N/A
އިސްރާއީލުން ބުދަ ދުވަހު ލުބުނާނަށް އެންމެ 10 މިނެޓް ތެރޭ 100 ވައިގެ ހަމަލާ ދީ 357 މީހުން މަރައިލުމާ ގުޅިގެން، ޕާކިސްތާނު މެދުވެރިވެގެން ކުރިއަށްދާ ސީޒްފަޔާ މަޝްވަރާތަކަށް ބޮޑު ގޮންޖެހުމެއް ކުރިމަތިވެ، އެމެރިކާ ލުބުނާނާ މެދު ގެންގުޅުނު ހިމޭން ސިޔާސަތު ބަދަލުކުރަން މަޖުބޫރުވެއްޖެއެވެ.
"އޮޕަރޭޝަން އިޓާނަލް ޑާކްނެސް" ގެ ނަމުގައި ހިންގި މި އޮޕަރޭޝަނުގައި ބޮރޫތުގެ މެދުތެރެ ހިމެނޭ ގޮތަށް އާންމުން ދިރިއުޅޭ ސަރަޙައްދުތަކަށް އެއްވެސް އިންޒާރެއް ނެތި ހަމަލާ ދިނެވެ. ލުބުނާނުގެ ކަމާބެހޭ އިދާރާތަކުން ބުނާ ގޮތުގައި 1,223 މީހުން ޒަޚަމްވެ، ގިނަ ބަޔަކު ކުނިބުނީގެ ދަށުގައި ތާށިވެފައި ތިބެދާނެއެވެ. ބޮރޫތުގެ ރެސިޑެންޝަލް ސަރަޙައްދެއްގައި ދިރިއުޅޭ މީހުން އެބީސީއަށް ބުނީ "މިތާ ހިޒްބުﷲ ގެ ބަޔަކު ނޫޅޭ" ކަމަށެވެ.
1990 ގައި ދާޚިލީ ހަނގުރާމަ ނިމުނު ފަހުން ލުބުނާނުގައި ހިންގި އެންމެ ބޮޑު ޤަތުލުޢާންމެއް ކަމުގައި މި ހަމަލާ ވެގެންދިޔައެވެ.
ރައީސް ޓްރަމްޕް ވަނީ ލުބުނާނުގައި ހިޒްބުﷲ އަކީ "ބޮޑު މައްސަލައެއް" ކަމަށް ސިފަކުރައްވައި، ޢާންމުންނަށް ލިބޭ ގެއްލުމާ މެދު ކަންބޮޑުވުމެއް ފާޅުނުކުރައްވައެވެ. "ޔޫކްރެއިނުގައި ނޫޅޭނެއޭ ހީވާނީ، އެކަމަކު އެ މީހުން އެ ތިބެނީ. ލުބުނާނުގައި ވެސް ތިބެނީ" ކަމަށް ޓްރަމްޕް ފާހަގަކުރެއްވިއެވެ. ވައިޓް ހައުސްގެ ތަރުޖަމާނު ކެރޮލީން ލީވިޓް ވެސް ވަނީ އިސްރާއީލަށް އެމެރިކާގެ އެހީ ފޯރުކޮށްދޭތޯ ކުރި ސުވާލަށް ޖަވާބު ދެއްވުމުން ރެކިވަޑައިގެންފައެވެ.
އިންޓަނޭޝަނަލް ކްރައިސިސް ގްރޫޕްގެ ޔޫއެސް ޕްރޮގްރާމް ޑައިރެކްޓަރު މައިކަލް ވާހިދް ހައްނާ އެބީސީއަށް ވިދާޅުވީ "ގިނަ ފަހަރު އެ ދުއްވަނީ އެމެރިކާގެ ބޯޓުތައް، ވައްޓާލަނީ ވެސް އެމެރިކާގެ ބޮންތައް" ކަމަށާއި "ހަނގުރާމައިގައި އުޅޭ އިސްރާއީލެއް، އެމެރިކާ އާއި އެމެރިކާގެ ހަތިޔާރު ސިނާޢަތާ ވަކިން އޮންނާނެ ގޮތެއް ނެތް" ކަމަށެވެ. މި ހަފުތާ ބަންދުގައި ޕާކިސްތާނުގައި ފެށޭ ސުލްހައިގެ މަޝްވަރާތަކުގައި ލުބުނާން ނުހިމެނެނީސް ކުރިއަށް ނުގެންދެވޭނެ ކަމަށް އީރާނުން ބުނެފައިވާ އިރު، ލުބުނާން ވެފައި ވަނީ މެދުއިރުމަތީގެ ޞުލްޙައިގެ މައިގަނޑު ގޮށަކަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް