މި ސަރުކާރުގެ ދެ އަހަރާއި ބައިގެ ތެރޭގައި 1.5 ބިލިއަން ރުފިޔާގެ މަސްތުވާތަކެތި ހޯދާފައިވާ ކަމަށާއި އެއީ ރެކޯޑު އަދަދެއް ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

މިނިސްޓަރު މިހެން ވިދާޅުވީ ޕީއެސްއެމްއާއި ސަރުކާރާއި ގުޅިގެން ކުރިޔަށް ގެންދާ އަހާ ފޯރަމްގައި ވާހަކަ ދައްކަވަމުންނެވެ.

Advertisement

މިނިސްޓަރު ވިދާޅުވީ އޭގެ ތެރެއިން ބޮޑުބަޔަކީ މަގުމަތިން ހޯދާފައިވާ މަސްތުވާތަކެތި ކަމަށް ވިދާޅުވި އެވެ. އޭނާ ވިދާޅުވީ މަސްތުވާތަކެތި ހޯދުމަށް މި ސަރުކާރުން ކުރި މަސައްކަތާއި ލިބުނު ކުރިއެރުމަކީ ދެ އަހަރާއި ބައިގެ ތެރޭގައި މީގެ ކުރީގެ އެއްވެސް ސަރުކާރަކަށް ލިބުނު ކުރިއެރުމެއް ނޫން ކަމަށެވެ.

މަސްތުވާތަކެތި އަތުލައިގަތުމަށް ހިންގާ ކުރާ އިތުރު މަސައްކަތްތަކުގެ ތެރޭގައި ޑްރަގް ކެފޭތައް ބަންދު ކުރުމަށް ހިންގާ އޮޕަރޭޝަންވެސް ފުޅާ ދާއިރާއެއްގައި ކުރިޔަށްދާކަން މިނިސްޓަރު ފާހަގަ ކުރެއްވި އެވެ. އެގޮތުން އަންނަ ނޮވެމްބަރު މަހުގެ ނިޔަލަށް ރާއްޖޭގައި ހިންގާ ހުރިހާ ޑްރަގް ކެފޭތަކެއް ބަންދު ކޮށް ނިންމާލެވޭނެ ކަމަށް ވިދާޅުވި އެވެ.

މިނިސްޓަރު ވިދާޅުވީ ބައެއް ގޭގައި ތަކުރާރުކޮށް ޑްރަގް ކެފޭތައް ހިންގަމުންދާ ކަމަށެވެ. އެއީ ވަރަށް ބޮޑު ކަންބޮޑުވުމެއް ކަަން ފާހަގަ ކުރައްވާ ވިދާޅުވީ ގޭގައި ހިންގާ ޑްރަގް ކެފޭތަައް ހުއްޓުވުމުން އަނެއްކާ އެހެން ބަޔަކު އެތަނުގައި އެކަން ފަށާކަމަށެވެ.

އެކަންކަމަށް ނިމުން ގެނައުމަށް ހަރުދަނާ މަސައްކަތްތަކެއް ކުރަމުންދާ ކަމަށް ވިދާޅުވި އެވެ.

މި ވޭތުވެދިޔަ ހަތަރު މަހެއްހާ ދުވަހުގެ ތެރޭގައި ޑްރަގް ކެފޭގެ ގޮތުގައި ހިންގަމުންދާ 17 ތަނެއް ބަންދުކޮށްފައިވެ އެވެ. އޭގެ ތެރޭގައި މާލޭގެ 12 ތަނަކާއި، އައްޑޫ ސިޓީގެ ހަތަރު ތަނެއްގެ އިތުރުން ފުވައްމުލަކު ސިޓީގެ ތަނެއް ބަންދުކޮށްފައިވެ އެވެ.