މަތަނުވެގެން ހިނގި ބައެއް އެކްސިޑެންޓްތަކުގައި އިހުމާލުވި ޑްރައިވަރުންނާއި މެދު ފިޔަވަޅު އަޅައިފި

މިމަހުގެ ތެރޭގައި ހިނގި ބައެއް އެކްސިޑެންޓްތަކުގައި އިހުމާލުވި ޑްރައިވަރުންނާއި މެދު ޓްރާންސްޕޯޓު އޮތޯރިޓީން ފިޔަވަޅު އަޅައިފިއެވެ.

ފިޔަވަޅު އެޅި ޑްރައިވަރުންގެ ތެރޭގައި، މިމަހުގެ 4 ވަނަ ދުވަހު މާލެ ހުޅުމާލެ ލިންކް ރޯޑްގެ ސަރުމާރިތަކުގައި ޖެހި ހިނގި އެކްސިޑެންޓްގައި ކާރު ދުއްވަން އިން މީހާގެ ލައިސަންސް 1 އަހަރަށް ހިފަހައްޓާފައި ވާކަމަށް ފުލުހުން ވިދާޅުވިއެވެ. މީގެ އިތުރު އެކްސިޑެންޓެއް ހިނގައި، އަންގަން ޖެހޭ ފަރާތްތަކަށް ނާންގާ ސިއްރުކުރި މައްސަލައާއި ގުޅިގެން ކާރު ދުއްވި ޑްރައިވަރު ޖޫރިމަނާކޮށްފައި ވާކަމަށްވެސް ފުލުހުން ވިދާޅުވިއެވެ.

މިމަހުގެ 7 ވަނަ ދުވަހުގެ ރޭ، ބްރިޖް މަތިން ބާރު ދުވެލީގައި ދުއްވާފައި ދިޔަ ކާރު މަތަނުވެގެން ގޮސް، މެރިން ރިސާޗް ފާރުގައި ޖެހި ހިނގި އެކްސިޑެންޓްގައި، ކާރު ދުއްވަން އިން މީހާގެ ލައިސަންސް 1 އަހަރާއި 6 މަސް ދުވަހަށް ވަނީ ހިފަހައްޓާފައެވެ.

މީގެ އިތުރުން، މިމަހުގެ 8 ވަނަ ދުވަހު މާލެ ހުޅުމާލެ ލިންކް ރޯޑް ރާޑާރ ހިމެނޭ ސަރަހައްދުން ބާރު ދުވެލީގައި ދުއްވާފައި ދިޔަ ކާރު މަތަނުވެ، ސަރުމާރި ތަކުގައި ޖެހި އެކްސިޑެންޓްވި މައްސަލައާއި ގުޅިގެން، ކާރު ދުއްވި މީހާގެ ލައިސަންސް ވަނީ 1 އަހަރަށް ހިފަހައްޓާފައެވެ.

ފުލުހުން ވިދާޅުވީ، ޓްރާންސްޕޯޓް އޮތޯރިޓީން މި މައްސަލަތަކުގައި ހިމެނޭ ފަރާތްތަކާއި މެދު ފިޔަވަޅު އަޅުއްވާފައި ވަނީ، ފުލުހުން މި އެކްސިޑެންޓްތަކުގައި ހިމެނޭ މީހުންނާއި މެދު އިދާރީ ފިޔަވަޅު އެޅުމަށްފަހު އެ އޮތޯރިޓީ އަށް ފޮނުވުމުން ކަމުގައެވެ.