ޕީއެންސީގެ ކޮންގްރެސްގައި އެކި މަގާމުތަކަށް އިންތިހާބުވެވަޑައިގެންނެވި ބޭފުޅުންނާއި ޕާޓީގެ ރައީސް ޑރ. މުހައްމަދު މުއިއްޒު ލީޑާޝިޕަށް އައްޔަންކުރެއްވި ބޭފުޅުން ސޯޝަލް ސެންޓަރުގައި މިއަދު މެންދުރުފަހު މަގާމުގެ ހުވާ ކުރައްވައިފިއެވެ.

ހުވާ ކުރެއްވި ބޭފުޅުންގެ ތެރޭގައި ޕާޓީގެ ހަ ނައިބު ރައީސުންނާއި މަތީ މަޖިލީހުގެ އަންހެން މެންބަރުންނާއި ޒުވާން މެންބަރުންނާއި ޢާންމު މެންބަރުންގެ ގޮތުގައި ހޮވިވަޑައިގެންނެވި 18 ބޭފުޅުންނާއި ގޮފިތަކުގެ ރައީސުންނާއި އިދާރީ އިސް ބޭފުޅުން ހިމެނިވަޑައިގަންނަވައެވެ. އިގުރާރު ލައިދެއްވީ ކުރީގެ ޕްރޮސެކިއުޓާ ޖެނެރަލް މުހުތާޒް މުހުސިނެވެ. ރަސްމިއްޔާތު ޝަރަފުވެރިކޮށްދެއްވީ ޕާޓީގެ ރައީސް ޑރ. މުއިއްޒެވެ.

Advertisement

ނައިބު ރައީސްކަމުގެ މަގާމަށް ހުވާ ކުރެއްވީ ސްޕޯޓްސް މިނިސްޓަރު ޢަބްދުﷲ ރާފިޢު އާއި ފިޝަރީޒް މިނިސްޓަރު އަހުމަދު ޝިޔާމާއި އިކޮނޮމިކް މިނިސްޓަރު މުހައްމަދު ސައީދާއި ރައީސް އޮފީހުގެ ޗީފް ސްޕޯކްސްޕާސަން މުހައްމަދު ހުސައިން ޝަރީފް (މުންދު) އާއި ނިލަންދޫ ދާއިރާގެ މެންބަރު ފާތިމަތު ސައުދާ އާއި ބާރަށު ދާއިރާގެ މެންބަރު އިބްރާހީމް ޝުޖާޢެވެ.

ޕާޓީގެ އަސާސީ ގަވާއިދުގެ ދަށުން ރައީސް މުއިއްޒު ލީޑާޝިޕަށް އައްޔަންކުރެއްވި 10 ބޭފުޅުންގެ ތެރޭގައި ރައީސް އޮފީހުގެ ޗީފް އޮފް ސްޓާފް ޢަބްދުﷲ ފަޔާޒާއި ރައީސް އޮފީހުގެ މިނިސްޓަރު ޢަބްދުﷲ ނާޞިރާއި ޓްރާންސްޕޯޓު މިނިސްޓަރު މުހައްމަދު އަމީނާއި ހައުސިން މިނިސްޓަރު ޑރ. ޢަބްދުﷲ މުއްތަލިބާއި ސްޕޯޓްސް މިނިސްޓަރު މުހައްމަދު ތޮލާލާއި ހެލްތު މިނިސްޓަރު ގީލާ ޢަލީ އާއި ގަތަރުގައި ހުންނަވާ ސަފީރު އާދަމް ޝަރީފް ހިމެނިވަޑައިގަންނަވައެވެ. ކުންފުނިތަކުން އައްޔަންކުރެއްވި ތިން ބޭފުޅުންނަކީ މާލޭ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާގް ހަލީލާއި އެޗްޑީސީގެ މެނޭޖިން ޑިރެކްޓަރު ޢަލީ ޒުހައިރާއި އެފްޑީސީގެ މެނޭޖިން ޑިރެކްޓަރު ހަމްދާން ޝަކީލެވެ.

މީގެ އިތުރުން މަތީ މަޖިލީހަށް އިންތިހާބުވި ނުވަ އަންހެން މެންބަރުންނާއި ހަތް ޒުވާން މެންބަރުންނާއި އަންހެނުންގެ ހަރަކާތުގެ ރައީސް ހެރިޓޭޖް މިނިސްޓަރު ހީނާ ވަލީދާއި ޒުވާނުންގެ ހަރަކާތުގެ ރައީސް އިބްރާހީމް އަބާން އާއި ދާއިރާތަކުގެ ރައީސުންނާއި ސްޓިއަރިން ކޮމިޓީތަކުގެ ބޭފުޅުން ވެސް މިއަދު ހުވާ ކުރައްވާފައިވެއެވެ.

ޕީއެންސީގެ ކޮންގްރެސް ކުރިއަށް ގެންދަނީ ސޯޝަލް ސެންޓަރުގައި ކަމަށް ވާއިރު މިއީ ޕާޓީގެ ހިންގުން އިތުރަށް ހަރުދަނާކޮށް ލީޑާޝިޕް އެކުލަވައިލުމަށް ބޭއްވި ކޮންގްރެސްއެކެވެ.