ޔޫއޭއީގެ އީގަލް ހިލްސް ކުންފުންޏާ ގުޅިގެން ރަސްމާލޭގައި ކުރިއަށް ގެންދާ "މޯލްޑިވްސް ވޯޓާ ފްރޮންޓް އެންޑް މެރީނާ" މަޝްރޫޢުގެ ދަށުން ރަސްމާލޭގެ ބިމުގެ މިލްކުވެރިކަން ދިވެހި ދައުލަތް ނޫން އެހެން ފަރާތަކަށް ނުލިބޭނެ ކަމަށް ހައުސިން މިނިސްޓަރު ޑރ. ޢަބްދުﷲ މުއްތަލިބު މިއަދު ވިދާޅުވެއްޖެއެވެ.

ސޯޝަލް މީޑިއާގައި ދެކެވެމުންދާ ވާހަކަތަކަށް ރައްދު ދެއްވައި މިނިސްޓަރު ފާހަގަކުރެއްވީ ރަސްމާލެއިން ޕްރޮޕަޓީއެއް ގަންނަ ފަރާތަކަށް މިލްކުވާނީ ހަމައެކަނި އެ ޕްރޮޕަޓީ ކަމަށާއި ބިމެއް ނޫން ކަމަށެވެ. އެ އެއްބަސްވުމުގެ ދަށުން ފްރީހޯލްޑެއް ނޯންނާނެ ކަމަށް ވެސް މުއްތަލިބު ވިދާޅުވެފައިވެއެވެ.

Advertisement

އެ ގޮތުން ޕްރޮޕަޓީ ގަތް މީހާ ނިޔާވެއްޖެ ޙާލަތެއްގައި ވާރިސުންނަށް އެ ތަނުގެ މިލްކުވެރިކަން ބަދަލުވާނީ ސަރުކާރުން ކަނޑައެޅި ފީއެއް ދައްކައި ކަނޑައެޅިފައިވާ ކަންކަން ބެލުމަށް ފަހު ކަމަށް ވެސް މިނިސްޓަރު ވިދާޅުވެފައިވެއެވެ.

"އެހެންކަމުން އޮޓަމެޓިކުން ވާރުތަވާނޭ ކަމަށް ބުނުމަކީ ހަގީގަތާ ހިލާފު ވާހަކައެކެވެ. ރާއްޖޭގައި ހުރި ބޭރު ފަރާތްތަކުގެ ރިސޯޓުތަކާއި ވިޔަފާރިތަކަކީ ވެސް ވިއްކާ ބަދަލުކޮށް ވާރުތާ މުދާތަކެކެވެ" އެކްސްގައި ކުރެއްވި ޕޯސްޓެއްގައި މުއްތަލިބު ވިދާޅުވެފައިވެއެވެ.

ވިސާއާ ގުޅޭ ކަންބޮޑުވުންތަކާ ބެހޭ ގޮތުން މިނިސްޓަރު ވިދާޅުވެފައި ވަނީ ރަސްމާލެއިން ޕްރޮޕަޓީ ގަތުމަކީ ބޭރު މީހަކަށް އޮޓޮމެޓިކުން ވިސާ ލިބޭ ކަމެއް ނޫން ކަމަށެވެ. ވިސާ ދޫކުރުމާއި ބާޠިލުކުރުމުގެ ބާރު ޤާނޫނީ ގޮތުން ލިބިގެން ވަނީ މޯލްޑިވްސް އިމިގްރޭޝަނަށް ކަމަށް ވެސް މުއްތަލިބު ވިދާޅުވެފައިވެއެވެ. ހަމައެހެންމެ ރަސްމާލޭގެ އެއްވެސް ޕްރޮޕަޓީއެއް ސަރުކާރުގެ ހުއްދައެއް ނެތި އެއް ފަރާތުން އަނެއް ފަރާތަށް ގަނެވިއްކުމުގެ ފުރުޞަތު ނޯންނާނެ ކަމަށް ވެސް މިނިސްޓަރު ފާހަގަކުރެއްވެވިއެވެ.

"ދިވެހި ދައުލަތަކީ ފަހުރުވެރި މިނިވަން ދައުލަތެކެވެ. ދިވެހި ދައުލަތް ތަނަވަސްވެ ތަރައްގީ ވަމުން ދިއުމަކީ އިސްތިގުލާލު ވަރުގަދަވެ އެހެން ގައުމުތަކުގެ ނުފޫޒުން ސަލާމަތްވެ އޮތުމަށް މުހިއްމު ކަމެކެވެ. ދިވެހި ދައުލަތް މުއްސަދިވުމަކީ ދިވެހިރާއްޖެއަށް ނުފޫޒު ފޯރުވަން ބޭނުންވާ ފަރާތްތަކުން އެދޭނެ ކަމެއް ނޫނެވެ" މިނިސްޓަރު ވިދާޅުވެފައިވެއެވެ.

މި މަޝްރޫޢަކީ ދިވެހިރާއްޖޭގެ ތާރީޚުގައި ހިންގާ ބޭރުގެ އެންމެ ބޮޑު އިންވެސްޓްމަންޓް މަޝްރޫޢެވެ.