މަސްޖިދުލްޙަރާމްގެ އެންމެ ޒުވާން އިމާމު ޑރ. ޔާސިރް އައްދައުސަރީ ރާއްޖެ ވަޑައިގަތުމަށް ހަމަޖެހިފައިވާ ކަން އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު އިޢުލާންކުރައްވައިފިއެވެ.

މިކަން މިނިސްޓަރު އިއުލާނު ކުރެއްވީ ރޭ ބޭއްވި ކީރިތި ޤުރުއާން ކިޔެވުމުގެ ޤައުމީ މުބާރާތް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ނެވެ.ޑރ. ޔާސިރުގެ އުމުރުފުޅަކީ 46 އަހަރެވެ.

Advertisement

މި ޚަބަރު އިޢުލާންކުރައްވަމުން މިނިސްޓަރު ވަނީ މިއީ ރާއްޖެއަށް ލިބޭ އުފަލެއްގެ ގޮތުގައި ސިފަކުރައްވައިފައެވެ. މިއީ 43 އަހަރު ތެރޭ ފުރަތަމަ ފަހަރަށް މައްކާގެ  މަސްޖިދުލްޙަރާމްގެ އިމާމަކު ރާއްޖެ ވަޑައިގެންނަވާ ފުރަތަމަ ފަހަރެވެ.

ޑރ. ޔާސިރް އައްދައުސަރީއަށް ދައުވަތު ދެއްވާފައި ވަނީ ޒުވާން ޚަތީބުންގެ މަހާސިންތާގައި ބައިވެރިވެވަޑައިގަތުމަށެވެ. އެ ދުވަހަށް ވަޑައި ނުގެންނެވުނު ނަމަވެސް އޯލެވެލް އިމްތިޙާން ނިމުމުން ދަތުރުފުޅުގެ ތާރީޚު ހަމަޖައްސަވާނެ ކަމަށް ޝަހީމް ވިދާޅުވިއެވެ.

ޑރ. ޔާސިރު ރާއްޖެ ވަޑައިގެންނަވާނީ އޯލެވެލް އިމްތިހާނު ނިމޭފަހުންކަން ފާހަގަ ކުރައްވާ މިނިސްޓަރު ވިދާޅުވީ ޒުވާން ހަތީބުންގެ ތެރެއިން ވަރަށް ގިނަ ކުދިން މިއަހަރު އޯލެވެލް ހަދާ ކަމަށެވެ.

މީގެ ކުރިން މަސްޖިދުލްޙަރާމްގެ އިމާމަކު ރާއްޖެ ވަޑައިގެންނެވީ އިސްލާމީ މަރުކަޒު ހުޅުވުމަށް އިމާމު މުޙައްމަދު އައްޒުބައިޔީ ކުރެއްވި ދަތުރުފުޅުގައެވެ. އެ ދަތުރުފުޅަށް ފަހު 43 އަހަރު ވީ އިރު އެ ފެންވަރުގެ ބޭފުޅަކު ރާއްޖެއަށް ވަޑައިގެންފައެއް ނުވެއެވެ.

ޑރ. ޔާސިރް އައްދައުސަރީއަކީ ޒުވާނުންގެ މެދުގައި ނުހަނު މަޤުބޫލު މަސްޖިދުލްޙަރާމްގެ އެންމެ ޒުވާން އެއް އިމާމެވެ. 2019 ވަނަ އަހަރު އެ މަސްޖިދުގެ ދާއިމީ އިމާމަކަށް އައްޔަންކުރެއްވުމުގެ ކުރިން އެމަނިކުފާނު ޚިދުމަތްކުރެއްވީ ރިޔާޛްގެ މަސްޖިދުލް ދަޚީލްގައެވެ.

އެމަނިކުފާނުގެ ޤުރުއާން ކިޔެވުމުގެ ރީތި އަޑު ސޯޝަލް މީޑިއާގެ އެކި މަންސަތަކުގައި ވަރަށް ބޮޑު މަޤުބޫލުކަމެއް ހޯދައިފައިވެއެވެ. މީގެ އިތުރުން އެމަނިކުފާނަކީ 2020 ވަނަ އަހަރުން ފެށިގެން ދެ ޙަރަމްފުޅުގެ ކަންކަން ބަލަހައްޓާ ޖެނެރަލް ޕްރެޒިޑެންސީ ފޯ ދަ ހަރަމައިންގެ އެޑްވައިޒަރެއްގެ މަޤާމު ވެސް ފުރުއްވަމުން ގެންދަވާ ބޭފުޅެކެވެ.