N/A
ފ. ފީއަލީ ބަނދަރުގައި އަޅާފައި އޮތް ތެޔޮ އުފުލާ އުޅަނދެއްގައި މިއަދު ހެނދުނު ނުރައްކާތެރި އަލިފާނުގެ ހާދިސާއެއް ހިނގައިފިއެވެ.
މައުލޫމާތު ލިބިފައިވާ ގޮތުގައި މި ހާދިސާ ހިނގާފައިވަނީ 2026 އެޕްރީލް 09 ވާ ބުރާސްފަތި ދުވަހުގެ ހެނދުނު 09:15 ހާއިރުއެވެ.
މި ހާދިސާގެ ރިޕޯޓު ލިބުމާއެކު، އަލިފާންގަނޑު ނިއްވާލުމުގެ މަސައްކަތުގައި ފުލުހުންނާއި ކަމާބެހޭ އެކި މުއައްސަސާތަކުން އެ ސަރަހައްދުގައި މިހާރު ދަނީ ހަރަކާތްތެރިވަމުންނެވެ. މި ހާދިސާގައި ބިދޭސީއަކު ފިހިގެން އަނިޔާވެފައިވާތީ، އޭނާއަށް ފީއަލީ ސިއްހީ މަރުކަޒުގައި މިހާރު ދަނީ ފަރުވާ ދެމުންނެވެ.
މި އަލިފާނުގެ ހާދިސާގައި ތެޔޮ ބޯޓުގެ އިތުރުން ކައިރީގައި ހުރި އެހެން އުޅަނދުތަކަށްވެސް ބޮޑެތި ގެއްލުންތަކެއް ވަނީ ލިބިފައެވެ. އެގޮތުން ދެ ދޯންޏަކަށާއި ދެ ޑިންގީއަކަށް އެކި މިންވަރުގެ ގެއްލުން ލިބިފައިވާކަމަށް މިހާތަނަށް އެނގިފައިވެއެވެ.
މީގެ އިތުރުން، ބަނދަރު ސަރަހައްދުގައި ހުރި އައިސް ޕްލާންޓަށްވެސް މި ހާދިސާގެ އަސަރުކޮށް، އެތަނުގައި އަލިފާން ރޯވެފައިވެއެވެ. ނަމަވެސް އައިސް ޕްލާންޓަށް ލިބުނު ގެއްލުންތަކުގެ ތަފްސީލެއް އަދި ސާފެއް ނުވެއެވެ. ކަމާގުޅުންހުރި އިދާރާތަކުން ދަނީ މި ހާދިސާ ހިނގަން މެދުވެރިވި ސަބަބު އިތުރަށް ބަލައި ތަހުގީގު ކުރަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް