ޣައްޒާގައި އިސްތިއުމާރީ އިސްރާއީލުން ހިންގަމުންދާ ގަތުލުޢާންމުގެ ހަނގުރާމަ ކުށްވެރިކޮށް، އެ ސަރަޙައްދުގައި ހިންގާ ލާއިންސާނީ ޢަމަލުތަކަށް ޒިންމާވާ ކޮންމެ ފަރާތަކީ "ހަނގުރާމައިގެ ކުށްވެރިއެއް" ކަމަށް ޤަޠަރުގެ ބޮޑުވަޒީރު ޝައިޚް މުޙައްމަދު ބިން ޢަބްދުއްރަޙްމާން ބިން ޖާސިމް އާލް ޘާނީ ވިދާޅުވެއްޖެއެވެ.

ޤަޠަރުގެ ޚާރިޖީ ވަޒީރުކަން ވެސް ފުރުއްވާ ޝައިޚް މުޙައްމަދު މި ވާހަކަފުޅު ދެއްކެވީ އަންގާރަ ދުވަހު "ޕިއާސް މޯގަން އަންސެންސާޑް" ޕްރޮގްރާމުގައެވެ. އެ މަނިކުފާނު ވިދާޅުވީ 2023 ވަނަ އަހަރުގެ އޮކްޓޫބަރު ހަތެއްގައި ހަމާސް އިސްވެ އިސްރާއީލަށް ދިން ހަމަލާއަކީ "ގަތުލުޢާންމެއް" ކަމަށާއި އެކަން ކުށްވެރިކުރައްވާ ކަމަށެވެ. ނަމަވެސް އެ ހަމަލާއަށް ރައްދުގައި އިސްރާއީލުން ދެމުންދާ ޖަވާބަކީ އެއްވެސް ހަމައަކުން ބަލައިގަނެވޭނެ ކަމެއް ނޫން ކަމަށް ވިދާޅުވިއެވެ.

Advertisement

"ހޮސްޕިޓަލްތަކަށް ހަމަލާ ދީފި، ސްކޫލްތަކަށް ހަމަލާ ދީފި. ކޮންމެ ފަދަ ހުއްޖަތެއް ދެއްކިޔަސް، މީގެ ތެރެއިން އެއްވެސް ކަމެއް ޖަސްޓިފައި ކުރެވޭނެ ގޮތެއް ނެތް،" ޝައިޚް މުޙައްމަދު ވިދާޅުވިއެވެ.

2025 ވަނަ އަހަރުގެ އޮކްޓޫބަރުގައި ޢަމަލުކުރަން ފެށި "ހަމަލާ ބަދަލުކުރުން ހުއްޓައިލުމުގެ އެއްބަސްވުމާ" އިސްރާއީލުން ގާތްގަނޑަކަށް ކޮންމެ ދުވަހަކުހެން ޚިލާފުވަމުންދާ ކަމަށް ވެސް އެ މަނިކުފާނު ވިދާޅުވިއެވެ. އެ އެއްބަސްވުމަށް ފަހު ޣައްޒާގެ ބިމުން 1,400 އަށް ވުރެ ގިނަ ފަލަސްޠީނު ރައްޔިތުން ޝަހީދުކޮށްލާފައިވާ ކަމަށެވެ.

"ބިމުގެ ގާތްގަނޑަކަށް 70 އިންސައްތަ އިސްރާއީލް ސިފައިން ހިފާފައި އެ އޮތީ، އެ ތަންތަނަށް މީހުން ދިއުން ވެސް މަނާކޮށްފައި. އެއްބަސްވުމުގެ ޝަރުޠުތައް އިސްރާއީލުން ފުއްދަމުންނެއް ނުދޭ. މިކަމުން ދައްކައިދެނީ ތަފާތު ނިޔަތެއް އޮތް ކަން،" ޝައިޚް މުޙައްމަދު ވިދާޅުވިއެވެ.

ހަމަލާ ބަދަލުކުރުން ހުއްޓައިލުމުގެ އެއްބަސްވުމެއް ހެދުމަށް ޤަޠަރުން ކުރި މަސައްކަތް "ހަނގުރާމައިގެ ފުރަތަމަ ދުވަހުން ފެށިގެން" އިސްރާއީލުން ހުރަސް އަޅަމުންދިޔަ ކަމަށް ވެސް ވިދާޅުވިއެވެ. އަދި 2025 ވަނަ އަހަރު ހަމާސްގެ އިސް އޮފިޝަލުންނާ ގުޅޭ މަޝްވަރާތައް ހިނގަމުންދިޔަ ދަނޑިވަޅެއްގައި ޤަޠަރުގެ ވެރިރަށް ދޯހާއަށް އިސްރާއީލުން ދިން ހަމަލާ ވެސް ހަރުކަށި ޢިބާރާތުން ކުށްވެރިކުރެއްވިއެވެ.