ހަނގުރާމަ ހުއްޓާލުމުގެ އެއްބަސްވުން ނާޒުކު ހާލަތެއްގައި — ލުބުނާނަށް އިޒްރޭލުގެ ވަރުގަދަ ހަމަލާތައް ކުރިއަށް

އީރާނާއި އެމެރިކާއާ ދެމެދު އިޢުލާންކުރި ހަނގުރާމަ ހުއްޓާލުމުގެ އެއްބަސްވުން ނާޒުކު ހާލަތަކަށް ވެއްޓިއްޖެއެވެ. ލުބުނާނަށް އިޒްރޭލުން ދެމުންދާ ވަރުގަދަ ހަމަލާތައް ހުއްޓާނެ ކަމުގެ ނިޝާނެއް ނުފެންނައިރު، ހޮރުމޫޒް ކަނޑުއޮޅީގެ ހާލަތާ މެދު ވެސް ބޮޑެތި ސުވާލުތައް ވަނީ އުފެދިފައެވެ.

ހަނގުރާމަ ހުއްޓާލުމުގެ އެއްބަސްވުން އިޢުލާންކުރިތާ ގަޑިއިރުތަކެއް ފަހުން އިޒްރޭލުން ބެއިރޫތާއި ލުބުނާނުގެ އެހެން ސަރަޙައްދުތަކަށް ވަރުގަދަ ވައިގެ ހަމަލާތަކެއް ދީފައިވެއެވެ. ލުބުނާނުގެ ޞިއްޙީ ވުޒާރާއިން ބުނީ ބުދަ ދުވަހު 203 މީހުން މަރުވެ 1,000 އަށް ވުރެ ގިނަ މީހުން ޒަޚަމްވި ކަމަށެވެ. ފެބްރުއަރީ 28 ގައި ހަނގުރާމަ ފެށުނު ފަހުން އެއް ދުވަހެއްގައި އެންމެ ގިނަ ބަޔަކު މަރުވީ އެ ދުވަހުއެވެ.

އެއްބަސްވުމުގައި ލުބުނާނު ހިމެނޭ ކަމަށް އީރާނުން ބުނާއިރު، ނަތަންޔާހޫ އާއި ޓްރަމްޕް ބުނީ ލުބުނާނު ނުހިމެނޭ ކަމަށެވެ. އީރާނުގެ މަޖިލީހުގެ ރައީސް މުޙައްމަދު ބާޤިރް ޤާލީބާފް ބުރާސްފަތި ދުވަހު އެކްސްގައި އިންޒާރު ދީ ބުނީ، ހަނގުރާމަ ހުއްޓާލުމުގެ އެއްބަސްވުމާ ޚިލާފުވެއްޖެ ނަމަ "ވަރުގަދަ ރައްދެއް" ލިބޭނެ ކަމަށެވެ.

އީރާނުގެ ދައުލަތާ ގުޅުން ހުރި މީޑިއާތަކުން ބުރާސްފަތި ދުވަހު ޗާޓެއް ޝާއިޢުކޮށް، ހަނގުރާމައިގެ ތެރޭގައި އީރާނުގެ ރެވޮލިއުޝަނަރީ ގާޑުން ހޮރުމޫޒް ކަނޑުއޮޅީގައި މައިން ވަޅުލާފައިވާ ކަމަށް ދޭހަވާ ގޮތަށް ދައްކާފައިވެއެވެ. ހަނގުރާމަ ހުއްޓާލުމަށް ފަހު ވެސް ކަނޑުއޮޅިން ދަތުރުކުރި ކަމަށް ޓްރެކާ ޖައްސައިގެން ދައްކަނީ އެންމެ ހަތަރު އުޅަނދެވެ. ދުނިޔޭގައި ވިޔަފާރިކުރެވޭ ތެލާއި ގޭހުގެ 20 އިންސައްތަ ދައުރުވާ މި ކަނޑުއޮޅި ބަންދުވެފައި އޮތުމުން ބްރެންޓް ކްރޫޑް ތެޔޮ ފީފާއެއް 98 ޑޮލަރަށް އުފުލި، ހަނގުރާމަ ފެށުނު ފަހުން 35 އިންސައްތައިގެ އުފުލުމެއް ވަނީ ފެނިފައެވެ.

ހޮނިހިރު ދުވަހު ޕާކިސްތާނުގެ ވެރިރަށް އިސްލާމްއާބާދުގައި ސުލްހައިގެ މަޝްވަރާތައް ފެށުމަށް ވަނީ ހަމަޖެހިފައެވެ. އެމެރިކާގެ ވަފުދުގެ އިސްވެރިއަކީ ނައިބު ރައީސް ޖޭ.ޑީ ވެންސެވެ. ނަމަވެސް ޙައްލުކުރަންޖެހޭ ބޮޑެތި ޚިލާފުތައް ހުރީ ފުނިޖެހިފައެވެ. އޭގެ ތެރޭގައި ހޮރުމޫޒް ކަނޑުއޮޅީގެ ދަތުރުފަތުރު އާންމު ހާލަތަށް ގެނައުމާއި، އީރާނުގެ ނިއުކްލިއާ ޕްރޮގްރާމާއި މުއްސަނދިކޮށްފައިވާ ޔޫރޭނިއަމްގެ މައްސަލަ ހިމެނެއެވެ. އީރާނުގެ ނިއުކްލިއާ އިދާރާގެ ވެރިޔާ މުޙައްމަދު އިސްލާމީ ބުނީ ޔޫރޭނިއަމް މުއްސަނދިކުރުމުގެ ޙައްޤު ދިފާޢުކުރުމަކީ ސުލްހައިގެ ވާހަކަތަކުގައި ކޮންމެހެން ބޭނުން ކަމެއް ކަމަށެވެ.