ދިވެހިންނަށް ވިސާއާ ނުލައި ބެލަރޫސްއަށް ދަތުރުކުރެވޭ ގޮތް ހަދައި ދެ ގައުމުން އެއްބަސްވުމުގައި ސޮއި ކޮށްފި އެވެ.

މި ރަސްމިއްޔާތު އޮތީ މިހާރު އެމެރިކާގައި ކުރިޔަށްދާ އދ. ގެ ޢާންމު މަޖިލީހުގެ 81 ވަނަ ސެޝަންގެ ހަވާސާގެ ތެރެއިންނެނެވެ.

Advertisement

ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ފޮރިން މިނިސްޓަރު އިރުތިޝާމް އާދަމެވެ. ބެލަރޫސް ސަރުކާރުގެ ފަރާތުން ސޮއިކުރެއްވީ އެ ޤައުމުގެ ފޮރިން މިނިސްޓަރު މެކްސިމް ރީޒެންކޮފެވެ.

މި އެއްބަސްވުމުގެ ދަށުން ދެ ޤައުމުގެ ރައްޔިތުންނަށް ވިސާ ނެގުމަކާ ނުލައި ދަތުރުކުރެވޭނެއެވެ. އެގޮތުން އެ ދަތުރުގައި ދެ ގައުމުގައިވެސް 30 ދުވަހާ ހަމައަށް ހުރެވޭނެ އެވެ. އަދި އަހަރެއްގެ ތެރޭގައި ގިނަ ދަތުރުތައް ހިމެނޭ ގޮތަށް ޖުމްލަ 90 ދުވަހަށް ވުރެ ދިގު ނޫން މުއްދަތަކަށް ތިބެވޭނެ ކަމަށް ފޮރިން މިނިސްޓްރީން މައުލޫމާތުދެ އެވެ.

ސޮއިކުރެއްވުމުގެ ރަސްމިއްޔާތަށް ފަހު ބޭއްވެވި މަޝްވަރާގައި މިނިސްޓަރު އިރުތިޝާމް ވަނީ ދެ ޤައުމުގެ ދެމެދުގައި އޮތް ގުޅުން ބަދަހިކުރެއްވުމަށް ބެލަރޫސް ސަރުކާރުން ބެހެއްޓެވި ޝައުގުވެރިކަމަށް ޝުކުރު އަދާކުރައްވައިފައެވެ. އަދި މި އެއްބަސްވުމުގެ ސަބަބުން ދެ ޤައުމުގެ ރައްޔިތުންގެ މެދުގައި ގުޅުން ބަދަހިވެ އިތުރު ދާއިރާތަކުން ގުޅިގެން މަސައްކަތްކުރުމުގެ ފުރުޞަތު ފަހިވާނެ ކަމަށް އުންމީދުކުރައްވާ ކަމަށް ވިދާޅުވެފައިވެއެވެ.

މި އެއްބަސްވުމާ އެކު ދެ ޤައުމުގެ ރައްޔިތުންނަށް ފަސޭހަކަމާ އެކު ދެކޮޅަށް ދަތުރުކުރެވޭނެ މަގު ހުޅުވިގެންދާނެއެވެ.

ބެލަރުސް އަކީ ވަރަށް ގިނަ ދިވެހިން މެޑިސިން ދާއިރާއިން މަތީ ތައުލީމް ހާސިލް ކުރަން ދާ ގައުމެކެވެ.