ތައިލެންޑާއި ރާއްޖޭގައި ތާށިވި ޑެންމާކް ފަތުރުވެރިން އަނބުރާ ގެންދިއުމުގެ މަސައްކަތް ޓީޔޫއައި އިން ފަށައިފި

މެދުއިރުމަތީގެ ވައިގެ ސަރަޙައްދު ބަންދުކުރުމާ ގުޅިގެން ދަތުރުތައް މެދުކެނޑި، ތައިލެންޑާއި ދިވެހިރާއްޖޭގައި ތާށިވި ޑެންމާކުގެ ފަތުރުވެރިން އަނބުރާ ޤައުމަށް ގެންދިޔުމުގެ މަސައްކަތް ދަތުރުފަތުރު ކުންފުނި ޓީޔޫއައި އިން ފަށައިފިއެވެ.

ޓީޔޫއައި އިން ބުނީ ތާށިވި ގިނަ ފަތުރުވެރިންނަކީ އެނބުރި ޤައުމަށް ދިޔުމަށް މެދުއިރުމަތި ހުރަސްކޮށް ދަތުރުކުރަން ރޭވިފައި ތިބި މީހުން ކަމަށެވެ. މެދުއިރުމަތީގެ ހަމަނުޖެހުންތަކާ ގުޅިގެން އެ ސަރަޙައްދުގެ ވައިގެ ބޮޑު ބައެއް ބަންދުކޮށްފައިވާތީ، ކުރިން ރާވާފައިވާ މަގުތައް ބޭނުންނުކުރެވުނީ ކަމަށް އެ ކުންފުނިން ބުންޏެވެ.

ޓީޔޫއައި އިން ހާމަކުރި ގޮތުގައި ރާއްޖޭގައި ތިބި ޑެންމާކުގެ ފަތުރުވެރިން ފުރަތަމަ ގެންދިޔައީ ޖަރުމަނުގެ ފްރެންކްފަރޓަށެވެ. އެ ތަނުގައި ރޭގަނޑު ހޭދަކުރެވޭނެ އިންތިޒާމް ހަމަޖައްސައިދިނުމަށް ފަހު ޑެންމާކަށް ދަތުރުކުރެވޭނެ ގޮތް ހެދީއެވެ. ތައިލެންޑުގައި ތާށިވި ފަތުރުވެރިން ގެންދިޔުމުގެ މަސައްކަތްވެސް ކުރަމުންދާ ކަމަށް ބުންޏެވެ.

ތައިލެންޑުގެ މައްސަލައިގައި ޓީޔޫއައި އިން ވަނީ ޑެންމާކުގެ ޚާރިޖީ ވުޒާރާ އާއި ތައިލެންޑުގެ ކަމާ ބެހޭ ފަރާތްތަކާ ގުޅައިގެން ވީހާ ވެސް ގިނަ ފަތުރުވެރިން އަނބުރާ ގެންދިޔުމަށް ބޭނުންވާ ހުއްދަތައް ހޯދާފައެވެ. ޝެޑިއުލް ފްލައިޓްތަކުގައި ތައިލެންޑަށް ދިޔަ ފަތުރުވެރިންނަށް ޗާޓަރު ފްލައިޓްތަކުގައި ފުރުމުގެ ހުއްދަ ޢާންމުކޮށް ނުލިބޭ ކަމަށް އެ ކުންފުނިން ފާހަގަކުރިއެވެ.

ޓީޔޫއައި އިން ބުނީ އެ ކުންފުނީގެ އެންމެ ބޮޑު އިސްކަމެއް ދެނީ ތާށިވި ފަތުރުވެރިން ފުރަތަމަ ޔޫރަޕަށް ގެންދިޔުމަށް ކަމަށާއި، ޔޫރަޕަށް ގެންދެވުމުން ޑެންމާކަށް ދިޔުމުގެ ދަތުރު ހަމަޖެއްސުން ވަރަށް ބޮޑަށް ފަސޭހަވާ ކަމަށެވެ.