އެމެރިކާގެ ރައީސް ޑޮނަލްޑް ޓްރަމްޕް މިދިޔަ މަހު ތުރުކީއަށް ކުރެއްވި ދަތުރުފުޅަށް ފަހު އެ ގައުމުން ފުރަން ތައްޔާރުވަނިކޮށް އީރާނުގެ ޙަމަލާއެއްގެ ބިރު އޮތުމުން ސީކްރެޓް ސާވިސް އާއި ސިފައިންގެ އެންގުމަށް އޭނާ ދަތުރުކުރި މަތިންދާބޯޓު ބަދަލުކުރި ކަމަށް އެއްބަސްވެ ވަޑައިގެންފި އެވެ.

ތުރުކީގައި ބޭއްވި ނޭޓޯ ސަމިޓަށް ފަހު ފުރުމުގެ ކުރިން ޓްރަމްޕް ފުރަތަމަ އެރީ ކެމެރާތަކުގެ ކުރިމަތީގައި އެއާ ފޯސް ވަންގެ ކުރީގެ ބޯޓަށެވެ. ނަމަވެސް ވޮޝިންގްޓަން ޕޯސްޓުން ހާމަކުރި ގޮތުގައި އީރާނުގެ ޙަމަލާގެ ބިރެއް އޮތުމާ ގުޅިގެން ޓްރަމްޕް ސިއްރިއްޔާތުގައި އެ ބޯޓުން ބާލައި އެއާޕޯޓު ކޭޓަރިން ވެހިކަލެއްގައި ކުޑަ އަސްކަރީ ބޯޓަކަށް ބަދަލުކުރީއެވެ.

މިކަން ސިއްރުކޮށްފައި އޮއްވަ ވޮޝިންޓަން ޕޯސްޓުން މި ހަފްތާގައި އެކަން ހާމަ ކުރުމުން އެންމެ ފަހުން ޓްރަމްޕު ވަނީ އެކަމަށް އެއްބަސްވެފައި އެވެ.

ޓްރަމްޕް ވިދާޅުވީ ސީކްރެޓް ސާވިސް އާއި ސިފައިން އެންގި ގޮތަށް ކަންތައް ކުރިކަމަށާއި އެހެން ބޯޓެއްގައި ދަތުރު ކުރަން ލަފާ ދިނީ އެމީހުން ކަމަށެވެ. ޓްރަމްޕު ވިދާޅުވީ އެ އެންގުމާއި ގުޅިގެން އިތުރު ސުވާލެއް ނުކުރާ ކަމަށާއި އެގޮތަށް އަމަލު ކުރީ އާންމުކޮށް ވަރަށް ގިނަ ނުރައްކަލުގެ އިންޒާރު ލިބޭތީ ކަމަށެވެ.

އިތުރަށް ޓްރަމްޕް ވިދާޅުވީ ކުރިން ދަތުރު ކުރަން ހަމަޖެހިފައި އޮތް އެއާ ފޯސް ވަންގެ ބޯޓަށް ވުރެ ފަހުން އެ ދަތުރު ކުރި ބޯޓުގައި މާ ނުރައްކާ ބޮޑުކަމަށް ދެކޭ ކަމަށެވެ.

ވޯލް ސްޓްރީޓް ޖާނަލުން ރިޕޯޓުކުރި ގޮތުގައި މި ނުރައްކަލުގެ މަޢުލޫމާތު އެމެރިކާއަށް ފޯރުކޮށްދިނީ އިސްތިޢުމާރީ އިސްރާއީލުންނެވެ. އެ ޖާސޫސީ މަޢުލޫމާތުން ދެއްކި ގޮތުގައި ކޮނޑުމަތީގައި ބާއްވައިގެން ޖަހާ މިސައިލް ބޭނުންކޮށްގެން ޓްރަމްޕް ދަތުރުކުރި ބޯޓަށް ޙަމަލާ ދޭން އީރާނުން ރޭވިއެވެ.

ވަރަށް ސިއްރުން ހިންގި މި އޮޕަރޭޝަން ސިއްރުކޮށްފައި ބޭއްވުމަށް ޓްރަމްޕާ އެކު ދަތުރުކުރާ ކަމަށް ދެއްކުމުގެ ގޮތުން އެއާ ފޯސް ވަންގައި ދަތުރު ކުރި ނޫސްވެރިންނަށް ބޯޓުގެ ކުޑަދޮރުތަކުގެ ފޮތިތައް ލައްޕާފައި ބެހެއްޓުމަށް އެންގިއެވެ. ބައެއް ވައިޓް ހައުސް މުވައްޒަފުންނަށް ވެސް ރައީސް އެ ބޯޓުގައި ހުރި ކަމަށް ޤަބޫލުކުރެވުނެވެ. ނަމަވެސް ޚާރިޖީ ވަޒީރު މާކޯ ރޫބިއޯ ހިމެނޭ ގޮތުން ބައެއް ސީނިއާ ބޭފުޅުން އެއާ ފޯސް ވަންގެ ބޯޓުގައި ދަތުރު ކުރި އެވެ.

ޓްރަމްޕް ގޮވައިގެން ދިޔަ ސީ 32 އޭ ބޯޓު އިނގިރޭސިވިލާތަށް ޖައްސީ އެ ޤައުމުގެ ގަޑީން ރޭގަނޑު 10:20 ގައެވެ. ނޫސްވެރިން ތިބި ކުރީގެ ބޯޓު ޖެއްސީ އޭގެ މިނެޓުތަކެއް ފަހުންނެވެ. އިނގިރެސިވިލާތުގެ ރޯޔަލް އެއާ ފޯސް މިލްޑަންހޯލް އަށް އެއާ ފޯސް ވަން ޖެއްސުމުން ޓްރަމްޕް ރިޔާސީ ބޯޓުން ފައިބާ ފޮޓޯ ފޮޓޯގްރާފަރުން ނެގިއެވެ. އެހެންކަމުން ނޫސްވެރިންނަށް ނޭނގި ޓްރަމްޕް އެ ބޯޓަށް އަލުން ސިއްރުން އެރީ ކަމަށް ބެލެވެއެވެ.

އެ އޮޕަރޭޝަނާއި ގުޅޭ ހުރިހާ ކަމަކަށް ޓްރަމްޕް އެއްބަސްވެފައިވާއިރު މީގެ ކުރިން ވައިޓްހައުސް އިން އެކަމަށް ސީދާ ޖަވާބެއް ނުދެ އެވެ.

މިފަދަ އުކުޅެއް 2000 ވަނަ އަހަރު ވެސް ބޭނުންކޮށްފައިވެއެވެ. އެ ފަހަރު ރައީސް ބިލް ކްލިންޓަން ޕާކިސްތާނަށް ވެއްދީ ނިޝާނެއް ނެތް ޖެޓެއްގައި ކަމަށް ވާއިރު ރަސްމީ އެއާ ފޯސް ވަން ބޯޓު ފޮނުވީ އޮޅުވައިލުމެއްގެ ގޮތުގައެވެ. މި ސެކިއުރިޓީ އޮޕަރޭޝަން ހިންގީ އީރާނާ ދެމެދު ނުތަނަވަސްކަން ބޮޑުވެފައިވާ ދަނޑިވަޅެއްގައި ކަމަށް ވާއިރު ތުރުކީ އާއި އީރާނަކީ އެއްގައި ވެސް ބޯޑަރު ހިއްސާކުރާ ދެ ޤައުމެވެ.