ކެންސަރު ބައްޔަށް ފަރުވާދިނުމަށް ބޭނުންކުރާ އިންޖެކްޝަނެއްގެ ފޭކް ބެޗެއް އަމިއްލަ ފަރާތަކުން ރާއްޖެ ގެނެސްފައިވާކަން ކަށަވަރުވެ އެ ބޭނުންނުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު އިލްތިމާސްކޮށްފިއެވެ.

އެމްއެފްޑީއޭއިން ނެރުނު އެލާޓުގައި ފާހަގަކޮށްފައިވާ ގޮތުގައި ސްވޯޑްސް ލެބޯޓްރީސް އަންލިމިޓެޑު ކިޔާ ކުންފުންޏެއްގެ ނަމުގައި އުފައްދާފައިވާ "ނިވޮލުމަބް" އިންޖެކްޝަންގެ ބެޗު ނަމްބަރު 8081399 ރާއްޖެ ގެނެސްފައިވާކަން ޔަޤީންކުރެވިފައިވެއެވެ. އެ އޮތޯރިޓީން ވަނީ މި އިންޖެކްޝަން ރާއްޖެއަށް އެތެރެކުރުމާއި ވިއްކުމާއި ބޭނުންކުރުން މުޅިން މަނާކޮށްފައެވެ.

Advertisement

ޞިއްޙަތާ ބެހޭ ވުޒާރާގެ އޮފިޝަލަކު ވިދާޅުވީ އެ ބެޗު ރާއްޖެ ގެނެސްފައިވަނީ ވަކި ފަރުދެއް ކަމަށާއި ފާމަސީތަކުގައި މި އިންޖެކްޝަން ނެތް ކަމަށެވެ.

މީގެ އިތުރުން ކެންސަރު ފަރުވާގައި ބޭނުންކުރާ "ޑާޒަލެކްސް" ބޭހުގެ ނަކަލު ބެޗުތަކެއް ވެސް ރާއްޖެއާއި މެކްސިކޯއިން ފެނިގެން ދުނިޔޭގެ ޞިއްޙަތު ޖަމިއްޔާ (ޑަބްލިއުއެޗްއޯ) އިން މިއަދު ވަނީ ވަކި އެލާޓެއް ނެރެފައެވެ. އެ ޖަމިއްޔާއިން ބުނި ގޮތުގައި މި ފޭކް ބޭސްތަކުގެ ސަބަބުން ބަލިމީހުންގެ ފުރާނައަށް ނުރައްކާވެ ފަރުވާގެ ނިޒާމަށް ބޮޑެތި ގެއްލުންތަކެއް ލިބިދާނެ ކަމަށެވެ.

ޚާއްޞަކޮށް ބައެއް ހޮސްޕިޓަލުތަކަށް މި ބޭސް ވާޞިލުވެފައިވުމަކީ ބައިނަލްއަޤުވާމީ ބޭސް ފޯރުކޮށްދިނުމުގެ ނިޒާމާ މެދު ކަންބޮޑުވާން ޖެހޭ ކަމެއް ކަމަށް ވެސް ޑަބްލިއުއެޗްއޯއިން ފާހަގަކޮށްފައިވެއެވެ.

"ޑާޒަލެކްސް" އަކީ ކަށީގެ މަދުގެ ކެންސަރުގެ ބާވަތެއް ކަމަށްވާ "މަލްޓިޕަލް މައިލޯމާ" އާއި ލޭގެ ބައްޔެއް ކަމަށްވާ "އެމިލޮއިޑޯސިސް" އަށް ފަރުވާ ކުރުމަށް ބޭނުންކުރާ އެންޓިބޮޑީއެކެވެ.