ރަސްމާލޭގައި "މޯލްޑިވްސް ވޯޓާފްރޮންޓް އެންޑް މެރީނާ މަޝްރޫއު" ހިންގާނީ އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން ކަމަށް ބަންޑާނަ ނައިބު އަހުމަދު އުޝާމް ވިދާޅުވެއްޖެ އެވެ.

އުޝާމް މިހެން ވިދާޅުވީ އެ މަޝްރޫއު ހިންގަން ޔުނައިޓެޑް އަރަބް އެމިރޭޓްސް (ޔޫއޭއީ)ގެ އީގަލް ހިލްސްއަށް ރަސްމާލެއިން 500 ހެކްޓަރުގެ ބިން 99 އަހަރަށް ކުއްޔަށް ދިނުމަކީ އެ ބިން ވިއްކާލުން ކަމަށް ވިދާޅުވެ ކުރީގެ ރައީސް ކުރެއްވި ތުހުމަތުތަކާއި ގުޅިގެން ރައްދު ދެއްވަމުންނެވެ.

Advertisement

އުޝާމް އެކްސްގައި ވިދާޅުވީ އެ މަޝްރޫއު ކުރިޔަށް ގެންދިއުމަށް މިހާތަނަށް ސޮއިކޮށްފައި އޮތީ ހަމައެކަނި ކޮމާޝަލް ޓާމްސް ކަނޑައަޅާ ލެޓާ އޮފް އިންޓެންޓެއްގައި ކަމަށެވެ. ޢަމަލީ މަސައްކަތް ފެށުމުގެ ކުރިން އެ ޝަރުތުތަކުގެ މައްޗަށް ބިނާކޮށް އިތުރު މަޝްވަރާތައް ކުރެވި ޑެފިނިޓިވް އެގްރީމެންޓްތަކެއްގައި ސޮއިކުރަންޖެހޭ ކަމަށާއި މިކަމާ ގުޅުން ހުރި ޤާނޫނުތައް ރައްޔިތުންގެ މަޖިލީހުން ފާސްކުރަންޖެހޭނެ ކަމަށް ވިދާޅުވި އެވެ.

އުޝާމް ވިދާޅުވީ ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ރަސްމާލެ މަޝްރޫޢުގައި ނުހިމެނޭނެ ކަމުގެ ޔަޤީންކަން ސަރުކާރުން ދޭކަމަށެވެ. 

ޔާމީންގެ ވާހަކަފުޅާއި ގުޅިގެން އުޝާމް އިތުރަށް ވިދާޅުވީ ޓޫރިސްޓް ރިޒޯޓުތައް ކުއްޔަށް ދޫކުރެވޭ މުއްދަތު 99 އަހަރަށް އިތުރުކުރީ 2015 ވަނަ އަހަރު ރައީސް ޔާމީންގެ ވެރިކަމުގައި ކަމަށެވެ.

ރާއްޖޭގެ ފަތުރުވެރިކަމާ ގުޅޭ ޤާނޫނީ އޮނިގަނޑު ފުރަތަމަ ތައްޔާރުކުރެވުނީ 1999 ވަނަ އަހަރުއެވެ. އެ ޤާނޫނުގެ ދަށުން އޭރު ރިޒޯޓުތައް ދޫކުރެވެނީ ގިނަވެގެން 25 އަހަރު ދުވަހުގެ މުއްދަތަކަށެވެ. ރައީސް ނަޝީދުގެ ވެރިކަމުގައި 2010 ވަނަ އަހަރު ގެނެވުނު އިސްލާހަކުން އެ މުއްދަތު 50 އަހަރަށް ދިގުކުރެވުނެވެ. އެއަށްފަހު 2015 ވަނަ އަހަރު ރައީސް ޔާމީންގެ ދައުރުގައި އެ ޢަދަދު 99 އަހަރަށް ބަދަލުކޮށްފައިވެއެވެ.

ޓޫރިޒަމާ ބެހޭ ޤާނޫނުގެ އަށް ވަނަ މާއްދާ ބުނާ ގޮތުން 99 އަހަރުގެ ކުލީގެ މުއްދަތު ހަމަވުމުން އެ ރަށެއްގައި ކޮށްފައި ހުރި އިންވެސްޓްމެންޓުގެ ޖުމްލަ އަގުން ދައުލަތަށް ދައްކަންޖެހޭ ބައި ކެނޑުމަށްފަހު ބާކީ އޮންނަ ޢަދަދު އިންވެސްޓަރަށް ސަރުކާރުން ދައްކަން ލާޒިމުކުރެއެވެ.