އީރާނުގެ މުދާ ޔަމަނަށް އެތެރެކޮށް ވިއްކުން މަނާކޮށްފި

ޔަމަނުގެ ބައިނަލްއަޤުވާމީ ގޮތުން ބަލައިގަންނަ ސަރުކާރުން އީރާނުގައި އުފައްދާ އެންމެހައި ބާވަތެއް އެ ޤައުމަށް އެތެރެކޮށް ވިއްކުން މަނާކޮށްފިއެވެ.

ޔަމަނު ދައުލަތުގެ ސަބައް ނޫހާ ހަވާލާދީ ރިޕޯޓުތައް ބުނާ ގޮތުގައި މި ނިންމުން ނިންމީ ޔަމަނުގެ ސެންޓްރަލް ބޭންކުގެ ގަވަރުނަރު އަޙްމަދު ޣާލިބު ރިޔާސަތު ބެލެހެއްޓެވި ބައްދަލުވުމެއްގައި އިމްޕޯޓް ބެލެހެއްޓުމާއި ފައިނޭންސް ކުރުމާ ބެހޭ ޤައުމީ ކޮމިޓީންނެވެ. އެ ކޮމިޓީގެ ވެރިއެއްގެ ގޮތުގައި ވެސް ހުންނެވީ ޣާލިބެވެ.

މި ފިޔަވަޅު އެޅީ "ޤައުމީ މަތީ މަޞްލަޙަތު ނިޔާކުރާ ގޮތުގެ މަތިން" ކަމަށް އެ ކޮމިޓީން ބުނެފައިވެއެވެ. ކަމާ ގުޅޭ އިދާރާތަކުން ކޮންމެ ފަރާތެއް ވެސް އެ ފަރާތެއްގެ އިޚްތިޞާޞް ހިމެނޭ ދާއިރާގެ ތެރެއިން ޤާނޫނާ އެއްގޮތްވާ ގޮތުގެ މަތިން މި ނިންމުން ތަންފީޒުކުރުމަށް ވެސް ކޮމިޓީން ވަނީ އަންގައިފައެވެ.

މި މަނާކުރުން ފެށޭނެ ވަކި ދުވަހެއް ނުވަތަ ހިމެނޭ ވަކި ބާވަތްތަކެއް ބަޔާނުގައި ތަފުޞީލުކޮށްދީފައެއް ނުވެއެވެ.

މިގޮތަަށް ނިންމާފައިމިވަނީ ޔަމަނުގެ ސަރުކާރާއި އީރާނުގެ ތާއީދު ލިބޭ ޙޫޘީ ޖަމާޢަތާ ދެމެދު ހަނގުރާމަ ވަރުގަދަވެފައިވާ ދަނޑިވަޅެއްގައިއެވެ. ޙޫޘީންނަށް އީރާނުން އަސްކަރީ އަދި މާލީ އެހީތެރިކަން ފޯރުކޮށްދޭ ކަމަށް ޔަމަނު ސަރުކާރުން ތުހުމަތުކުރާ އިރު ތެހެރާނުން އެ ތުހުމަތު ދޮގުކޮށްފައިވެއެވެ.

ޙޫޘީން 2014 ގައި ވެރިރަށް ޞަންޢާ ހިފައި ޔަމަނުގެ ބޮޑު ބައެއް ކޮންޓްރޯލް ކުރި ފަހުން ސަރުކާރު ބާރުތަކަށް ސަޢޫދީ ޢަރަބިއްޔާ ކޯލިޝަނުގެ އެހީ ލިބެމުން ދެއެވެ.

2022 ވަނަ އަހަރުގެ އެޕްރީލް މަހު އދ. ގެ މެދުވެރިކަމުގައި ހަމަލާ ބަދަލުކުރުން ހުއްޓައިލުމުގެ އެއްބަސްވުމަކާ ހަމައަށް އައި ފަހުން ނިސްބަތުން ހަމަހިމޭން ދުވަސްވަރެއް ފެނުނު ނަމަވެސް ޖުލައި މަހުން ފެށިގެން ހަނގުރާމައިގެ ހާލަތު އަނެއްކާ ވެސް ގޯސްވެފައިވެއެވެ.