ޗެޓްޖީޓީޕީ އާއި ތަފާތު އޭއައި ޗެޓްބޮޓުތައް ބޭނުންކޮށް ނުރައްކާތެރި އަމަލުތަކާއި ގުޅޭ މައުލޫމާތު ހޯދައި އޭގެން ދޭ މައުލޫމާތާއި އެއްގޮތަށް އަމަލު ކުރާ ކުޑަކުދިންގެ މައްސަލަތައް އިތުރުވަމުންދާ ކަމަށް އެމެރިކާގެ ކަމާ ބެހޭ އިދާރާތަކުން ހާމަކޮށްފި އެވެ.

އެމެރިކާގެ މިޑްލްސެކްސް ކައުންޓީ ޑިސްޓްރިކްޓް އެޓާނީ އޮފީހުން މިގޮތަށް ހާމަކުރީ 17 އަހަރުގެ އިންޑިއާ ދަރިކޮޅުގެ އެމެރިކާ ފިރިހެން ކުއްޖަކު އޭނާގެ މަންމަ އާއި ފިރިހެން ކޮއްކޮ މަރާލި ހާދިސާ އާއި ގުޅިގެން ނެރުނު ބަޔާނެއްގައި އެވެ. އެ ކުއްޖާ ހައްޔަރު ކޮށްފައިވަނީ އެ ދެމީހުން ގޭތެރޭގައި މަރާލުމަށް ފަހު މަންމަގެ ކާރުގައި ފިލައިގެން ގޮސް އުޅެނިކޮށެވެ.

Advertisement

އެޓާނީ އޮފީހުން ނެރުނު ބަޔާނުގައި ބުނެފައިވާ ގޮތުގައި މަންމަ އާއި ކޮއްކޮ މެރުމުގެ ހިޔާލު އަރްޖުން އަރްވިންދު ކިޔާ އެ ކުއްޖާ ހޯދީ ޗެޓްޖީޓީޕީ އާއި ޗެޓްބޮޓުތަކުގެ އެހީގައި ކަމަށެވެ. ފުލުހުން އޭނާ ހައްޔަރުކޮށް ހޯދި މައުލޫމާތުތަކުން އެނގުނު ގޮތުގައި ޗެޓްޖީޕީޓީ މެދުވެރިކޮށް ޢާއިލާ މެރުމާ ގުޅޭ ޚިޔާލުތައް ހޯދައި ކަންބޮޑުވާ ފަދަ ޢަމަލުތައް ހިންގާފައިވާކަމަށެވެ.

މި މައްސަލައިގެ ތަޙުޤީޤުން ހާމަވި ގޮތުގައި އެ ކުއްޖާ ވަނީ ފަހަކަށް އައިސް އިންޓަނެޓާއި ޗެޓްޖީޕީޓީ ބޭނުންކޮށްގެން ޢާއިލާ މެރުމާ ގުޅޭ ނަޒަރިއްޔާތަކާއި ޚިޔާލީ ތަސައްވުރުތައް ހޯދައިފައެވެ. އެ ޗެޓްބޮޓު ބޭނުންކޮށްގެން ވާހަކަތައް އުފެއްދުމަށް އެދިފައިވާ ކަމަށާއި ސުވާލުތައް ކޮށް ކެރެކްޓާތައް ތައްޔާރުކޮށްފައިވާ ކަމަށް ވެސް އެ ބަޔާނުގައި ބުނެފައިވެއެވެ.

އޭއައި ޗެޓްބޮޓުތައް ބޭނުންކޮށް ނުރައްކާތެރި ޢަމަލުތަކާ ގުޅޭ މަޢުލޫމާތު ހޯދުމުގެ މައްސަލަތައް އެމެރިކާގައި ހުށަހެޅެމުންދާ މިންވަރު ފަހަކަށް އައިސް އިތުރުވެފައިވާކަމަށްވެސް ބުނެފައިވެ އެވެ.

މިކަމަކީ ތަހުޒީބުވެފައިވާ މުޖުތަމައުއެއްގައި ދުނިޔޭގެ ހުރިހާ ގައުމެއްގައި ސަމާލުކަން ދޭންވީ ކަމެއްކަމަށް ފާހަގަކޮށްފައިވެއެވެ.

އިންޓަނެޓު މެދުވެރިކޮށް ކުދިން ކުޅޭ ގޭމުތަކާއި މުއާމަލާތްތައް ހިންގާ ގޮތް ބަލައި ސަމާލުކަން ދޭން ޖެހެ އެވެ.