N/A
ދުނިޔޭގެ ތެލުގެ ގާތްގަނޑަކަށް 20 އިންސައްތަ ދަތުރުކުރާ ހޮރްމުޒް ކަނޑުއޮޅި ވިޔަފާރީގެ އުޅަނދުތަކަށް އެއްކޮށް ހުޅުވާލައިފައިވާ ކަމަށް އީރާނުން ބުނެފިއެވެ.
އީރާނުގެ ޚާރިޖީ ވަޒީރު ޢައްބާސް އަރާޣްޗީ އެކްސްގައި ކުރި ޕޯސްޓެއްގައި ބުނީ ކަނޑުއޮޅި މިހާރު ވިޔަފާރީގެ އުޅަނދުތަކަށް އެއްކޮށް ހުޅުވާލާފައިވާ ކަމަށެވެ. މި އިޢުލާނާ އެކު ތެލުގެ އަގުތައް ވެއްޓިފައިވެއެވެ.
ނަމަވެސް އެމެރިކާގެ ރައީސް ޑޮނަލްޑް ޓްރަމްޕް ބުނީ އީރާނުގެ ބަނދަރުތަކާއި އުޅަނދުތަކަށް އެޅި ބްލޮކޭޑް "އީރާނާ އެކު ވެފައިވާ އެއްބަސްވުން 100 އިންސައްތަ ފުރިހަމަވަންދެން" ދެމިއޮންނާނެ ކަމަށެވެ. ޓްރަމްޕް ފުރަތަމަ ކަނޑުއޮޅި ހުޅުވުނު ޚަބަރާ މެދު އުފާ ފާޅުކުރި ނަމަވެސް، މިނެޓްތަކެއް ފަހުން ބްލޮކޭޑް ކުރިއަށް ގެންދާނެ ކަމަށް ބުންޏެވެ. އީރާނާ އެކު މަޝްވަރާ ކުރެވެމުންދާ ތިން މައިގަނޑު ކަމަކީ އީރާނުގެ ނިއުކްލިއާ ޕްރޮގްރާމާއި ހޮރްމުޒް ކަނޑުއޮޅީގެ މައްސަލައާއި ހަނގުރާމައިގެ ބަދަލުގެ މައްސަލައެވެ.
މި ހަފުތާގެ ކުރީކޮޅު ޓްރަމްޕް ބްލޮކޭޑް އެޅީ، ލުބުނާނުގައި ހިނގަމުންދިޔަ ހަމަނުޖެހުންތަކާ ގުޅިގެން އީރާނުން ކަނޑުއޮޅީގައި ދަތުރުފަތުރު ހުއްޓުވުމުންނެވެ. އެ ހަމަނުޖެހުންތަކަކީ ޕާކިސްތާނުގެ މެދުވެރިކަމުގައި ވެފައިވާ ސީޒްފަޔާ އެއްބަސްވުމާ ޚިލާފު ކަމެއް ކަމަށް އީރާނުން ބުނެފައިވެއެވެ.
ރާއްޖޭ ގަޑީން ބަލަނީނަމަ ރޭ މެންދަމު ތިނަކުން ފެށިގެން ލުބުނާނާ ދެމެދު 10 ދުވަހުގެ ސީޒްފަޔާއެއް ވަނީ ފެށިފައެވެ. ނަމަވެސް އިޒްރާއީލުން ބުނީ ލުބުނާނުން ސިފައިން ނުބާލާނެ ކަމަށާއި ބޯޑަރުން 10 ކިލޯމީޓަރުގެ ބަފާ ޒޯނެއް ދެމެހެއްޓޭނެ ކަމަށެވެ. މި ހަނގުރާމައިގައި މިހާތަނަށް އީރާނުން 3,000 އަށް ވުރެ ގިނަ މީހުން، ލުބުނާނުން 2,100 އަށް ވުރެ ގިނަ މީހުން، އަދި އިޒްރާއީލުން 23 މީހުން މަރުވެފައިވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް