަޤުވާމީ މިންގަނޑުތައް ބުނާ ގޮތުން މަރުގެ އަދަބު ހަމައެކަނި ދެވެނީ "އެންމެ ސީރިއަސް ކުށްތަކަށް" ކަމަށާއި، މަސްތުވާތަކެތީގެ ކުށްތައް އޭގެ ތެރޭގައި ނުހިމެނޭ ކަމަށް އެ ޖަމާޢަތްތަކުން ބުނެއެވެ.
އެ ބިލާ ދެކޮޅު ފަރާތްތަކުން ފާހަގަކުރާ ގޮތުގައި ރާއްޖޭގެ ޢަދުލުގެ ނިޒާމުގައި ސިޔާސީ ނުފޫޒާއި ކޮރަޕްޝަނާއި ޖަވާބުދާރީވުމުގެ ނިޒާމުގެ ބަލިކަށިކަން ފަދަ ދިގުލައިގެން ގޮސްފައިވާ މައްސަލަތައް ހުރުމާ އެކު، ޢަދުލުވެރި ޝަރީޢަތެއް ކަށަވަރު ނުވެދާނެ ނިޒާމެއްގައި މަރުގެ އަދަބު ތަންފީޒުކުރުމަކީ ނުރައްކާތެރި ކަމެކެވެ.
ރާއްޖޭގައި 1954 ވަނަ އަހަރުން ފެށިގެން މަރުގެ އަދަބު ތަންފީޒުނުކޮށް ދަމަހައްޓަމުން އައި މޮރެޓޯރިއަމް ނިމުމަކަށް ގެނައުމަކީ ދުނިޔޭގެ އޮއިވަރާ ދެކޮޅު ފިޔަވަޅެއް ކަމަށް ޙައްޤުތަކާ ބެހޭ ޖަމާޢަތްތަކުން ބުނެއެވެ. ދުނިޔޭގެ 100 އަށް ވުރެ ގިނަ ޤައުމު ވަނީ މަރުގެ އަދަބު މުޅިން އުވާލައިފައެވެ. ވިއެޓްނާމާއި ޕާކިސްތާނާއި މެލޭޝިއާ ފަދަ އޭޝިއާ ޤައުމުތަކުން ވެސް ފަހަކަށް އައިސް މަރުގެ އަދަބުގެ ބޭނުންކުރުން ވަނީ މަދުކޮށްފައި ނުވަތަ ހުއްޓާލައިފައެވެ. އެ ކޯލިޝަނުން ވަނީ ރައްޔިތުންގެ މަޖިލީހުގެ މެންބަރުންނަށް މި ބިލް ބޭރުކޮށް، ބައިނަލްއަޤުވާމީ މިންގަނޑުތަކާ އެއްގޮތަށް މަރުގެ އަދަބު މުޅިން އުވާލުމަށް ފިޔަވަޅު އެޅުމަށް ގޮވާލައިފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް