ޒުވާނުން ބާރުވެރިކުރުވުމުގެ ޢަޒުމުގައި ސަރުކާރު ސާބިތުކަމާއެކު ދެމިއޮންނާނެ ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

ރައީސް މިހެން ވިދާޅުވީ މިއަދު ފާހަގަ ކުރަމުންދާ ބައިނަލްއަޤުވާމީ ޒުވާނުންގެ ދުވަހާ ގުޅިގެން ފޮނުއްވި މެސެޖުގައި އެވެ.

Advertisement

މި ދުވަހުގެ މުނާސަބަތުގައި ފޮނުއްވި ޚާއްޞަ މެސެޖުގައި ރައީސް ވަނީ ތަފާތު ރަށްރަށާއި ސަގާފަތްތަކުގެ ޒުވާނުންނަށް ދިމާވާ ޙަޤީޤަތްތައް ތަފާތު ނަމަވެސް ފެންވަރު ރަނގަޅު ތަޢުލީމާއި މާނަހުރި ފުރުޞަތުތަކާއި ޢަބުރުވެރި ދިރިއުޅުމެއް ފަދަ އުންމީދުތައް ހުރިހާ ޒުވާނުން ހިއްސާކުރާކަން ފާހަގަކުރައްވައިފައެވެ.

ރާއްޖޭގެ އާބާދީގެ ގާތްގަނޑަކަށް 45 އިންސައްތައަކީ ޒުވާނުންކަން ހަނދުމަފުޅުކޮށްދެއްވައި ދީނީ ތަޢުލީމީ ސައިންސް އަދި ކުޅިވަރުގެ ދާއިރާއިން އެ ޒުވާނުން ހޯދަމުންދާ ކާމިޔާބީތަކަށް އެމަނިކުފާނު ސާބަސް ދެއްވިއެވެ.

ތަޢުލީމީ ކާމިޔާބީތަކާ އެއްވަރަށް ވަޒީފާގެ ފުރުޞަތު ތަނަވަސްކޮށްދިނުމަށްޓަކައި ޤައުމީ ފެންވަރުގައި މަތީ ތަޢުލީމާއި ތަމްރީނުގެ ދޮރުތައް ހުޅުވައިދިނުމުގެ މަސައްކަތް ކުރައްވަމުން ގެންދަވާ ކަމަށް ރައީސް ވިދާޅުވިއެވެ. އެ މޭރުމުން ނޭޝަނަލް އެޕްރެންޓިސްޝިޕް ޕުރޮގުރާމާއި ނޭޝަނަލް ސަރވިސް ޕުރޮގުރާމު ފަރުމާކޮށްފައި ވަނީ ކިޔެވުމުގެ މާހައުލުން ވަޒީފާގެ މައިދާނަށް ބަދަލުވުމުގެ މަރުޙަލާ ފަސޭހަކޮށްދިނުމުގެ ބޭނުމުގައި ކަމަށް އެމަނިކުފާނު ވިދާޅުވިއެވެ.

ޒުވާނުންގެ ޚިޔާލުތަކާއި އުންމީދުތަކަކީ ޤައުމީ ތަރައްޤީއަށް އަގުހުރި އުންސުރުތަކެއް ކަމުގައި ސިފަކުރައްވައި ޒުވާނުންގެ ބުންވަރާއި އިޚުލާޞްތެރިކަމުގެ ބާރުން ފުދުންތެރި އަދި ދެމެހެއްޓެނިވި ތަރައްޤީގެ މަންޒިލަކަށް ޤައުމު ދަތުރުކުރާނެ ކަމުގެ ޔަޤީންކަން އެބައޮތް ކަމަށް ރައީސް ވިދާޅުވިއެވެ.

ހަމައެއާއެކު ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވެސް އެކްސްގައި ޕޯސްޓެއް ކުރައްވައި ކޮންމެ ރަށަކުން ކޮންމެ ޙާލަތަކުން އައި ޒުވާނެއް ނަމަވެސް އެ މީހެއްގެ ހުވަފެންތަކަކީ އަގުހުރި ހުވަފެންތަކެއް ކަމަށް ވިދާޅުވެ ވަކި ތަނަކަށް ނިސްބަތްވީތީ ފުރުޞަތުތައް ހަނިނުވާނެ ރާއްޖެއެއް ބިނާކުރުމަށް ގޮވައިލެއްވިއެވެ.

ކޮންމެ އަހަރެއްގެ އޮގަސްޓު މަހުގެ 12 ވަނަ ދުވަސް ބައިނަލްއަޤުވާމީ ޒުވާނުންގެ ދުވަހުގެ ގޮތުގައި ފާހަގަކުރަނީ ޒުވާނުންނާ ގުޅުންހުރި މައްސަލަތަކާ މެދު ހޭލުންތެރިކަން އިތުރުކޮށް ބައިނަލްއަޤުވާމީ ތަރައްޤީގައި ޒުވާނުންގެ ޤާބިލިއްޔަތު ފާހަގަކުރުމުގެ ގޮތުންނެވެ.