އދ. ގެ ޢާންމު މަޖިލީހުގެ 81 ވަނަ ދައުރުގެ ޢާންމު ބަހުސްގައި އިސްތިއުމާރީ އިސްރާއީލުގެ ތަޤުރީރާ ދިމާކޮށް އިހުތިޖާޖުގެ ގޮތުން ދިވެހިރާއްޖޭގެ ވަފުދު މަޖިލީހުން ނުކުމެއްޖެއެވެ.

ރިޕޯޓުތައް ބުނާގޮތުގައި ރާއްޖެ ހިމެނޭހެން އެ ބައްދަލުވުމުގައި ބައިވެރިވި 77 ގައުމަކުން ބައްދަލުވުން ދޫކޮށް ބޭރަށް ނުކުތެވެ. ނަތަންޔާހޫ އެކަމާ ރުޅި އައިސްހުރެ ތަގުރީރު ކުރި އިރު އެމެރިކާގެ ނިއުޔޯކްގައި އޭނާއާއި ދެކޮޅަށް ވަރުގަދަ އަށް މުޒާހަރާ ކުރަމުންދިޔަ އެވެ.

Advertisement

ރާއްޖެއިން އަމަލު ކުރި ގޮތާއި ބެހޭގޮތުން ފޮރިން މިނިސްޓަރު އިރުތިޝާމް އާދަމް ވިދާޅުވީ ބައިނަލްއަޤުވާމީ ޤާނޫނާއި އިންސާފު ހުރިހާ ޤައުމަކަށް ހަމަހަމައަށް ހިނގަންޖެހޭ ކަމަށާއި ޤާނޫނަށް ވުރެ މަތީގައި އެއްވެސް ޤައުމަކަށް ނޯވެވޭނެ ކަމަށް ރާއްޖެއިން ގަބޫލު ކުރާކަމަށެވެ. އެ އުސޫލުތައް ނިކަމެތިކުރާ ޢަމަލުތައް ބަލައިގަނެ ޢާންމުކުރުމަށް ރާއްޖެ ހާޒިރުވެ ނުތިބޭނެ ކަމަށް ވެސް މިނިސްޓަރު ވިދާޅުވި އެވެ.

މިނިސްޓަރު ވިދާލުވީ ރާއްޖެއިން ވަނީ ފަލަސްޠީނާ އެކު ސާބިތުކަންމަތީ ތިބިކަން ހާމަކޮށް 1967 ގެ ކުރީގެ ބޯޑަރުތަކުގެ މައްޗަށް ބިނާވެފައިވާ އިރުމަތީ ޤުދުސް ވެރިރަށް ކަމުގައި ހިމެނޭ މިނިވަން ފަލަސްޠީނު ދައުލަތެއް ޤާއިމުކުރުމަށް ގޮވާލާފައި އެވެ. އަދި  ފަލަސްޠީނަށް އދ. ގެ ފުރިހަމަ މެންބަރުކަން ދިނުމަށް ގޮވައިލައިފާވާނެ ކަމަށް ވިދާޅުވި އެވެ.

ފަލަސްޠީނު ރައްޔިތުންގެ ޙައްޤުތައް ހިމާޔަތްކުރުމަށް ބައިނަލްއަޤުވާމީ ފެންވަރުގައި ރާއްޖެއިން އަބަދުވެސް ވަކާލާތުކުރަމުން ގެންދެއެވެ.

ރާއްޖެ އާއި އެހެން ގައުމުތަކުގެ އަމަލާއި މެދު ރުޅިއައިސްހުރެ ވާހަކަ ދައްކަމުން ނަތަންޔާވޫ ބުނެފައިވަނީ އީރާނަށް ހަމަލާދިނުމަކީ އޭނާގެ ވާހަކަ އަޑުނާހައި ނުކުމެގެން ދިޔަ މަންދޫބުންގެ ގައުމުތަކަށް ވެސް ވީ ފައިދާ އެކެވެ. އީރާނުގެ ނިއުކްލިއާ ވަސީލަތްތަކަށް ހަމަލާދިނުމުން އެގައުމުތަކުގެ ވެރިން ސިއްރުން އިޒްރޭލަށް ޝުކުރުއަދާކުރި ކަމަށް ވެސް އޭނާ ބުންޏެވެ.

އޭނާ ބުނީ ވާހަކަ އަޑުނާހާ ދިޔައީ ފިނޑިން ކަމަށެވެ. އޭނާ ބުނީ ގައުމުތަކުގެ މަންދޫބުން ޖަލްސާގައި އޭނާ ގާޒާގައި ގަތުލް އާންމު ހިންގާ ކަމަށް ވާހަކަ ދައްކާފައިވާ ކަމަށެވެ. ފޮޓޯއާއި ވީޑިއޯއިން ރަނގަޅަށް ރެކޯޑްކޮށްފައިވާ ގަތުލުއާންމު އޭނާ ސިފަކުރީ "ގަރުނުގެ އެންމެ ބޮޑު ދޮގު"ގެ ގޮތުގަ އެވެ.