މެލޭޝިއާގައި ތިބި މިޔަންމާގެ ރޮހިންޖާ ދަރިކޮޅުގެ 5،000 އަށްވުރެ ގިނަ މީހުން އަނބުރާ ފޮނުވާލުމުގެ މަސައްކަތް މިއަދު ފަށައިފި އެވެ.

އެމީހުން ފޮނުވާލުމުގެ މަސައްކަތް ފެށީ މެލޭޝިއާ އާއި މިޔަންމާގެ އަސްކަރީ ވެރިޔާ މިން އައުން ހްލައިން އާ އެކު ވެފައިވާ އެއްބަސްވުމެއްގެ ދަށުންނެވެ. ރިޕޯޓުތައް ބުނާ ގޮތުގައި އެމީހުން އަނބުރާ މިޔަންމާއަށް ގެންދަނީ މިޔަންމާ ކަނޑުގެ ސިފައިންގެ ތިން އުޅަނދެއްގައި އެވެ.

Advertisement

އޭގެ ތެރެއިން ފުރަތަމަ ބުރުގައި 1,476 މީހުން މެލޭޝިއާއިން ބޭރުކުރުމަށް ވަނީ ހަމަޖެހިފައެވެ. މެލޭޝިއާއިން ބުނީ އެމީހުން އަނބުރާ އަމިއްލަ ގައުމަށް ފޮނުވާލަނީ އެކަމަށް އެދިފައިވާތީ ކަމަށެވެ.

ނަމަވެސް މިކަން އދ.ގެ ރެފިއުޖީ އެޖެންސީން ގަބޫލު ނުކުރާއިރު އެ މީހުންނާ ބައްދަލުކުރުމުގެ ފުރުސަތު ދީފަނުވާކަމަށް އެ އެޖެންސީން ބުނެފައިވެ އެވެ.

އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުން ބުނާ ގޮތުގައި އެ މީހުންނަށް އެނބުރި ގޮސް ކުރިމަތިލާން ޖެހޭނީ އަނިޔާވެރިކަމާއި ގަދަކަމުން ސިފައިންގެ ޚިދުމަތަށް ނެރުމާއެވެ. ފޮނުވައިލެވޭ މީހުންގެ ތެރޭގައި ގިނައީ މިޔަންމާގައި ރައްޔިތުންގެ ގޮތުގައި ބަލައިނުގަންނަ އަނިޔާ ލިބެމުންދާ މުސްލިމު ދަރިކޮޅެއް ކަމަށްވާ ރޮހިންޖާ ދަރިކޮޅުގެ މީހުންނެވެ.

ރޮހިންޖާ ރެފިއުޖީންގެ ޙައްޤުތަކަށް ވަކާލާތުކުރާ މީހުން ބުނެފައިވާ ގޮތުގައި އެމީހުން އަމިއްލަ ގެއަށް ވަދެވޭނެ ދުވަހެއްގެ ހުވަފެން ދެކޭ ކަމަށެވެ. ނަމަވެސް އެނބުރި ދާން ބޭނުންވަނީ އެތަން ރައްކާތެރިވެފައި އޮތުމުން އަމިއްލަ އިހުތިޔާރުގައި ކަމަށާއި ގަދަކަމުން ފޮނުވާލައިގެން ދާން ބޭނުންނުވާ ކަމަށެވެ.

މި ނިންމުމާ ދެކޮޅަށް ބައިނަލްއަޤުވާމީ ފެންވަރުގައި ފާޑުކިޔުން އަމާޒުވެފައިވާ އިރު ރޮހިންޖާ ދަރިކޮޅުގެ މީހުން ރައްކާތެރިކަމާ އެކު މިޔަންމާއަށް އެނބުރި ގެންދެވޭނެ ގޮތެއް ދެ ޤައުމުންވެސް ހާމަކޮށްފައެއް ނުވެއެވެ.