ހޮޓެލް އޭޝިއާ މޯލްޑިވްސް 2026 އެގްޒިބިޝަނުގައި އެސްޓީއޯގެ ޖެނެރަލް ޓްރޭޑިން ޕީޕަލްސް ޗޮއިސް އަދި އެނާޖީ ހިމެނޭ ގޮތަށް ތިން ދާއިރާއެއް ދައްކާލާނެ ކަމަށް އެ ކުންފުނިން ބުނެފި އެވެ.

މި އެގްޒިބިޝަން ކުރިޔަށް ދަނީ ހުޅުމާލޭ ސިންތެޓިކް ޓްރެކްގައި އިއްޔެއިން ފެށިގެން މިމަހުގެ 30 ގެ ނިޔަލަށެވެ.

Advertisement

އެސްޓީއޯ ސުޕާމާކެޓުން ލިބެން ހުންނަ ޕްރޮޑަކްޓްތައް ބޭނުންކޮށްގެން ވަގުތުން ލުއި ކާނާ ތައްޔާރުކޮށްދޭ ސްޓޭޝަނެއް އެ ސްޓޯލްގައި ޤާއިމުކޮށްފައި ހުންނާނެ ކަމަށް އެސްޓީއޯއިން ބުނެފައިވެއެވެ. އެގްޒިބިޝަން ކުރިއަށްދާ ތިން ދުވަހުވެސް ކޮފީސްޓޭޓް ބްރޭންޑުގެ ވަކި ބުއިންތަކެއް ހިލޭ ލިބޭނެ ކަމަށާއި އެސްޓީއޯއިން ރާއްޖެއަށް އެތެރެކުރާ އެކި ޕްރޮޑަކްޓްތަކާ ބެހޭ މަޢުލޫމާތު ސްޓޯލުން ފޯރުކޮށްދޭނެ ކަމަށްވެސް އެ ކުންފުނިން ހާމަކޮށްފައިވެއެވެ.

މީގެ އިތުރުން އެގްޒިބިޝަނުގެ ދެވަނަ ދުވަހު އެސްޓީއޯއިން މުޅިން އައު ބްރޭންޑެއް ތަޢާރަފުކުރުމަށް ވަނީ ރާވައިފައެވެ. އެ ބްރޭންޑުގެ ޕްރޮޑަކްޓް ބޭނުންކޮށްގެން ތައްޔާރުކުރާ އައިސްކްރީމާއި ފޮނި ކާތަކެތީގެ ރަހަ ބެލުމުގެ ފުރުޞަތު ސްޓޯލަށް ޒިޔާރަތްކުރާ ފަރާތްތަކަށް ލިބޭނެއެވެ. އެނާޖީ ދާއިރާއިން ބައިވެރިވާ ބައިގައި ރިޒޯޓު ކަސްޓަމަރުންނަށް ޚާއްޞަކޮށް ތެޔޮ އުފުލައިދިނުމުގެ ޚިދުމަތްތަކާ ގުޅޭ މަޢުލޫމާތު ފޯރުކޮށްދީ އެ މާކެޓުގައި ކަސްޓަމަރުންގެ ބޭނުންތައް ހުރި ނެތް ގޮތް ދެނެގަތުމަށް ހަމަޖެހިފައިވެއެވެ.

ސްޓޯލަށް ޒިޔާރަތްކޮށް ރަޖިސްޓަރީ ކުރާ ފަރާތްތަކުގެ މެދުގައި ކޮންމެ ދުވަހަކު ގުރުއަތު ނަގައި ނަސީބުވެރި ފަރާތެއް ހޮވައި އިނާމު ދިނުމަށް "ރެޖިސްޓާ އެންޑް ވިން" ގެ ނަމުގައި ޕްރޮމޯޝަނެއް ހިންގުމަށް ވަނީ ނިންމައިފައެވެ. ހަމައެއާއެކު ޕީޕަލްސް ޗޮއިސް ޕޭޖް ފޮލޯ ކުރާ ފަރާތްތަކުގެ ތެރެއިން ނަސީބުވެރި އެއް ފަރާތަކަށް ޑިޝްވޮޝަރެއް ލިބުމުގެ ފުރުޞަތުވެސް ހުޅުވައިލާފައިވެއެވެ.