ސިޔާސީ ޕާޓީތަކުގެ މެންބަރޝިޕް ނިޒާމާ މެދު ހަޤީޤަތް އޮޅޭ ގޮތަށް ޕީޕަލްސް ނެޝަނަލް ފްރަންޓް (ޕީއެންއެފް) އިން ދޮގު ތުހުމަތުތައް ކުރަމުންދާ ކަމަށް ބުނެ އިލެކްޝަންސް ކޮމިޝަނުން އެ ޕާޓީގެ ޢަމަލުތައް ހަރުކަށި އިބާރާތުން ކުށްވެރިކޮށްފިއެވެ.

އިލެކްޝަންސް ކޮމިޝަނުން ނެރުނު ބަޔާނުގައި ފާހަގަކޮށްފައިވާ ގޮތުގައި ރާއްޖޭގައި ސިޔާސީ ޕާޓީތައް އުފެދުނީއްސުރެ ރައްޔިތުންނަށް ނޭނގި ޕާޓީތަކަށް މީހުން ވެއްދުމާއި ވަކިކުރުމުގެ ޝަކުވާ ކެނޑިނޭޅި ލިބެމުން ދިޔައެވެ. މި ކަމަށް ޙައްލެއް ގެނައުމުގެ ގޮތުން ޕާޓީތަކާއި ކަމާ ގުޅޭ އިދާރާތަކާ މަޝްވަރާކޮށް ތަފާތު ދައުރުތަކުގައި ގިނަ އިސްލާޙީ ފިޔަވަޅުތައް އަޅާފައިވާ ކަމަށް އެ ކޮމިޝަނުން ބުނެފައިވެއެވެ.

Advertisement

އެ ބަޔާނުގައި ބުނެފައިވާ ގޮތުގައި މެންބަރޝިޕް ނިޒާމުގެ ތެރެއަށް އީ-ފާސް ތަޢާރަފްކުރުމާ އެކު ކޮންމެ ރައްޔިތަކަށް ވެސް އަމިއްލަ އީ-ފާސް ބޭނުންކޮށްގެން ބޭނުން ވަގުތެއްގައި ޕާޓީއަކަށް ވަނުމާއި ވަކިވުމުގެ ފުރިހަމަ އިޚްތިޔާރު މިހާރު ލިބެއެވެ. ޕާޓީއެއްގައި ރަޖިސްޓަރީ ވުމާއި ވަކިވުމަކީ ހަމައެކަނި އެ ފަރާތާއި ޕާޓީއާ ދެމެދުގައި ހިނގާ ފަރުދީ ނިންމުމެއް ކަމަށާއި މި ނިޒާމުގެ ތެރެއިން އެއްވެސް މީހަކަށް ނޭނގި ޕާޓީން ވަކިކުރުން ނުވަތަ އެހެން ޕާޓީއަކަށް ބަދަލުކުރުމަކީ ކޮމިޝަނަށް ވެސް އަދި އެހެން ފަރާތަކަށް ވެސް ކުރެވެން އޮތް ކަމެއް ނޫން ކަމަށް އެ ކޮމިޝަނުން ބުނެފައިވެއެވެ.

ޕީއެންއެފްގެ ވާހަކަތަކުގެ ސަބަބުން ކޮމިޝަނާއި މެންބަރޝިޕް ނިޒާމަށް ޢާންމުންގެ މެދުގައި އޮންނަ އިތުބާރު ގެއްލޭ ކަމަށް ބަޔާންކޮށް ޙަޤީޤަތާ ޚިލާފު ވާހަކަ ނުފެތުރުމަށާއި ޒިންމާދާރުކަމާ އެކު ސިޔާސީ ޙަރަކާތްތައް ކުރިއަށް ގެންދިއުމަށް ހުރިހާ ފަރާތްތަކަށް އެ ކޮމިޝަނުން އިލްތިމާސްކޮށްފައިވެއެވެ.

އީ-ފާސް ނިޒާމަކީ ސިޔާސީ ޕާޓީތަކުގެ މެންބަރޝިޕް ކަށަވަރުކުރުމުގައި ދެފުށް ފެންނަ އިތުބާރު ހިފޭ ނިޒާމެއްގެ ގޮތުގައި ރައްޔިތުން ބަލައިގެންފައިވާ ނިޒާމެއް ކަމަށް އެ ކޮމިޝަނުން ބުނެފައިވެއެވެ.