އދ. ދަނގެތީގައި މަހުމޫދު އަބޫބަކުރު މަރާލި މައްސަލައިގަ ބަންގްލަދޭޝްގެ ރައްޔިތެއް ކަމަށްވާ ޝާ އަލޮމް މިއާ (ސާލިމް) ގެ މައްޗަށް ދައުވާ އުފުލައިފި އެވެ.
މަހުމޫދު މަރާލާފައި އޮއްވަ ފެނުނީ މިދިޔަ އޮކްޓޯބަރު މަހުގެ15 ވަނަ ދުވަހު މެންދުރު އެ ރަށު ފަޅު ގޯއްޗެއްގައި ހުރި ފެން ވަޅެއްގެ ތެރެއިންނެވެ. އޭނާ މަރާލީ14 ވަނަ ދުވަހުގެ ރޭގެ ވަގުތެއްގައި އެވެ.
ޕްރޮސެކިއުޓާ ޖެނެރަލްގެ އޮފީހުގެ ޕަބްލިކް ޕްރޮސެކިއުޓާ އަހުމަދު ޝަފީއު ވިދާޅުވީ ސާލިމާއި ދެކޮޅަށް ދައުވާ ކުރަން ފޮނުވީ އިއްޔެ ކަމަށެވެ. އޭނާ އާއި ދެކޮޅަށް ދެ ދައުވާއެއް އުފުލާފައިވެ އެވެ.
އެއީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން ގަސްދުގައި މީހަކު މެރުމުގެ ދައުވާ އާއި ދިވެހިރާއްޖޭގެ ގާނޫނުލް އުގޫބާތުގެ ދަށުން މައްޔިތާގެ ބޭނުން ނަހަމަގޮތުގައި ހިފުމުގެ ދައުވާ އެވެ.
މި މައްސަލަ ތަހުގީގު ކުރުމަށް ފަހު ފުލުހުން ބުނެފައިވަނީ މަހުމޫދު މަރާލީ ފައިސާ ދޭން އެދުމުން ނުދީގެން ކަމަށެވެ. މަހުމޫދަކީ އެ ރަށުގެ މަޝްހޫރު ވިޔަފާރިވެރި އެކެވެ.
މަހުމޫދު ވަނީ ފުލުހުންގެ ތަހުގީގުގައި މަހުމޫދު މަރާލި ކަމަށް އެއްބަސްވެފައި އެވެ. އަދި އެ ކަމުގައި އިތުރު މީހަކު ބައިވެރި ނުވާކަމަށް ބުނެފައިވެ އެވެ.
ސާލިމަކީ އެ ރަށުގައި އުމުރުން ދުވަސްވީ ފިރިހެނަކު ބަލަން ހުންނަ މީހެކެވެ. އެމީހާ އާއި އެކު ސާލިމް ދިރިއުޅުނީ އެ ގޭގައި އެވެ. އޭނާ މަހުމޫދު މަރާލީ އެ ގޭ ގޯތިތެރޭގައި އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް