މެއިން ތަދު އިހުސާސްވާ ކޮންމެ ފަހަރަކު އެއީ ހިތުގެ ބައްޔެއްގެ އަލާމާތެއްތޯ ނުވަތަ ބަނޑުން އެސިޑް މައްޗަށް އެރުމުގެ ސަބަބުން ވާ ކަމެއްތޯ ދެނެގަތުމަކީ ގިނަ ބަޔަކު ހާސްވާ ކަމެކެވެ.

ދެ ހާލަތުގައި ވެސް މެއިން ތަދު އިހުސާސްވާއިރު މި ދެ ކަމުގެ ތަފާތު ދެނެގަތުމަކީ ފުރާނަ ސަލާމަތްކުރެވިދާނެ ކަމެކެވެ. އެހެންކަމުން މި ކަމާ ބެހޭ ގޮތުން ތަޖުރިބާކާރު ޑޮކްޓަރުން ދެއްވާ އިރުޝާދުތައް ދެނެގަތުން މުހިންމެވެ.

އިންޑިއާގެ ސާ އެޗްއެން ރިލަޔަންސް ފައުންޑޭޝަން ހޮސްޕިޓަލުގެ ކާޑިއޮލޮޖީ ޑިޕާޓްމެންޓުގެ ޑައިރެކްޓަރު ޑރ. އަޖިތު މެނަން ބުނެފައިވާ ގޮތުގައި ކާތަކެތި ހިނގާ ހޮޅި (އީސޮފެގަސް) އޮންނަނީ ހިތުގެ ބިއްދޮށުގައި ކަމުން އެސިޑް ރިފްލަކްސްގެ ތަދު ހިތުގެ ތަދާ ވަރަށް ބޮޑަށް ވައްތަރުވެއެވެ. ދެ ހާލަތުގައި ވެސް މޭގެ މެދުތެރެއިން އުނދަގޫ އިހުސާސްވާތީ ބަލިމީހުންނަށާއި ބައެއް ފަހަރު ޑޮކްޓަރުންނަށް ވެސް ތަފާތު ދެނެގަތުން އުނދަގޫވާ ކަމަށް އޭނާ ބުނެފައިވެ އެވެ.

ޑރ. އެލްއެޗް ހީރާނަންދާނީ ހޮސްޕިޓަލުގެ ގެސްޓްރޮއެންޓެރޮލޮޖީ ޑައިރެކްޓަރު ޑރ. ގީތާ މަލްކަން-ބިއްލާ ވެސް ބުނެފައިވާ ގޮތުގައި ދެ ގުނަވަން ވެސް ގުޅިފައިވަނީ އެއް ނާރުގެ ނެޓްވޯކަކުން ކަމަށް ވާތީ ރިފްލަކްސް އިން ދިލަ ނެގުމާއި ފިތޭ ކަހަލަ އިހުސާސްތައް ކުރެވެއެވެ.

ޑރ. އަޖިތު ބުނީ ގޮތުގައި ތެޔޮ ނުވަތަ ކުޅި ކެއުމަކަށް ފަހު މޭކަށިގަނޑުގެ ފަހަތުން ދިލަ ނެގުން އަނގައިން ހުތް ރަހަ ލުން ވައި ލެވުން ނުވަތަ ކެއި އެއްޗެހި އަނބުރާ އައުން ފަދަ ކަންކަން ފެނިއްޖެ ނަމަ ގިނަ ފަހަރަށް އެއީ ރިފްލަކްސް އެވެ. ޑރ. ގީތާ ބުނާ ގޮތުގައި ބަނޑުން ފެށިގެން ކަރާ ހަމައަށް ދިލަ ނެގުމާއި ގުދުވެ ނުވަތަ އޮށޯވެ އޮތުމުން ގޯސްވުމާއި އެންޓެސިޑުން ރަނގަޅުވުމަކީ ރިފްލަކްސްގެ ފާހަގަތަކެވެ.

ނަމަވެސް ހިނގާއިރު ނުވަތަ ހަށިގަނޑަށް ބާރުލާއިރު މެއިން ތަދު ވާ ނަމަ ކަރަށް ދެ އަތަށް ނުވަތަ ދަތްދޮޅިއަށް ތަދު ފެތުރޭ ނަމަ އެއީ ހިތާ ގުޅިފައިވާ ތަދެއް ކަމަށް ބެލެވޭ ކަމުގައި ޑރ. އަޖިތު އިންޒާރު ދެއެވެ. ޑރ. ގީތާ ބުނާ ގޮތުގައި ދިލަ ނެގުމުގެ ބަދަލުގައި ފިތޭ ކަހަލަ ނުވަތަ ބަރު އެއްޗެއް ބާއްވާފައި ހުންނަ ކަހަލަ އިހުސާސެއް ވުމާއި ނޭވާ ކުރުވުމާއި ފިނި ދާ ހިއްލުމާއި ބޯ އެނބުރުން ފެނިއްޖެ ނަމަ ލަސްނުކޮށް ޑޮކްޓަރަށް ދައްކަން ޖެހެއެވެ.

ހަކުރު ބައްޔާއި ލޭ މައްޗަށް ދިޔުމާއި ސިނގިރޭޓު ބުއިމާއި ކޮލެސްޓްރޯލް މައްޗަށް ދިޔުން ފަދަ ރިސްކު ފެކްޓާ ހުންނަ މީހުން ޚާއްޞަ ސަމާލުކަމެއް ދޭން ޖެހޭ ކަމަށް ވެސް ދެ ޑޮކްޓަރުން ފާހަގަކުރައްވައެވެ.

ޑރ. ގީތާ އިތުރަށް ބުނީ އެންޓެސިޑުން ލުއި ލިބުމަކީ ހިތުގެ މައްސަލައެއް ނެތް ކަމުގެ ޔަގީންކަމެއް ނޫން ކަމަށެވެ. ހިތުގެ ތަދު ކުއްލިއަކަށް ފެށިފައި ކުއްލިއަކަށް ހުއްޓެއެވެ. ބައެއް ފަހަރު އަންހެނުންނާއި ދުވަސްވީ މީހުންނާއި ހަކުރު ބަލީގެ މީހުންނަށް ހާޓް އެޓޭކެއްގެ އާދައާ ޚިލާފު އަލާމާތްތައް ފެނިދާނެއެވެ. ހަޖަމުގެ ނިޒާމު ހަލާކުވުން ނުވަތަ ވަރުބަލިވެ ހޮޑުލެވުން ފަދަ ކަންކަމެއް ވެދާނެ ކަމަށް ޑރ. ގީތާ ބުނެފައިވެއެވެ.

ޑރ. އަޖިތު ބުނީ ގޭގައި ތިބެ ބަނޑުގައި ހެދޭ ވައެއް ކަމަށް ހީކޮށް ތަފާތު ބޭސް ބޭނުންކުރުމަށް ފަހު ޑޮކްޓަރަށް ދައްކާ އިރު އީސީޖީ ހެދީމާ ހާޓް އެޓޭކް ޖެހިފައި ހުރިކަން އެނގޭ ހާލަތްތައް ދިމާވާ ކަމަށެވެ. ބައެއް ފަހަރު މޭގެ ތަދުގެ ސަބަބުން ވައި ލެވޭކަމަށާއި ވައި ލެވުމުން ލުއި ވާތީ ބަލިމީހުން އެކަން ސީރިއަސް ކަމެއްގެ ގޮތުގައި ނުދެކޭ ކަމަށެވެ. 

މެއިގައި ރިއްސާ ސަބަބާ މެދު ޝައްކެއް ވާ ނަމަ އީސީޖީ ނުވަތަ ޓްރޮޕޮނިން އައި ލޭގެ ޓެސްޓުން ހިތުގެ މައްސަލައެއް ހުރިތޯ ކަށަވަރުކުރެވޭނެ ކަމަށް ތަޖުރިބާކާރުން ބުނެ އެވެ. ތަކުރާރުކޮށް މެއިގައި ރިއްސާ ނަމަ ހާޓްބާން ކަމަށް ހީވި ނަމަވެސް ޑޮކްޓަރަކާ ހި ހިއްސާކޮށް، ފުރަތަމަ ހިތުގެ މައްސަލައެއް ނެތް ކަން ޔަގީންކުރާށެވެ.

ހިތުގެ ބަލިން ފުރާނައަށް ނުރައްކާވެދާނެއެވެ. އެކަމަކު އެސިޑް ރިފްލަކްސް އިން ފުރާނައަކަށް ގެއްލުމެއް ނުވެއެވެ. އެހެންކަމުން މެއަށް ތަދު ވާ ނަމަ ޚާއްޞަކޮށް ހިތުގެ ބައްޔަށް ރިސްކު ފެކްޓާ ހުންނަ ފަރާތްތައް ފަރުވާ ހޯދުން ލަސްނުކޮށް ޑޮކްޓަރެއްގެ ލަފައެއް ހޯދުމަކީ ވަރަށް މުހިންމު ކަމެކެވެ.