އދ.ފެންފުށިން މަސްތުވާތަކެއްޗާ އެކު ދެމީހަކު ހައްޔަރުކޮށްފި

އދ.ފެންފުށީ ޕޮލިސް ސްޓޭޝަނުން ހިންގި އޮޕަރޭޝަނެއްގައި މަސްތުވާތަކެއްޗާއި އެކު އެރަށުން ދެމީހަކު ހައްޔަރުކޮށްފިއެވެ.

މިހިނގާ ސެޕްޓެންބަރ މަހުގެ 6 ވަނަ ދުވަހުގެ 12:19 އެހައިކަންހާއިރު ހިންގި އޮޕަރޭޝަނެއްގައި ހައްޔަރުކޮށްފައިވަނީ އުމުރުން 28 އަހަރުގެ މީހަކާއި 31 އަހަރުގެ މީހެކެވެ. މި ދެމީހުންނަކީވެސް ދިވެހި ފިރިހެނުންނެވެ.

މިދެމީހުން ހައްޔަރުކޮށް، އެމީހުން ދިރިއުޅޭ ގެ ބަލައިފާސްކުރިއިރު މަސްތުވާތަކެތި ކަމަށް ޝައްކުކުރެވޭ އެއްޗެއްހުރި ހަތް ރަބަރު ޕެކެޓު ފެނިފައިވެއެވެ. އދ. މާމިގިލި މެޖިސްޓްރޭޓް ކޯޓުން މިހާރު ވަނީ މި ދެމީހުން، މިނިސްޓްރީ އޮފް ހޯމްއެފެއާޒުން ކަނޑައަޅާ ތަނެއްގައި ބަންދުގައި ބޭތިއްބުމަށް 10 ދުވަހުގެ މުއްދަތު ދީފައެވެ.

މިމައްސަލަ އދ.މާމިގިލި ޕޮލިސް ސްޓޭޝަނުން މިހާރު ގެންދަނީ ތަހުގީގު ކުރަމުންނެވެ.